«Адыгэ макъ» — ыцIэ къекIы ыкупкI. ЛIэшIэгъу псау хъугъэу сыд фэдэ лъэхъэнэ зэблэкIыгъохэми зэрифэшъуашэу къапхырыкIыгъэу, республикэм инэпэеплъ, лъэпкъыбзэм игъэфедэнкIэ шэпхъэ лъагэхэм атет, сыд фэдэ зэхъокIыныгъэхэр тищыIэныгъэ къыхэхъухьэхэми, ахэм задырегъаштэ тигъэзет закъо.

Адыгеим къыщыхаутыхэрэм «Адыгэ макъэр» афэмыдэ зышIырэр адыгабзэкIэ а зыр къызэрэдэкIырэр ары. Лъэпкъыбзэр, культурэр къеухъумэх, тарихъыр ащигъэгъупшэрэп, тичIыгу, тикъэралыгъо, адыгэ пстэоу дунаим щитэкъухьагъэм къащышIырэм иIотакIу.

Лъэпкъ гъэзетыр къызыдэкIырэр илъэ­си 100 зыщыхъурэ мэзэ 12-м «Адыгэ макъэм» итарихъ, ащ щылажьэщтыгъэхэм афэгъэхьыгъэ къэбархэр, еджэхэрэм яеплъыкIэхэр къыдэкIыгъо зэфэшъхьаф­хэм къащитIотыкIыщтых, къыхэтыутыгъа­хэу щыIэри макIэп. Непэрэ мэфэкI къыдэкIыгъор зэрэтыублэрэр джырэ тимафэхэм лъэпкъ гъэзетым иIофшIакI, ащ щылажьэхэрэми нахь пэблагъэ шъуа­фэтшIыщт.

Шъхьадж зыфаем диштэу

Илъэсишъэм зэкIэмкIи гъэзет номер 22728-рэ къыдэкIыгъ, лъэхъэнэ зэфэшъхьафхэм ипчъагъэу къыхаутыщтыгъэр минипшIым шIокIэуи хъущтыгъэ, ау джырэ уахътэм мини 4350-м ехъу. Ау ащ къикIырэп икъыдэгъэкIын нахь псынкIэ хъугъэу е нахь къарыу макIэ пыкIуадэу. ЗэхъокIыгъэр лъэхъаныр ары. Джы жъугъэу цIыфхэм интернетыр къахэ­хьагъ, къэбарыр псынкIэу ыкIи нахь кIэкIэу къызщаIэкIэхьэрэ уахът тызхэтыр. Мыщ дэжьым къыхэгъэщыгъэн фае тигъэзети ащ зэрэдэбакъорэр. Ар апэрэ нэкIубгъоми къыщэлъагъо — тисайт, тисоциальнэ хъытыухэм псынкIэу уарыхьан зэрэплъэкIыщт тамыгъэхэр ащ къытехьагъэх.

Сыдэущтэу къэбарыр къыпIэкIэхьащтми, лъэныкъорыгъазэу щымытэу, бгъу пстэумкIи тиIофышIэхэм ар къырагъахьэ — тхылъыпIэм тетэу есагъэхэм ыкIи зикIасэхэм апае — гъэзетым, интернет амалхэр нахь къыхэзыхыхэрэм — сайтым ыкIи социальнэ нэкIубгъохэм, Телеграм-каналхэм. Къыхэзгъэщын, лъэпкъ гъэзетыр тилъэпкъэгъу закъохэр арэп зытелъытагъэр — адыгабзэм дакIоу урысыбзэкIи, тыркубзэкIи Iоф тэшIэ. Ащ амал къытеты адыгэм идунай пстэури хэтщэнэу, хъурэ-шIэрэм щыдгъэгъозэнхэу. Тилъэпкъэгъоу нэмыкI къэралыгъо­хэм ащыпсэухэрэми анаIэ лъэшэу къыт­тет, хэкум зэпхыныгъэу дыряIэм, лъэпкъ лъэмыджым икIэсэнхэм тэри зыкIэ тащыщ. Ащ урымыгушхон плъэкIыщтэп.

