Гъэзетэу «Адыгэ макъэм» щылажьэхэу лъытэныгъэ зыфэтшIыхэрэр!
ШъуимэфэкIышхокIэ – «Адыгэ макъэм» ыгъэлъэпIэрэ лIэшIэгъу мэфэкIымкIэ тышъуфэгушIо!
Илъэси 100-р — гъэзетым къыкIугъэ гъогуонэ ин дэд! А илъэсхэм къакIоцI гъэзетым ренэу ынаIэ зытыригъэтыгъэр Урысыеми, Адыгэ Республикэми ащыпсэурэ лъэпкъхэм якультурэ бай къэухъумэгъэныр, дунаим тет адыгэхэм ящыIэкIэ-псэукIэ икъоу къэгъэлъэгъогъэныр ары.
Охътэ зэфэшъхьафхэм тедзэгъум зэхъокIыныгъэхэр фэхъузэ къырыкIуагъ. Ау зызымыхъожьэу къэнагъэр къэралыгъоми, обществэми къащыхъурэ Iофыгъохэм гъэзетым ренэу ынаIэ зэратыригъэтыщтыгъэр, гъэзетеджэхэм лъытэныгъэ зэрафишIыщтыгъэр, лъэпкъхэм яшэн-хабзэхэм якъэухъумэн кIочIэшхо зэрэхилъхьэщтыгъэр ары.
IэпэIэсэныгъэшхо зыхэлъ журналистхэр зыщылэжьэрэ тедзэгъукIэ шъуигъэзет ыцIэ Iугъэ. Гъэзетеджэхэм осэшхо къызэрэшъуфашIырэр шъуифэшъошэ шъыпкъэу щыт. Адыгэ лъэпкъым итарихъ икъэухъумэнрэ обществэм ыпашъхьэ къиуцорэ Iофыгъохэр шъыпкъагъэ хэлъэу къэгъэлъэгъогъэнхэмрэ ары гъэзетыр ишъыпкъэу зыуж итыр. Iофым ащ фэдэ екIолIакIэ зэрэфышъуиIэм уасэу къышъуфашIырэм нахь зыкъырегъэIэты.
«Адыгэ макъэм» ия 100-рэ илъэс гъэзетым иIофышIэхэми, гъэзетеджэхэми, штатым хэмыт авторхэми, печатым иветеранхэми ямэфэкIэу щыт.
«Черкес хэкумрэ» «Адыгэ макъэмрэ» лIэшIэгъу зэныбджэгъуныгъэрэ зэдэлэжьэныгъэ пытэрэ зэдытиI. Тизэпхыныгъэ тапэкIи нахь орэпыт! Шъуигъэзет щылэжьэрэ журналистхэм ятворческэ гъэхъагъэхэм тарэгушхо. Ащ фэдэ текIоныгъэхэр Тхьэм нахьыбэ шъуфешI!
ТиIофшIэгъу лъапIэхэр, псауныгъэ пытэ шъуиIэнэу, шъукIуачIэ къыкIимычынэу, творческэ гухахъом шъущымыкIэнэу, шъуикъэлэмыпэ мыуцэкунэу, шъуиIэнатIэкIэ шъулъыкIотэнэу, шъуиунагъохэми, шъуиIофшIапIи мамырныгъэрэ зэгурыIоныгъэрэ арылъынэу тышъуфэлъаIо.
Къош гъэзетэу «Черкес хэкум» иIофышIэхэр.