«Зыбзэ зыуджэгъужьырэм янэ еуджэгъужьы» — мы гущыIэхэр зиер лъэпкъым итхакIоу Пэрэныкъо Мурат. А гупшысэм къып­къырыкIызэ гъэзетэу «Адыгэ макъэр» илъэси 100 хъугъэу ныдэлъфыбзэм икъэухъумэн, ихэгъэхъон Iоф дешIэ. Джащ фэдэу лъэпкъ тарихъыр къыриIотыкIынымкIэ, непэрэ мафэм ихъугъэ-шIагъэхэм афэгъэхьыгъэ къэбархэр цIыфхэм аIэкIигъэхьанымкIэ гъэзетым IофшIэнышхо зэшIуехы.

Лъэшэу сыгу къео илъэс къэс сабыйхэу адыгабзэкIэ гущыIэхэрэр нахь макIэ зэрэхъухэрэр. НыбжьыкIэхэр бзэм, хабзэм нахь апэчыжьэ мэхъух. Адыгабзэр зэрамышIэрэм къыхэкIэу гъэзетми еджэшъухэрэп.

Ныдэлъфыбзэр — лъэпкъым игъундж. Адыгэ лъэпкъыр лъыд­гъэкIотэным, хабзэм тетэу сабыйхэр тпIунхэм, хахъо тфэхъу­ным апае тыбзэ къэтыухъумэным тадэлэжьэн фаеу сэлъытэ. А пшъэрылъхэм ягъэцэкIэнкIэ гъэзетым ишIогъэшхо къэкIо.

«Адыгэ макъэр» общественнэ-политическэ гъэзетэу щыт, гъэсэныгъэ-пIуныгъэм изы пкъэу, адыгэбзэ къабзэм ищысэшIу. Республикэм сыд фэдэрэ лъэныкъокIи щыхъурэ зэхъокIыныгъэхэр: гъогухэм яшIын, сымэджэщхэм, культурэм иунэхэм ягъэкIэжьын, еджапIэхэм якъызэIухын, лъэпкъ зэфэшъхьафхэр зэгурыIохэу зэрэзэдэпсэухэрэм якъэгъэлъэгъон — а зэпстэур гъэзет нэкIубгъохэм къарэщы. Республикэм ицIыф пэрытхэу спортымкIэ, IофшIэнымкIэ, егъэджэнымкIэ Адыгеир зыгъэлъэш­хэрэм къатегущыIэ. «Адыгэ макъэм» ижурналистхэм тызхэт уахътэм итарихъ атхы. Тигъэзет тырэгушхо, нэмыкI къэбарлъыгъэIэс амалхэм афэдэу, непэ щыIэныгъэм къыздихьырэ зэхъокIыныгъэхэм адэбакъозэ ыпэкIэ лъэкIуатэ. АдыгабзэкIэ шъолъырым къыщыхаутырэ гъэзет закъоу къэнэжьы. ЛIэшIэгъу зыныбжь хъугъэ гъэзетым имэфэкIкIэ сыгу къыздеIэу сыфэгушIо. ИгъэшIэ гъогу кIыхьэнэу, лъэпкъым бэрэ фэлэжьэнэу, къэбарышIухэр инэкIубгъохэм бэу арытынэу, адыгэ унагъо пэпчъ щагъэлъапIэу, щеджэнхэу фэсэIо! Гъэзетым щылажьэхэрэм ыкIи къыдэзыгъэкIыхэрэм псауныгъэ пытэ, щыIэкIэшIу, гъэшIэ кIыхьэ къарет!