Адыгэм ымакъэ зыгъэIухэрэр

Гъэзетым непэ зэкIэмкIи нэбгырэ 43-рэ щэлажьэ. Ахэр — журналистых, зэдзэкIакIох, пшъэдэкIыжь зыхьырэ секретарых, къатхырэм ихэутын зэшIозыхыхэрэр, нэкIубгъохэм язэхэгъэуцон пылъхэр, ахэм яджэжьхэрэр, сурэтхэр тезыхыхэрэр, ахэр зэзыгъэпэшыхэрэр, нэкIубгъохэм яджэжьхэрэр, ахъщэр къэзылъытэхэрэр, пстэури къезыщэкIы­хэрэр, хъызмэтыр зезыхьэрэр, къэбзэныгъэм лъыплъэхэрэр. Мы зэпстэуми хэз имыIэу редакцием иIофшIэн къагъэ­псы, шъхьадж ышIэрэм мэхьэнэ гъэнэфагъэ иI.

Джы пстэури нахь игъэкIотыгъэу. ПшъэдэкIыжь зыхьырэ секретарьхэр — ЖакIэмыкъо Аминэтрэ Тхьаркъохъо Адамрэ. Мыхэм яIофшIэн мэхьанэу иIэр яIэнатIэ къыреIотыкIы — пшъэдэкIыжь ин ателъ — журналистхэм къаугъоирэ къэбархэм яджэжьых, хэукъоныгъэ къа­хэкIыгъэмэ, агъэтэрэзыжьы, сурэтхэр къатхыгъэм атефэхэу къыхахыгъэхэмэ лъэплъэх, зэпстэури зэкIэлъыкIуакIэу редактор шъхьаIэмрэ ащ игуадзэрэ ягъусэхэу агъэнэфагъэм тетэу нэкIубгъом къырагъахьэ.

Нэужым нэкIубгъо пэпчъ лъэплъэжьых. Аминэт тиIофшIэгъухэу анахьыбэрэ гъэзетым Iутыгъэхэм ащыщ, ар тиупчIэжьэгъу, цыхьэ ыкIи лъытэныгъэ ин зыфэтшIэу щыт. Адами илъэсыбэ хъугъэу щэлажьэ, журналистэу къыIухьи, итхакIэкIэ къылэжьыгъэу ыпэкIэ лъыкIотагъ, республикэм ипащэ зыхэлэжьэрэ Iофтхьабзэхэр къытхыжьынхэу цыхьэ фашIыгъ, нэужым пшъэдэкIыжь зыхьырэ секретарэу агъэнэфагъ. Аминэти Адами зэкIэми ауж IофышIэ чIэкIыжьхэрэм ащыщых.

ЗиIофшIэнкIэ мэхьэнэ ин зиIэхэм ащыщ зэдзэкIакIохэу гъэзетым Iутхэр. Ахэр — Тхьаркъохъо Сафыетрэ ЛIышэ Саныетрэ. Сафыет зэдзэкIынымкIэ отделым ипащ. Адыгэ Республикэм ихэбзэгъэуцугъэхэр, ЛIышъхьэм иунашъохэр, урысыбзэкIэ, къэбэртэябзэкIэ редакцием къагъэхьырэм инахьыбэр мы нэбгыритIур ары зэзыдзэкIырэр. Адыгэ Республикэм и Конституцие изэдзэкIын джащ фэдэу хэлэжьагъэх, къулыкъу зэ­фэшъхьафхэри къызкIэлъэIухэрэ зэ­дзэкIынхэри афашIых. Сафыети тина­хьыжъ гъэшIуагъэхэм ащыщ, еIолIэнчъэу, адыгабзэр зэришIэрэр щысэтехыпIэу, упчIэжьэгъу къытфэхъоу щыт, псынкIэу сыд фэдэ зэдзэкIынри фызэшIокIы, Саныети джащ фэдэу гъэсагъэ. ЗэгурыIохэу, зэкIырыплъыжьхэзэ Iоф ашIэ.

