ТышъуфэгушIо!
Адыгэ Республикэм лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет игуапэу гъэзетэу «Адыгэ макъэм» иIофышIэхэм афэгушIо ямэфэкIкIэ — тедзэгъур къызыдэкIырэр илъэси 100 зэрэхъурэмкIэ!
Официальнэ тедзэгъоу адыгабзэкIэ республикэм къыщыдэкIырэр мы гъэзет закъор ары. Ныдэлъфыбзэмрэ адыгэ культурэмрэ якъэухъумэн гъэзетыр ишъыпкъэу зыдэлажьэрэр лIэшIэгъу хъугъэ. Республикэм къыщыхъу-къыщышIэхэрэр инэкIубгъохэм игъэкIотыгъэу къызэращигъэлъагъорэм, къэбар зэфэшъхьафхэр цIыфхэм зэраIэкIигъахьэхэрэм адакIоу культурэ-просветительскэ пшъэрылъышхуи ащ егъэцакIэ. Гъэзетым иIофышIэхэм интернет-технологиякIэхэр къызфагъэфедэх. УрысыбзэкIэ, адыгабзэкIэ, тыркубзэкIэ зэгъэфэгъэ материалхэр интернетым рагъахьэхэзэ, нахь чIыпIабэмэ алъыIэсынхэ алъэкIы.
Гъэзетым иIофышIэхэм псауныгъэ пытэ яIэнэу, ятворчествэ зиушъомбгъунэу, Iофэу рахьыжьэрэ пстэуми гъэхъагъэхэр ащашIынэу тафэлъаIо! Гъэзетеджэхэр шъуиIофшIакIэ къызэрэщытхъухэрэр зымыуасэ щыIэп!
Шъхьэлэхъо Аскэр. Адыгэ Республикэм лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет итхьамат.