Урысыем IофшIэнымкIэ и ЛIыхъужъэу, Адыгэ, Къэбэртэе-Бэлъкъар, Къэрэщэе-Щэрджэс республикэхэм ялъэпкъ тхакIоу МэщбэшIэ Исхьакъ бзылъфыгъэхэм я Дунэе мафэ ехъу­лIэу зэIухыгъэ Iахь­зэхэлъ обществэу «По­лиграф Юг» зыфиIорэм щыIагъ. Ащ игъусагъ Адыгэ Республикэм лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэ­хэмкIэ ыкIи къэбар жъугъэм иамалхэмкIэ и Комитет ипащэу Шъхьэлэхъо Аскэр.

— Илъэс 70-кIэ узэкIэIэбэжьмэ сиапэрэ тхылъ къыдэкIыгъ. Типографиер ащ дэжьым нэмыкI чIыпIэ щытыгъ, сыд фэдиз гъогу къин къымыкIугъэми, ар къызэтеуцуагъэп, хэхъоныгъэхэр ышIыхэзэ ыпэкIэ лъыкIотагъ. Илъэс зэкIэлъыкIохэм нахьышIум ылъэныкъокIэ зэхъокIыныгъабэ иIэ зэрэхъугъэм тегъэ­гушIо. Тхылъыбэ мыщ къыщыдэзыгъэ­кIыгъ, шъуиIофшIэн сегъэразэ.

Бзылъфыгъэхэм я Дунэе мафэкIэ сыгу къыз­деIэу сышъуфэгушIо, гъэхъэгъэшIу­хэр шъушIыхэзэ шъуиIофшIэн хэжъугъэ­хъонэу сышъуфэлъаIо, — къыIуагъ МэщбэшIэ Исхьакъ.

Нэужым ищыIэныгъэ гъогу епхыгъэ къэбархэр къэзэрэугъоигъэхэм къафиIотагъэх, ытхыгъэхэм ащыщхэм нахь игъэкIотыгъэу къатегущыIагъ.

Iахьзэхэлъ обществэу «Полиграф Юг» зыфиIорэм Iоф щызышIэхэрэм ацIэкIэ ащ игенеральнэ пащэу Владимир Шматовым МэщбэшIэ Исхьакъ зэрэфэразэхэр къыIуагъ.

— 2015-рэ илъэсым типографием генеральнэ пащэ сызыфашIым предприятием федэ къымыхьыжьэу щытыгъ, чIыфэ телъыгъ. Мыщ дэжьым МэщбэшIэ Исхьакъ итхылъэу къыдэдгъэкIыгъэхэм къиныгъохэм тахащыжьыгъагъ, зыпкъ тиуцожьынэу едгъэжьэгъагъ. Илъэс заулэкIэ чIыфэ ттемылъыжьэу, федэ къэт­хьэу Iоф тшIэ хъугъэ. Непэ тиIофшIэн ыпэкIэ лъытэгъэкIуатэ, — къыIуагъ ащ.

ДЕЛЭКЪО Анет.