Гъэзетэу «Адыгэ макъэр» къызыдэкIырэр илъэси 100 хъугъэ. Респуб­ликэ тедзэгъу нахьыжъым иапэрэ номер 1923-рэ илъэсым гъэтхапэм и 8-м къы­дэкIыгъ. Гъэзетым ыцIэ пчъа­гъэрэ зэб­лахъугъ: «Адыгэ псэукI», «Гъупчъэ-уат», «Колхоз быракъ» зыфиIорэ цIэхэр ащ иIагъэх.

Хэгъэгу зэошхом илъэхъан «Социалистическэ Адыгеир» Советскэ Союзым игъэзетхэу заом фэгъэхьыгъэ къэбархэр бэу къызэрыхьэхэрэм ащыщыгъ. Нэмыцхэм Адыгеир заштэм, гъэзетым иномерхэм ащыщхэр къалэу Шъачэ къыщыдэкIыгъэх. Журналистыбэмэ Хэгъэгу зэошхом илъэхъан лIыхъужъныгъэшхо зэрахьагъ, ахэм ацIэхэр егъэшIэрэу Адыгеим итарихъ къыхэнагъэх. 1991-рэ илъэсым ищылэ мазэ гъэ­зетым апэдэдэ цIэу иIагъэм — «Адыгэ макъэм» къыфырагъэгъэзэжьыгъ.

Илъэси 100-м къыкIоцI гъэзетым иIофышIэхэм адыгабзэм икъэухъу­мэнкIэ бэ ашIагъэр. Ахэм япшъэрылъ шъхьаIэ — адыгабзэкIэ тхыгъэ къэбар икъухэр цIыфхэм алъыгъэIэсыгъэнхэр хьалэлэу агъэцэкIагъ.

«Адыгэ макъэм» сыдигъуи цIыф зэчыишIухэм Iоф щашIэщтыгъ. Ны­дэлъфыбзэмрэ адыгэ хабзэмрэ зыщагъэлъэпIэрэ чIыпIэу ар ренэу щы­тыгъ. Гъэзетым редакторэу, журналистэу Iоф щызышIагъэхэм ащыщ-хэр нэужым тхэкIо, усэкIо, сурэтышI цIэрыIо, общественнэ IофышIэ хъу­гъэх.

Гъэзетым иIофышIэхэми, журналистикэм иветеранхэми, тедзэгъум икъыдэгъэкIын зыгорэущтэу епхыгъа­гъэхэми псауныгъэ пытэ яIэнэу, акIуачIэ къыкIимычынэу, ятворчествэ зырагъэушъомбгъунэу, шIоу щыIэр къадэхъунэу сафэлъаIо.

Адыгеим ицIыф цIэрыIохэм афэгъэ­хьыгъэ очеркхэр, къэбар зэфэшъхьафхэр, литературнэ эссехэр, рес­пуб­ликэм икультурнэ, испортивнэ щыIэныгъэ фэгъэхьыгъэ техыгъэхэу «Адыгэ макъэм» къихьэхэрэр адыгэ пэпчъ игунэс орэхъух.

АР-м и ЛIышъхьэу КъумпIыл Мурат