ЕмтIылъ Нурбый егъэшIэрэ журналистэу ыкIи сурэттехэу «Адыгэ макъэм» Iут. Сыд фэдэ культурнэ ыкIи спорт хъугъэ-шIагъи ащ блигъэкIырэп. Зыгъэ­псэфыгъо мафэ хэгъэкIи, сыхьати имыIэу къыпщэхъу. ЫшIэрэ Iофым къыфэхъу­гъэу, ащ нэмыкIырэ плъапIэ имыIэу мэлажьэ. ИлъэсипшI пчъагъэ хъугъэу я 8-рэ нэкIубгъор ащ ыIапэ къычIэкIы, ари фимыкъоу, нэмыкIхэри еубытых. Ом изытет дэйми, хъугъэ-шIэгъэ пчъагъэ зэтырихьагъэми, машинэ имысми, зыми къыгъэуцурэп — сыд фэдэрэ чIыпIи нэсы, зыфэгъэзэгъэ лъэныкъом къыубытырэ пстэури къетхыхьэ, пчыхьэ кIасэ нэс IофшIапIэм чIэс, шIу ылъэгъурэ IофымкIэ щыI, хьалэлэу фэлажьэ.

Дэрбэ Тимур, Мамырыкъо Нуриет, Хъут Нэфсэт, Iэшъынэ Сусан, Делэкъо Анет, КIарэ Фатим, Шъаукъо Аслъан­гуащ — мыхэм мафэ къэс гъэзетым къихьэрэ къэбархэр аугъоих лъэныкъо зэфэшъхьафхэм афэгъэзагъэхэу.

Мамырыкъо Нуриет титарихъ, титхакIохэр хэти нахь дэгъоу ешIэх, къызщыхъугъэхэ илъэсхэр, мафэхэр къетхыхьэх. Тэ титхакIохэм ямызакъоу, къэралыгъом щызэлъашIэхэрэми, тиреспубликэ епхыгъэ цIыф цIэрыIохэми къатегущыIэ, кIэлэцIыкIу нэкIубгъоу «Тыгъэнэбзыир» егъэхьазыры, ежьми рассказхэр етхых, тинахьыжъ гъэшIуа­гъэхэм ащыщ.

Дэрбэ Тимур илъэс 15-рэ тигъэзет иредактор шъхьаIэу Iоф ышIагъ, сыд фэдэрэ лъэныкъокIи хэшIыкI фызиIэу щыт, лъэпкъ Iофыгъохэм, цIыф зэфыщытыкIэхэм афэгъэхьыгъэ тхыгъэхэр къегъэхьазырых, ащ нэмыкIэу тхакIоу зэрэщытым ихьатыркIэ литературэр зикIасэхэм апае нэкIубгъохэр гъэ­шIэгъо­нэу егъэпсых, иусэхэмкIи къыд­дэгуащэ, итворчествэ зикIасэхэр бэу щыIэх, къытфатхэх ыкIи.

Хъут Нэфсэт тихэбзэгъэуцухэм игъэ­кIотыгъэу Iоф адешIэ, гъэзетым игъусэу илъэсым 3 къыдэкIырэ «Парламент къэбархэр» тхьэпэ плIырыплIэу егъэхьазырых, къэралыгъо программэхэмрэ лъэпкъ проектхэмрэ тиреспубликэ зэрэщыпхыращыхэрэри къетхыхьэ, мэкъу-мэщым ылъэныкъо­кIэ Iофхэм язытет ана­хьэу щыгъуазэхэм ащыщ, лэжьыгъэ Iухыжьыным илъэхъан анахь чанэу тилэжьакIохэм алъыплъэ­хэрэм ягъусэу, район губгъохэр къыкIухьэхэзэ къэбар­хэр къетхыжьых.

Iэшъынэ Сусанэ социальнэ Iофыгъо­хэм, медицинэм, хэгъэгум иухъумакIохэм афэгъэхьыгъэ къэбархэр къегъэхьазырых. Пандемием илъэхъан уз мэхъаджэм узэрэпэуцужьыщтым, ащ зызэриушъомбгъурэм, зэребэнхэрэм афэгъэхьыгъэу бэ къытхыгъэр, джы хэушъхьафыкIыгъэ дзэ операциеу тикъэралыгъо ригъэкIокIырэм, ащ хэлажьэхэрэм, IэпыIэгъоу аугъо­ирэм яхьылIагъэу жъугъэу матхэ, хэгъэгум иухъумакIохэм, лIыгъэ зезыхьагъэхэм афэгъэхьыгъэ къэбархэр еугъоих, тинэкIубгъохэм нэIуасэ шъуащыфешIы.

