«Лъытэныгъэ зыфэтшIэу республикэ гъэзетэу «Адыгэ ма­къэм» иIофышIэхэр! Гуфэбэныгъэ хэлъэу илъэси 100 шъузэ­рэхъугъэмкIэ сышъуфэгушIо. Тиреспубликэ икъэралыгъо тамыгъэу ыкIи адыгэ культурэм игъэхъэгъэ лъапIэу гъэзетыр щыт. Непэ гъэзетым иIофышIэхэр уахътэм диштэу ыпэкIэ лъэкIуатэх, хъугъэ-шIагъэмэ якуупIэ хэтых, ахэм афэгъэхьыгъэ къэбархэм игъом ыкIи шъыпкъагъэ хэлъэу гъэзетеджэхэр ащагъэгъуазэх. ЗэкIэмэ анахь шъхьаIэр «Адыгэ макъэм» адыгабзэм, шэн-хабзэхэм якъэухъумэн ыкIи яхэгъэхъон иIахьышхо зэрэхишIыхьэрэр ары. Лъытэныгъэ зыфэтшIырэ журналистхэр, гъэзетым иIофы­шIэхэр — зэкIэ ащ икъежьапIэ Iутыгъэхэм, тиреспубликэ къы­щы­хаутыхэрэм анахьыжъэу адыгэ гъэзетыр щыIэ хъунымкIэ зишIуагъэ къэзыгъэкIуагъэхэм тафэраз Iофэу ашIагъэм ыкIи ясэнэхьат зэрэфэшъыпкъагъэхэм апае. Псауныгъэ пытэ, мамыр­ныгъэ, щыIэкIэшIу шъуиIэнэу, УФ-м ыкIи АР-м ащыпсэурэ лъэп­къыбэм зишIуагъэ якIыщт гъэхъагъэхэр IофшIэным щышъушIынхэу сышъуфэлъаIо! Бзылъфыгъэхэм я Дунэе мафэ ехъулIэу «Адыгэ макъэм» ибзылъфыгъэ IофышIэхэм сафэгушIо! Насыпы­шIонхэу, ренэу ныбжьыкIэ зэпытынхэу ыкIи дэхэнхэу афэсэIо!»