Аужырэ илъэс 15-м гъэзетэу «Адыгэ макъэм» редактор шъхьаIэу иIагъэр Дэрбэ Тимур.

Илъэс 33-рэ ныIэп ащ ыныбжьыгъэр загъэнафэм. Тхэн, журналист Iофым хэшIыкI афыримыIэу щытыгъэп нахь мышIэми, пэщэ IэнатIэм лъэныкъуабэ къызэлъеубыты. Охътэ гъэнэфагъэм къыкIоцI а зэпстэури ыIэ къыригъэхьан ылъэкIыгъ.

— Апэрэ мафэм къыщегъэ­жьагъэу лъэпкъ гъэзетыр къызэрэсыухъумэщтым сыпылъыгъ, — къеIуатэ Дэрбэ Тимур. —Непэ цIыфхэм анэгу кIэты- ным, гъэзетыр зэрэщыIэр, ыма­къэ зэрэIурэр зэхядгъэхыным афэшI коллективыр сигъусэу Iоф­тхьэбзэ зэфэшъхьафхэр зэ­хатщэщтыгъэх. Ахэм зэу ащыщ тиартист цIэрыIохэр зыхэлэ­жьэрэ концертышхохэр зэрэ­редгъэкIокIыщтыгъэхэр.

Лъэхъанэу тызыхэтым гъэзетыр дэбэкъоным пае сайтэу агъэпсыгъэм бзиплIыкIэ тхы­гъэ­хэр къыщыхаутыным редакторэу зытетым аублагъ — адыгабзэ­кIэ, урысыбзэкIэ, тыркубзэкIэ ыкIи арапыбзэкIэ (арапыбзэр нэужым хагъэкIыжьыгъ). Тилъэп­къэгъухэу IэкIыб къэралыгъохэм ащыпсэухэрэм яхэку щыхъу­рэ-щышIэрэм щыгъозэнхэм ар фэIорышIэ.

— Анахь пшъэрылъ шъхьаIэу сыдигъокIи гъэзетым иIэр щыIэныгъэм непэ щыхъурэ-щышIэрэм цIыфхэр щыгъэгъозэгъэнхэм, лъэныкъо зэфэшъхьафхэмкIэ гъэхъагъэу республикэм, къэра­лыгъошхоу тызыщыпсэурэм ямызакъоу, лъэпкъым итарихъ гъогуи, гумэкIыгъоу къэуцухэрэми, ахэм язэшIохынкIэ къэралыгъом ышIэрэр журналистхэм къыраIотыкIыныр ары. ЦIыф къызэрыкIоу шъофым щыла­жьэ­рэм къыщегъэжьагъэу культу­рэм, спортым, экономикэм, нэ­мыкI лъэныкъохэмкIи цIэ­ры­Iохэу, гъэхъэгъэшIу зиIэхэр гъэ­зет нэ­кIубгъохэм нахьыбэрэ къарагъэхьанхэм сынаIэ тетыгъ. Ащ пытэу готэу адыгэ шэн-­хабзэхэм, зэхэтыкIэхэм, бзэм иIофыгъохэм якъэухъумэн сыпылъыгъ. Джыри ар чанэу лъа­гъэкIуатэ, — хигъэунэфыкIыгъ Т. Дэрбэм. Редакциер зычIэт унэр къа­лэм дэт псэолъэшIыгъэхэм ана­хьыжъ дэдэхэм зэращыщым къыхэкIэу кабинетхэм язытет дэгъум пэчыжьагъ. Тимур Iэна­тIэм тетызэ а Iофыгъор дэгъэзыжьыгъэ хъугъэ. АР-м и ЛIы­шъхьэу КъумпIыл Мурат редакцием гъэцэкIэжьынышхо зэ­рищыкIагъэр зыреIом, лъэIур къы­фигъэцэкIагъ. Джы редакцием Iутхэм гуIэтыпIэу, кабинет къабзэхэм арысхэу Iоф ашIэ.

Къыхэзгъэщымэ сшIоигъу, коллективыр бгъэIорышIэныр зэрэмыпсынкIэр. А лъэныкъори Тимур Iоф ешIэфэ къыдэхъугъ. Редакцием бырсыр чIэлъэу, зэгурымыIоныгъэ тыхэтэу зыкIи хъугъэп. Апэрэ мафэм къыщегъэжьагъэу тиныбджэгъушIоу къытхэтыгъ, нэбгырэ пэпчъ игу­мэкIыгъо дигощыгъ. Ащ фэдэ шIогъабэ иI. Гъэзетым иIофшIэн къыфэдгъэзэжьымэ, мыр — куп Iоф­шIэн, ар зыIукIэщтхэм агу ри­хьыным, неущи ащ къежэнхэм, ашIогъэшIэгъоныным мафэ къэс тыдэлажьэ. Нэбгырэ пэпчъ къы­гурэIо тигъэзет лъэпкъымкIэ, ныдэлъфыбзэм икъэухъумэнкIэ мэхьанэу иIэр.

— Адрэ гъэзетэу республи­кэм къыщыдэкIыхэрэм «Адыгэ макъэр» ябгъапшэмэ, апэ ­имыт­мэ, ауж къинэрэп, — еIо Дэрбэ Тимур. — Сыд фэдэрэ къэбарыкIи, Iофыгъуи журналистхэм зэу къапхъуатэ. Сэ сшъхьэкIэ гъэзетым ишIогъабэ къысэкIыгъ бзэр нахь куоу сшIэнымкIэ, гущыIэ гъэшIэгъоныбэхэр згъэфедэнымкIэ, сижабзэ нахь бай хъунымкIэ.

Гъэзетэу «Адыгэ макъэр» илъэси 100 зэрэхъурэмкIэ непэ щылажьэхэрэм ыгу къыдеIэу Тимур афэгушIо, псауныгъэ яIэу, ягъэхъагъэхэм ахагъахъоу, ягу­хэлъышIухэр къадэхъоу илъэсыбэрэ псэунхэу афэлъаIо. Джащ фэдэу апэрэ мафэхэм къащегъэжьагъэу редакцием щылэжьагъэхэу дунаим ехыжьыгъэхэми, псаоу щыIэхэми гъэзетым иуцун яIахьышIу зэрэхэлъыр, ахэм ацIэ тарихъым зэрэхэхьагъэр, тщыгъупшэ зэрэмыхъущтыр хигъэунэфыкIыгъ.

 Iэшъынэ Сусан.