Делэкъо Анетэ шIэныгъэмрэ гъэсэныгъэмрэ яIофыгъохэм къатегущыIэ, ныбжьыкIэ пэрытэу тиIэхэм нэIуасэ шъуафешIы, гъэсэныгъэм ылъэныкъокIэ республикэм хахъоу иIэхэмкIэ, мыщкIэ шIагъэу щыIэхэмкIэ район зэфэшъхьаф­хэм къарихырэ къэбархэмкIэ къыжъудэгуащэ. Апшъэрэ еджапIэхэми зэпхыныгъэ адыриIэу аужырэ шапхъэхэм адиштэрэ гъэсэныгъэр зэрэзэшIуахырэм лъэплъэ, пстэури къетхыхьэ.

КIарэ Фатимэ хэбзэухъумакIохэм Iоф адешIэ, мы лъэныкъомкIэ хъурэ-шIэрэм гъэзетеджэхэр щегъэгъуазэх, пэшIорыгъэшъ Iофхэу зэрахьанхэ фаехэмкIи къэбархэр егъэхьазырых. Лъэпкъ Iофыгъохэм афэгъэхьыгъэуи бэ къытхырэр, тилъэпкъэгъухэу хэкум къэзыгъэзэжьыгъэхэр щыIэныгъэм зэрэхэгъозэжьхэрэм, къин хэфагъэхэм IэпыIэгъу зэрара­гъэгъотырэм, дин зэгурыIоныгъэм, хьы­кум­хэм яIофшIэн афэгъэхьыгъэу матхэ.

Шъаукъо Аслъангуащэ зекIоным, чIыопсым, тыкъэзыуцухьэрэ дунаим икъэухъумэн афэгъэхьыгъэ къэбархэр къегъэхьазырых, псэупIэ-коммунальнэ хъызмэтым игумэкIыгъохэм яхьылIэгъэ зэдэгущыIэгъухэр ащ фэгъэзэгъэ къулы­къухэм ялIыкIохэм адешIых.

Районхэм ащылажьэхэу, ахэм ащыкъэбархэр къытфэзыгъэхьазырырэ корреспондентхэри тиIэх. ТапэкIэ нахьыбэ хъущтыгъэх — Тэхъутэмыкъое районымкIэ Хъущт Щэбан къытфатхэщтыгъ, ащ фэгъэхьыгъэу тикъыдэкIыгъохэм ащыщ къидгъэхьэгъагъ, Теуцожь районымкIэ — Нэхэе Рэмэзан, илъэс 40-м ехъурэ редакцием Iутыгъ, Адыгеим иапшъэрэ тынэу «Адыгеим и Щытхъузехьэр» къы­лэжьыгъ, ыныбжь илъэс 86-м ехъугъэу зыгъэпсэфыгъом тIысыжьыгъэ. Непэрэ мафэмкIэ Пщыкъэнэ Майе Красногвардейскэ районым щыкъэбархэм тащегъэ­гъуазэ, лъытэныгъэ зыфэтшIырэ тиIоф­шIэгъухэм ащыщ. Ныбэ Анзор Краснодар краим и ТIопсэ район ис, ащ хыIушъо Шапсыгъэ щыпсэурэ тилъэпкъэ­гъухэм ящыIакIэ къетхыхьэ.

Тижурналистхэм къагъэхьазырырэ къэбар пстэури «компьютернэкIэ» тызэ­джэрэ псэуалъэм щызэрагъэуIу. Iэпэрытхыхэр къэзытыхэрэм ятхыгъэхэр хаутыжьых, хэукъоныгъэу пшъэдэкIыжь зыхьырэ секретарьхэм къыхагъэщыгъэ­хэр Нешэ Светланэ, Нэфышъ Светланэ ыкIи Хъымыщ Марзет агъэтэрэзыжьы, мыхэм ежьхэми гу зылъатэжьырэр бэ, нэкIубгъохэр зэхэзыгъэуцохэу Сетэ Фатимэрэ Нэгъой Сафыетрэ аIэкIагъа­хьэх, аужырэхэм яIоф хэшIыкI ин фыряIэу, къафатIупщыгъэхэр зэрагъэпэшых. Шъхьадж ицIыф гъэпсыкIэ, ягукъэкI елъытыгъэу нэкIубгъом итеплъэщтыр зэхагъэуцо ыкIи тIуми еIолIапIэ имыIэу яIофшIэн агъэцакIэ.

