«Адыгэ макъэм» гъогу шIагъо, гъогу бай къызэринэкIыгъ. ЛIэшIэгъу псаум ипшъэрылъ шъхьаIэ фэшъыпкъэу ар къырэкIо — лъэпкъым итарихъ, иныдэлъфыбзэ, икультурэ яухъумакIу.

«Адыгэ макъэм» щылэжьагъэхэм, мы мафэхэм редакцием Iоф щызышIэхэрэм язакъоп непэ зимэфэкIыр, зэрэадыгэ лъэпкъэу ар зэдырямэфэкI. Мыры лъэпкъым ыцIэ лъагэу зыIэтыгъэ, адыгэр языгъэшIэгъэ титхакIохэм янахьыбэм, шIэныгъэлэжьхэм ащыщыбэм егъэжьапIэ афэхъугъэр, лъапсэ зыщашIыгъэр. IэкIыбым щыIэ тилъэпкъэгъухэм, хы ШIуцIэ Iушъом щыпсэурэ шапсыгъэхэм, ткъош рес­публикэм зэпхыныгъэшIухэр адыриIэх. Узэрыгу- шхон, уасэ зыфэпшIын IофшIэнышхо ащ мафэ къэс ешIэ.

Сэ тилъэпкъ гъэзет ренэу сигъогогъу, къисэтхыкIы, ПенсиехэмкIэ фондым и Къутамэ иотделениеу Адыгэкъалэ дэтым сырипащэ зэхъуми ащ Iоф щызышIэщтыгъэхэри кIэзгъатхэщтыгъэх. Гъэзетым игъэхъагъэхэм, зэхъокIыныгъэу фэхъухэрэм сигуапэу салъэплъэ, ар зыгъэхьазырхэрэм, дэлажьэхэрэм зэкIэми рэзэныгъэ гущыIэхэр апэзгъохы сшIоигъу. Непэ республикэм хэхъоныгъэу ышIыхэрэм, цIыф къызэрыкIохэм ящыIэкIэ-псэукIэ, ныдэлъфыбзэм епхыгъэ гумэкIыгъоу къэуцухэрэм — лъэныкъо пстэуми лъэпкъ гъэзетыр алъэIэсы, ар лъэхъаным игъундж.

Лъэпкъым иныдэлъфыбзэкIэ къыдэкIырэ гъэзет закъоу тиIэм адыгэм ымакъэ лIэшIэгъу хъугъэу егъэIу, ащ ыцIэ къегъэшъыпкъэжьы. Редакцием илъэс пчъагъэм щылэжьэгъэ, ар зыгъэдэхэгъэ, зыгъэпытэгъэ журналист нахьыжъхэу непэ мыщ Iумытыжьхэми, мы мафэхэм ахэм яIофшIэн мы­псынкIэ лъызыгъэкIуатэхэу, акIуачIи, яшIэныгъи лъэпкъ гъэзетым фэзыгъэлажьэхэрэм сафэлъаIо псауныгъэ пытэ яIэнэу, ялъэпкъ шIулъэгъу мыкIосэнэу, гъэхъэгъэшIухэр ашIызэ джыри илъэсыбэрэ тигупсэ республикэ, адыгэ лъэпкъым афэлэжьэнхэу.

Мыгу Адам. АР-м и Къэралыгъо Совет — Хасэм идепутат, законодательствэмкIэ, законностымкIэ, чIыпIэ зыгъэIорышIэжьынымкIэ комитетым ипащэ игуадз.