Адыгеим и ЛIышъхьэу Къум­пIыл Мурат Ростов къэралыгъо эконо­мическэ университетым ипрезидентэу Адам Альбековым IофшIэгъу зэIукIэгъу дыриIагъ. Апшъэрэ гъэсэныгъэмрэ наукэмрэ алъэныкъокIэ язэдэлэжьэныгъэ ахэр тегущыIагъэх, тапэкIи язэфыщытыкIэхэм нахь хэхъо­ныгъэ зэрашIыщтымкIэ пшъэ­рылъхэр агъэнэфагъэх.

ЗэдэгущыIэгъум хэлэжьагъ мы университетым ипрофессорэу Владимир Джуха.

ЗэIукIэгъум иублэгъум республикэм и ЛIышъхьэ Адам Альбековыр Адыгеим къызэрэкIуагъэм пае зэрэфэразэр къыIуагъ, тиреспубликэрэ хэгъэгум и Къыб­лэ иапшъэрэ еджэпIэ пэрытхэм зыкIэ ащыщымрэ илъэсыбэ хъугъэу азыфагу илъ зэпхыныгъэхэр къыхигъэщыгъэх.

«Ростов къэралыгъо экономическэ университетым Адыгеим иэкономикэ икъулыкъу пстэуми апае IэпэIэсэныгъэ зыхэлъ специалистхэр бэу къыгъэхьазырыгъэх: ахэр гъэIорышIакIох, финансистых, юристых, кIэлэегъаджэх, IT-лъэныкъом Iоф щызышIэхэрэр, зекIоным ыкIи нэмыкIхэм япхыгъэ IофшIапIэхэм ащылажьэхэрэр. Сэри а еджапIэр къэсыухыгъ, арышъ, непэрэ зэIукIэгъур лъэшэу сигуапэу щыт», — къыхигъэщыгъ КъумпIыл Мурат.

Ащ нэужым республикэмрэ университетымрэ азыфагу илъ зэдэлэжьэныгъэм илъэныкъо гъэ­нэфагъэхэм атегущыIагъэх. Мыщ къыхеубытэ Адыгеим иэкономикэ ифэныкъоныгъэхэм атегъэпсыхьагъэу студентхэр а университетым щегъэджэгъэнхэр.

Ащ дакIоу республикэм иуниверситетхэмрэ Ростов къэралыгъо экономическэ университетымрэ язэдэлэжьэныгъэ, наукэмкIэ ыкIи гъэсэныгъэмкIэ IофшIэным епхыгъэ опытышIоу яIэ хъугъэмкIэ зэхъожьынхэм мэхьанэшхо зэриIэр къыхагъэщыгъ.

Ростов къэралыгъо экономическэ университетым ипрезидент ыкIи а университетым ипрофессорэу Владимир Джухи Адыгеим ихэхъоныгъэ яIахьышхо зэрэхашIыхьэрэр КъумпIыл Мурат къыхигъэщыгъ ыкIи нэпэеплъ медалэу «Адыгэ Республикэр зызэхащагъэр илъэси 100 хъугъэ» зыфиIорэр ахэм аритыгъ.

Джащ фэдэу Адыгеим и ЛIышъхьэу КъумпIыл Мурат Пшызэ къэралыгъо аграрнэ уни­верситетым иректорэу Александр Трубилиным зэIукIэгъу дыриIагъ. Республикэм иэкономикэ зыфэныкъо кадрэхэу IэпэIэсэныгъэ ин зиIэхэр гъэхьазырыгъэнхэмкIэ, апшъэрэ гъэсэныгъэмрэ наукэмрэ алъэныкъокIэ язэдэлэжьэныгъэ лъыгъэкIотэгъэным, Адыгеимрэ Пшызэ шъолъыррэ яапшъэрэ еджапIэхэм зэдызэхагъэуцогъэ проектхэр пхырыщыгъэнхэмкIэ Iофыгъоу щыIэхэми атегущыIагъэх.

Республикэм и ЛIышъхьэ зэIукIэгъур къызэIуихызэ къызэ­рэхигъэщыгъэмкIэ, Пшызэ къэралыгъо аграрнэ университетыр хэгъэгум иапшъэрэ аграрнэ университет пэрытхэм ахэхьэ, а лъэныкъомкIэ Адыгеим гъусэныгъэ пытэ зыдыриIэхэм ар ащыщ. Илъэсыбэ хъугъэу респуб­ликэм мэкъу-мэщымкIэ а апшъэ­рэ еджапIэм ишIогъэшхо къырегъэкIы, Адыгеим ипредприятиехэм пэрыт научнэ амалхэр ащы­гъэфедэгъэнхэмкIэ ишIуагъэ къегъакIо, проектхэу зэдызэхагъэуцуагъэхэр щыIэныгъэм гъэцэкIагъэ щыхъунхэм иIахь къыхешIыхьэ.

«ТиреспубликэкIэ мэкъу-мэщыр стратегическэ лъэныкъоу ренэу щытыгъ ыкIи къэнэжьы. Ащ псын­кIэу хэхъоныгъэ ешIы, арышъ, агропромышленнэ комплексым ипредприятиехэм Iоф ащызышIэн зылъэкIыщт кадрэ IэпэIасэхэм ренэу тафэныкъу. Пшызэ къэралыгъо аграрнэ университетым специалист дэгъухэр къегъэхьазырых, илъэсыбэ хъугъэу тазыфагу илъ зэдэлэжьэныгъэм джыри нахь зедгъэу­шъомбгъун мурад тиI», — къы­Iуагъ республикэм и ЛIышъ­хьэ.

ХэгъэунэфыкIыгъэн фае: Пшы­зэ къэралыгъо аграрнэ университетым студент мин 15-м ехъу непэкIэ щеджэ, ахэм ащыщэу мин фэдизыр Адыгэ Респуб­ликэм иеджапIэхэм къачIэкIыгъэх. Джащ фэдэу а университетым Адыгеим ишIэныгъэлэжьыбэмэ ащырагъаджэх.

ИкIэухым республикэм и ЛIышъхьэ Адыгеим имэкъу-мэщ ихэхъоныгъэ иIахьышхо зэрэхи­шIыхьэрэм пае Александр Трубилиным зэрэфэразэр къыIуагъ ыкIи нэпэеплъ медалэу «Адыгэ

Республикэр зызэхащагъэр илъэ­си 100 хъугъэ» зыфиIорэр ректорым ритыгъ. АР-м и ЛIышъхьэ ипресс-къулыкъу