Тисурэттехэу Iэшъынэ Аслъан. Журналистхэм къатхырэр мыщ сурэткIэ къегъэшъыпкъэжьы. Илъэсыбэ хъугъэ Iоф зишIэрэр, фотоаппаратыр щыщ хъу­жьыгъэу, сурэтэу тырихыгъэр зыфэдиз­ри къыпчъынэу ымышIэжьырэнкIи хъун. Гъэмэфэ жъоркъым шъоф гопэгъум, кIымэфэ чъыIэм осым зэлъихъыхьэгъэ дунаим ятеплъэхэр нэм гъэзет нэкIубгъохэм къащыкIегъэуцох, хъурэ-шIэрэ зэфэшъхьафхэр нэпэеплъ къытфешIых.

Сурэтэу нэкIубгъохэм арытыщтхэм Iоф адэзышIэхэрэр Ацумыжъ Хьылымрэ Константин Романцовымрэ. Сурэтыр теохы къодыекIэ икъурэп, гъэзетым екIунэуи удэлэжьэжьын фае. Ар дэгъу дэдэу мыхэм къадэхъу, Константин джащ фэдэу урысыбзэкIэ тхыгъэхэр сайтым регъэуцох, телевидениемкIэ къэтынхэр къызэрыхьэрэ нэкIубгъохэу урысыбзэкIэ бэрэскэшхо мафэ къэс гъэзетым идгъэу­цохэрэри къыхеутых.

Шъхьафэу игугъу пшIын тефэ Ацумыжъ Хьылым. Ар Тыр­куем къикIыжьыгъэ тилъэпкъэгъухэм ащыщ. Тисайти, джы икIыгъэ илъэсым ыкIэм къызэIутхыгъэ Телеграм-каналэу «Хэкум ымакъ» зыфиIорэми къарыдгъэ­хьэрэ къэбархэр тыркубзэкIэ ащ зэредзэ­кIых, сурэтхэу гъэзетым къихьэхэрэм урысыбзэкIэ атетхагъэхэр адыгабзэкIэ зэблихъухэзэ лъэпкъ нэшанэр нахь къебэкIэу ешIы, тисоциальнэ нэкIубгъо­хэри ащкIэ къегъэбаих. Сыд фэдэ Iоф фэбгъэзагъэми, зыпарэкIи ымышIышъу­щтэу е игъо имыфэщтэу къыIощтэп, зэхэпхыщт закъор зы — «адэ дэгъуба!».

Мыхэм адэжь къычIэкIырэ нэкIубгъо­хэр занкIэу корректорхэм адэжь макIох. Беджэлды Асе, Гъогъо Зарэ ыкIи КIэмэщ Фатимэ нэкIубгъохэм арыт хьарыф пэпчъ анаIэ тет, ахэр Iэпэрытххэм арагъэ­пшэжьых, пшъэдэкIыжь зыхьырэ секретарьхэм къагъэтэрэзыжьыгъэм тетмэ, хэплъэжьых, ежьхэм яшIэныгъи рахьы­лIэшъ, мытэрэзыныгъэ горэ къыхэкIымэ, зэфахьысыжьы. Мыхэр ары аужырэу гъэтэрэзыжьынхэр зышIыжьыхэрэр, хэутыным фэзыгъэхьазырхэрэр. Щыри цыхьэ зыфэпшIыхэу, хьарыф пэпчъ пшъэдэкIыжь зыхьыхэу щытых.

Гъэзетым къихьаным пае къэбархэр къаугъоинхэу журналистхэр нэзыгъэсыхэрэр Уджыхъу Юрэрэ Шэуджэн Ас­лъанрэ. Республикэм ирайон гъогу пэпчъ дэгъоу ашIэ, зынэмысыгъэхэ псэупIэ щымыIэу пIон плъэкIыщт. Корпоративнэ шIыкIэкIэ къыратхыкIырэ гъэзетхэр къу­лыкъу зэфэшъхьафхэм пчэдыжь къэс анэзыгъэсыхэрэр Шэуджэн Аслъан. Ти­хъызмэт зезыхьэрэр Тыгъужъ Руслъан.

