ФехтованиемкIэ Тэхъутэмыкъое районым изэIухыгъэ зэнэкъокъу поселкэу Инэм щыкIуагъ. Ащ зэкIэмкIи спортсмени 132-рэ хэлэжьагъ. Аныбжь елъытыгъэу ахэр купитIоу гощыгъагъэх: 2010 — 2013-рэ ыкIи 2006 — 2009-рэ илъэсхэм къэхъугъэхэр.

Адыгеим илIыкIохэм адакIоу зэнэкъокъум зыщаушэтыгъ Краснодар ыкIи Ставрополь крайхэм, Ростов ыкIи Волгоград хэкухэм, Республикэу Къырым къарыкIыгъэхэм.

Iофтхьабзэм дэгъоу зыкъыщагъэлъэгъуагъ ыкIи хагъэунэфыкIырэ чIыпIэхэр къыдахыгъэх тиреспубликэ къэзыгъэлъэгъогъэ Степан Поздняковым, Мамый Радмир, Анастасия Крижановскаям, Устинья Бацко.

Джащ фэдэу типшъашъэхэм ыкIи тикIалэхэма команднэ зэ­нэкъокъухэм гъэхъэгъэшIухэр щашIыгъэх. Пшъашъэхэм текIоныгъэр ыкIи ятIонэрэ чIыпIитIу къыдахыгъ, кIалэхэр ящэнэрэ хъугъэх.

Адыгеим щыщхэу хагъэунэфыкIырэ чIыпIэхэр къыдэзыхыгъэхэм зэкIэми Тэхъутэмыкъое районым испорт еджапIэ фехтованиемкIэ икъутамэ зыщагъасэ, ар 2019-рэ илъэсым Iоныгъом къызэIуахыгъ.