Адыгеим ителевидение иIоф­шIэн зыригъэжьагъэр илъэс 30 зыщыхъугъэ мафэм, непэ, Адыгэ Республикэм и ЛIышъ­хьэу КъумпIыл Мурат телерадиокомпанием щыIагъ ыкIи ащ щылажьэхэрэм афэгушIуагъ.

ЛIышъхьэм игъусагъэх Урысыем IофшIэнымкIэ и ЛIыхъу­жъэу, тхакIоу, общественнэ IофышIэшхоу МэщбэшIэ Исхьакъ, Адыгэ Респуб­ликэм и ЛIышъхьэ и Администрациерэ иминистрэхэм я Ка­бинетрэ япащэ игуадзэу Къонэ Заур, Адыгэ Республикэм лъэпкъ Iоф­хэмкIэ, IэкIыб къэралхэм ащы­псэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет итхьаматэу Шъхьэлэхъо Аскэр.

Журналистхэм, режиссерхэм, операторхэм ыкIи техническэ IофышIэхэм закъыфигъазэзэ, республикэм и ЛIышъхьэ теле­къэ­тыным ихэхъоныгъэ ыкIуа­чIэкIэ, ишIэныгъэкIэ, иIэпэIэсэныгъэкIэ зиIахь хэзышIыхьэрэ пэпчъ Iофэу зэшIуихырэм мэхьа­нэ зэриIэр къыхигъэщыгъ. Къэра­лыгъо телевизионнэ ыкIи радио­къэтын компаниеу «Адыгеим» апэрэ Iэшъхьэтетэу иIэгъэ КIэ­рэщэ Аслъанбэч ыкIи телерадио­компанием изэхэщэн зиIахь хэзышIыхьэгъэ пстэуми зэрафэразэр ЛIышъхьэм къыIуагъ.

«Шъуикомандэ инэу IэпэIэсэныгъэ зыхэлъым тиреспубликэ имызакъоу, нэмыкI чIыпIэхэми икъэтынхэм щяплъых ыкIи щя­дэIух. Адыгэхэу нэмыкI къэралхэм ащыпсэухэрэмкIи ащ мэхьанэшхо иI. Мафэ къэс Iофэу жъугъэцакIэрэм ишIуагъэкIэ цIыфхэм гъэпсын IофшIэнымкIэ, уихэгъэгу уфэшъыпкъэн зэрэфаемкIэ щысэшIухэр, къэбар зэфэшъхьафхэр цIыфхэм алъышъогъэIэсых. Республикэм уасэу къыфашIырэм нахь хэхъонымкIи ахэм мэхьэнэ гъэнэфагъэ яI. Адыгеим, ащ икъогъупэ пэпчъ хъугъэ-шIагъэу къащыхъухэрэм, тичIыпIэгъухэм щыIэныгъэ гъогу гъэшIэгъонэу къакIугъэм цIыфхэр ащышъогъэгъуазэх. ТапэкIи сышъуфэлъаIо шъуигъэхъагъэхэм нахь ахэхъонэу, цIыфэу къышъоп­лъыхэрэри нахьыбэ хъунхэу. Ащ пае шъори, шъуитворческэ амал­хэм нахь ахэжъугъэхъон, къэба­рыр алъыгъэIэсыгъэнымкIэ шIы­кIэ-амал гъэшIэгъонхэр къыхэшъухын, технологиякIэхэр жъугъэфедэн, зигъо Iофыгъохэм ягугъу шъушIын фае. Сэ салъэныкъокIэ шъуипроектхэмкIи, кIэщакIо шъузыфэхъурэ IофхэмкIи къыжъудезгъэштэщт», — къыIуагъ КъумпIыл Мурат.

Телерадиокомпаниеу «Адыгеим» ипащэу ЖакIэмыкъо Вячеслав ыкIи телевидением щылажьэхэрэм къаIуагъ республи­кэм и ЛIышъхьэ ренэу ынаIэ къызэратетым пае зэрэфэразэ­хэр ыкIи гухэлъэу яIэхэм ар ащагъэгъозагъ. КъызэраIуагъэмкIэ, адыгабзэкIэ кIэлэцIыкIухэм апае къэтынхэр зэхэщэгъэнхэр япроектыкIэхэм ащыщ. Ащ фэдэ ублапIэм мэхьанэу иIэр КъумпIыл Мурат къыхигъэщыгъ ыкIи зэхэзгъэуцуагъэхэм афэлъэIуагъ гъэхъагъэ хэлъэу проектыр агъэ­цэкIэнэу, цIыфхэми ифэшъошэ уасэ ащ къыфашIынэу. Мы зэ­IукIэгъум хэлэжьэгъэ МэщбэшIэ Исхьакъ къэзэрэугъоигъэхэм къа­фиIотагъ республикэ телевидением изэхэщэн фэгъэхьыгъэ гупшысэр къызыщежьагъэм, ащ игъэцэкIэнкIэ зэшIуахыгъэхэм афэгъэхьыгъэу.

«Адыгэ автоном хэкум ипартийнэ пленумхэм ащыщ горэм а Iофыгъор къыщытIэтыгъагъ. Уахътэ зытешIэм, телевидением изэхэщэн фежьагъэх. Iо хэлъэп, ащ Iофышхо къыпыкIыгъ, шъо­лъы­рымрэ федеральнэ хэбзэ къулыкъухэмрэ бэ зэшIуахы­гъэр», — къыIуагъ МэщбэшIэ Исхьакъ.

Республикэм и ЛIышъхьэ къы­зэриIуагъэмкIэ, телевидением изэхэщэн мэхьанэшхо иIагъ Ады­геим ихэхъоныгъэкIи, цIыфхэм къэбарыр икъоу ыкIи игъом алъыгъэIэсыгъэнымкIи. КъумпIыл Мурат телекомпанием иIофы­шIэхэм япшъэрылъхэр дэгъоу зэрагъэцакIэхэрэм пае зэрафэразэр къыхигъэщыгъ, псауныгъэ пытэ, щыIэкIэшIу яIэнэу, творческэ гъэхъагъэхэр ашIынхэу афиIуагъ. Мыщ дэжьым къэIогъэн фае: телерадиокомпаниеу «Адыгеир» хэгъэгум имедиа-холдинг анахь иным — Урысые къэралыгъо телевизионнэ ыкIи радиокъэтын компанием икъутамэу щыт. Мафэ къэс къэралыгъо бзитIукIэ къэтынхэр, Iофыгъо зэфэшъхьафхэмкIэ экспертхэр къыхагъэлажьэхэзэ зэIукIэгъухэр зэхащэх.