ХъутIыжъ Нусиетрэ Шъхьэлэхъо Светланэрэ бухгалтер IофшIэныр агъэцакIэ, пащэр — Нусиет. ТIуми пшъэдэкIыжь ин ахэлъэу яIоф ыуж итых, зы такъикъи зэщхэу щысхэу уарихьылIэщтэп. Творческэ IофшIэным пылъхэмкIэ ахэм ашIэрэр гурыIогъуай, ау шIуагъэ къызэрихьырэр нафэ — зыпарэкIи лэжьапкIэр гужъуагъэп, игъом нэмыкI пшъэрылъхэри агъэцакIэх.

Редакцием къеблагъэхэрэр апэ зэуа­лIэхэрэр АкIэгъу Фатим. Адыгэ бзылъфыгъэм хэлъын фэе шэн пстэури ащ хэплъэгъощт — зэкIэми шъхьэкIафэ афешIы, лъэшэу гущыIэрэп, щэIэгъэ ин хэлъ, IэпкIэ-лъапкI, зыфэбгъэзэрэ Iоф пстэури еIолIэнчъэу зэшIуехы.

ИкIыгъэ илъэсым ыкIэм редактор шъхьаIэм игуадзэу агъэнэфагъ Тэу Замирэ. ТапэкIэ ар къэралыгъо телерадио­компаниеу «Адыгеим» Iутыгъ, респуб­ликэм имызакъоу, адыгэм идунай IэкIыбыми щызэлъашIэрэ журналист. «Адыгэ макъэм» иныбджэгъушIоу, илъэс пчъагъэм къытфатхэу щытыгъ. Ар гъэзетым къызыкIожьыгъэм къыщыубла­гъэу лъэпкъым фэгъэхьыгъэ тхыгъэхэмкIэ тинэкIубгъохэр лъэшэу къыгъэбаигъэх. Итхыгъэ имытэу макIэ къыдэкIыгъо тиIэу къызыхэкIырэр. Ау ащи изакъоп — гъэ­зетым иилъэси 100 фэгъэхьыгъэу ащ игукъэкIыкIэ ыкIи зэрищэзэ Адыгэ Хасэр тигъусэу хьакIэщхэр мазэм зэ ретэгъэ­кIокIых. «Адыгэ макъэм» ихьакI» зыфи­Iорэ нэкIубгъори къыдегъэкIы, ащ лъэныкъо зэфэшъхьафхэм афэгъэхьыгъэу хьакIэхэр къыригъэблагъэхэзэ ре­дак­цием зэдэгущыIэгъухэр ащыдешIых, тисоциальнэ нэкIубгъохэми къарытэгъа­хьэх.

Непэ редакцием чIэмысхэми, сабый къызпыфагъэхэу ахэм япIун пылъхэу яунэхэм арысхэми ягугъу къышъуфэтшIын. Ахэр — Абрэдж Сэтэнай, Къыкъ Элла, Шъхьэлэхъо Оксан.

Неущырэ мафэ тиIэным пае Iоф цIыкIу щыIэп. Тигъэзет щыIэным, къыдэкIыным, къизытхыкIырэ пстэуми аIэкIэхьаным пстэуми яIахь хашIыхьэ. ТиIофшIэгъухэм зэкIэми гъэхъагъэхэр яIэх. Гъэзетым Iутхэу тхэхэрэм япроцент 90-рэ фэдизыр Адыгеим изаслуженнэ журналистых, нэмыкI тын лъапIэхэри къалэжьыгъэх. Журналист сэнэхьат хэхыгъэм адыгабзэкIэ тиреспубликэ икъоу джыри фырагъаджэхэу пIон плъэ­кIыщтэп. НыбжьыкIэхэм ныдэлъфыбзэр ашIэ къодыемэ, ахэр агъэсэшъущтых тигъэзет Iоф щызышIэхэрэм.

