ЗыфатIорэр илъэсипшI пчъагъэм Iоф къыддэзышIэгъэ, пшъэдэкIыжь зыхьырэ секре­та­рэу аужырэ лъэхъаным тигъэзет щылэжьэгъэ, лъытэныгъэ зыфэтшIырэ НэпшIэкъуй Заур ары.

1960-рэ илъэсым Мыекъопэ кIэлэ­егъэджэ институтым ыуж Заур «Социалистическэ Адыгеим» къыIухьагъ. Корректорэу ригъэжьэгъагъ, зэдзэкIакIоу, информациемкIэ отделым икорреспондентэу, ащ ипащэуи Iоф ышIагъ. Илъэс пчъагъэхэм лъэпкъ гъэзетым хьалэлэу фэлэжьэгъэ Заур тын зэфэшъхьафыбэ къыфагъэшъошагъ, ыцIэ дахэкIэ раригъэIуагъ.

Заур Iоф дэпшIэнкIэ гъэшIэгъоныгъ, лIы пхъашэу, нэиутэу, цIыфым ыкIыбкIэ тегущыIэныр, зэригъэфэныр имышэнэу ары зэкIэми ар зэрэтшIэрэр, инахьыбэуи лъытэныгъэ фэозыгъэшIырэр. Журналист ныбжьыкIэхэм агъэхьазырыгъэ тхыгъэхэр ащ ратыхэ хъумэ, тIэкIуи щыщынэщтыгъэх, «машIо къагуихыщтыгъ» зэраIоу, аришIын къыгъанэщтыгъэп, ау ащ пае агу ебгъэщтыгъэп, хэти ихэукъоныгъэ гуригъаIощтыгъ гузэбгъагъэ хэмылъэу. ЕтIани Заур шIу тэзыгъэлъэгъущтыгъэр иадыгагъ, гукIэгъушхо зэрэхэлъыр ары. Арэущтэу озыгъэIон зекIокIэ-шIыкIабэ ащ етлъэгъулIагъ, «сыадыгэлI» зыIоу ыбгъэ еожьыхэрэм афэмыдэу, ышIэрэр ыгъэбыракъыщтыгъэп, арэущтэу хэти зекIон фаеу ылъытэщтыгъ. Сэмэркъэу дахэми фэIэпэIэсагъ, ахэм ащыщхэри бэрэ тыгу къэкIыжьых, «Заур зэриIощтыгъэу» тIозэ, иIокIэ-шIыкIэхэр тынэгу къыкIэтэгъэуцожьых.

Тигъэзет имэфэкI пытэу епхыгъэхэм, ар зимэфэкI шъыпкъэу тлъытэхэрэм Заур ащыщ. Гъэзетым Iоф зыщимы­шIэжьырэр илъэс заулэ хъугъэми, игугъу тымышIэу мафэ къыхэкIырэп пIоми хъущт. ТиIофшIэгъугъэ нахьы­жъым тыфэгушIо гъэзетым имэфэкIкIэ, ипсауныгъэ зыпкъ итэу, шIу ылъэгъоу иIэхэм яхъяр адигощын ылъэкIэу илъэ­сыбэрэ ашъхьагъ итынэу тыфэлъаIо.