Къыблэм къыщыдэкIырэ гъэзет нахьыжъ дэдэхэм ащыщэу, тарихъ гъогуонэ кIыхьэ къызэ­пызычыгъэ «Адыгэ макъэм» иапэрэ номер къызы­дэкIыгъэр гъэтхапэм и 8-м илъэси 100 мэхъу.

Ипшъэрылъ шъхьаIэхэм адакIоу ащ лъэпкъым фишIэрэр гъунэнчъ. Адыгабзэр, литературэр, лъэпкъ шэн-хабзэхэр, тарихъыр къызэтегъэнэжьыгъэнхэмкIэ, ахэм хэхъоныгъэ ягъэшIыгъэнымкIэ «Адыгэ макъэм» Iофэу зэшIуихыхэрэм уасэ афэшIыгъуай. Илъэси 100 гъогум урыплъэжьмэ, игъэзетеджэхэм цыхьэрэ уасэрэ къыфашIызэ, адыгэ гъэзетыр зэпыу имыIэу къызэрэдэкIыгъэр нафэ къыпфэхъу. Республикэм иобщественнэ-политикэ, икультурнэ щыIэныгъэ фэгъэхьыгъэ къэбархэр ренэу ащ инэкIубгъохэм къарыхьэщтыгъэх, цIыф гъэшIэгъонхэмрэ шIэныгъэлэжь цIэрыIохэмрэ ягугъу дахэкIэ къышIыщтыгъ, непи джащ фэд.

Уахътэм диштэу зызыужьырэ лъэпкъ гъэзетым кIэу къежьэрэ технологиехэр къызфегъэфедэх, игъэз­ет­еджэхэр къыфэшъыпкъэх. Адыгэ Республикэм имызакъоу, хэгъэгубэми ныбджэгъухэр ащыриIэх.

Гъэзетым ыцIэ пчъагъэрэ зэблахъугъ. Джыдэдэм цIэу иIэр къыгъэшъыпкъэжьызэ, адыгэхэр зэрыс чIынэлъэ пстэуми ымакъэ ащэIу, адыгэ дунаим къыщыхъу-къыщышIэхэрэм ягугъу къешIы. Ар шIукIэ зыфэплъэгъун фаер гъэзетым щылажьэхэрэр ары. Общественнэ щыIэныгъэм исыд фэдэрэ лъэныкъуи зытет шъыпкъэм тетэу къэгъэлъэгъогъэным, цIыф жъугъэхэр зыгъэгумэкIыхэрэм алъыIэсыгъэным, лъэп­къыбзэм икъэухъумэн ыкIи нэмыкI Iофыгъохэми журналистхэр адэшъхьахыхэрэп. Гъэзетым итыщтхэр зэзыгъэфэрэ IофшIэкIо купми ылъэкI къыгъанэрэп.

«Адыгэ макъэмрэ» ащ иIофышIэхэмрэ ягугъу зытшIыгъэкIэ, зэкъош республикищмэ къащыдэкIырэ гъэ­зетхэу «Адыгэ псалъэр» (КъБР), «Черкес хэкур» (КъЩР), «Адыгэ макъэр» (АР) зэгурыIохэу, аIэ зэкIэ­дзагъэу зэрэзэдэлажьэхэрэр къэIогъэн фае. Илъэс 34-рэ хъугъэу мэзищ къэс къызэдыдэдгъэкIырэ те­дзэгъухэм тихэку, лъэпкъым ищыIэкIэ-псэукIэ, ыбзэ, итарихъ, икультурэ япхыгъэ Iофыгъошхохэр къащэтэIэтых. «Тызэкъотмэ — тылъэш!», «ТиблэкIыгъэ зы, тапэкIэ къэтыри зы орэхъу!» зыфиIохэрэм тарыгъуа­зэзэ, тIэ зэкIэдзагъэу тызэдэлажьэ, лъэпкъым фэшIушIэщт Iоф дэгъубэ тапэкIи Тхьэм къыддегъэхъу!

Илъэси 100 фэдиз хъугъэу Къэбэртэе-Бэлъкъа- рым къыщыдэкIырэ, мы аужырэ илъэс 30-м «Адыгэ псалъэ» цIэу зиIэ гъэзетым Iутхэр лъэпкъ гъэзетхэм ялъэгъохэщ хъугъэ «Адыгэ макъэм» ипащэхэм, иIофышIэхэм, гъэзетеджэхэм тышъуфэхъохъу шъуигъэхъа­гъэхэм ахэхъо зэпытынэу, хъярыр къышъобэкIэу шъущыIэнэу, шъуиунагъохэм гупсэфыгъо арылъынэу! Тизэпхыныгъэ нахь орэпыт!

Къош гъэзетэу «Адыгэ псалъэм» иIофышIэхэр.