Лъэхъаным къыздихьыгъэхэм ащыщ, къызэрэтIогъагъэу, интернет амалхэр. Ахэм адэлэжьэщт ныбжьыкIэ куп тищыкIагъ, якъыхэхын джырэ уахътэм ыуж тит. IэшIэхэу мы Iофыр сфэIощтэп, сыда зыпIокIэ макIэ къытэуалIэрэр адыгабзэкIэ тхэу. Джы бзитIури зэфэдэу аIэкIэ­лъэу ныбжьыкIэхэр къыхэтэхых — урысыбзэри, адыгабзэри.

Къыхэгъэщыгъэн фае, Адыгеим и ЛIышъхьэу КъумпIыл Мурат тиIофшIэн мэхьанэшхо реты, ынаIэ къыттет зэпыт. Ащ ишыхьат илъэс заулэкIэ тызэкIэ­Iэбэжьмэ тызычIэс унэм гъэцэкIэжьын куухэр зэрэщаригъэшIыгъэхэр, псэолъа­кIэхэр къызIэкIэдгъэхьанхэмкIэ ишIуагъэ къызэрэтигъэкIыгъэр. Мы илъэсым къы­щыублагъэу тилэжьапкIэ зэхатшIэу къы­Iэтыгъ, тимэфэкI ехъулIэу автомобилыкIэ къытфарегъэщэфы, гъэзетым икъы­дэгъэкIынкIэ къытфэфедэщт Iэмэ-псымакIэхэр мыгъи тщэфынхэу мылъку республикэ бюджетым къыхагъэкIыгъ. КъумпIыл Мурат джащ фэдэу пшъэрылъ къыгъэуцугъ гъэзетхэр цIыфхэм икъоу аIэкIэхьанхэм пае почтэм Iофэу датшIэрэр дгъэлъэшынэу. Ащ джырэ уахътэм ыуж тит, гъэзетым ыуасэ агъэмэкIэным, корпоратив шIыкIэкIэ районхэм къыратхыкIыхэрэр аIэкIэгъэхьэгъэнымкIэ шIыкIакIэхэм якъыхэхын зэшIотэхы. АР-м лъэпкъ IофхэмкIэ, тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет и Тхьаматэу Шъхьэлэхъо Аскэр, Урысыем и Почтэ ишъолъыр къутамэ ипащэу Наталья Алифиренкэр тызэгъусэхэу районхэр къэткIухьагъэх, псэупIэхэм япащэхэри къызхэлэжьэгъэ зэхэсыгъо­хэм хэкIыпIэхэм тызэдащылъыхъугъ. Iофхэм кIэухэу афэхъухэрэр нэужым къэтIотэщтых. Мы зэпстэуми тиIофшIэн имэхьанэ, уасэу иIэр къаIэты, типащэхэм тыкъызэхахы.

Къыхэгъэщыгъэн фае, тиреспубликэ щыпсэухэрэм гъэзетыр аIэкIэхьаным пае Адыгеим и Президентыгъэу, зэлъашIэрэ шIушIэзехьакIоу Шъэумэн Хьазрэт кIэтхэгъу пэпчъ къы­хэлажьэ, фэгъэкIотэн зиIэхэм апае экземпляр 500 почтэкIэ къыретхыкIы. Джащ фэдэу сенаторэу Хъопсэрыкъо Мурат, Къэралыгъо Думэм Адыгеир къыщызыгъэлъагъоу Владислав Резник экземпляр 500 зырыз корпоративнэ шIыкIэкIэ къыратхыкIы, хъызмэтшIапIэхэу Мыекъуапэ дэтхэм ащыщхэри къыхэлажьэх, илъэсыбэм кIатхэ икъоджэгъу­хэм апае ЕмтIылъ Зауркъан.

Неущырэ мафэ тиIэным пае тхьапэм тетхагъэри къэтыухъумэзэ хъытыухэм жъугъэу тарыхьан фае, тыбзэ, тихабзэ зядгъэушъомбгъун, лъэпкъым дэхагъэу хэлъыр зэлъядгъэшIэн, ныбжьыкIэ пэрытхэр тигъэзет щытыугъоиных, хъопсапIэу тиIэр — гъэзетым икъутамэхэр IэкIыбми къыщызэIухыгъэнхэр — къыздэдгъэ­хъун! Илъэси 100-р гъунапкъэп.

МэщлIэкъо Саид.