Джыдэдэм УФ-м и Социальнэ фонд и Къута­мэу АР-м щыIэм ипащэ игуадзэу ПIатIыкъо Аслъан 2005-рэ илъэсым тыгъэгъазэм ыкIэхэм адэжь республикэ гъэзетэу «Адыгэ макъэм» иредактор шъхьаIэу агъэнафи, 2007-рэ илъэсым имэзае нэс а Iэна­тIэр ыгъэцэкIагъ.

Уахътэу зэрэщылэжьагъэр мыбэми, редакцием изытет нахьышIум ылъэныкъокIэ зызэрихъокIыным, итехническэ зытет хэхъоныгъэ ышIыным ынаIэ тетыгъ. А мафэхэу гъэзетым щигъэкIуагъэхэр шIукIэ ыгу къинагъэх.

— «Адыгэ макъэм» илъэсым ехъоу Iоф зыщысшIагъэм си­гъэразэу сигушъхьэбаиныгъэкIэ хэхъоныгъэшхо сигъэшIыгъ, — къеIуатэ ПIатIыкъо Аслъан. — IофшIэным еплъыкIэ гъэнэфагъэхэр фысиIэу сыкъэкIо­гъагъ. Ау редакцием чIэлъ Iоф­­шIакIэр, гъэпсыкIэр зысэлъэ-гъум нэмыкI лъэныкъуабэхэмкIэ сиеплъыкIэхэр зэблэсхъужьы­гъэх. Гъэзетыр адрэ къэбар жъу­гъэм иамал пстэуми афэдэп. ГущыIэу къихьэрэ пэпчъ уахътэ тешIагъэми, цIыфым ыпашъхьэ илъэу зэрегъэзафэ, бзэм икъэбзагъэ уасэ фешIы. Арышъ, гъэзетым икъыдэгъэкIын мэхьанэшхо иI, ащ ухэу­къонэу щытэп.

Аслъан иIофшIэгъу уахътэ редакцием щылэжьагъэхэр, щы­мыIэжьхэм Тхьэм джэнэт къарет, шIукIэ ыгу къэкIыжьых. Гъэзет гъэпсыкIэм шIыкIэ-ама­лэу иIэхэр къыIэкIэхьанхэмкIэ яшIогъэшхо къызэрэкIуагъэр къыхегъэщы. Ежь редактор шъхьаIэу щытыгъ нахь мышIэми, адрэ отделхэм, техническэ IофышIэхэм анэсыжьэу яIофшIэн зыщигъэгъуазэщтыгъ.

ПIатIыкъо Аслъан зэрэхигъэу­нэфыкIыгъэмкIэ, «Адыгэ ма­къэм» илъэси 100 гъогу дахэ къыкIугъ, тарихъ бай иIэ хъугъэ. А илъэс пчъагъэхэм къакIоцI гъэзетым итеплъи, игъэпсыкIи бэрэ зэблэхъугъ. Ау апэрэ ма­фэм къыщегъэжьагъэу илъэси 100 охъуфэ зэхэтыкIэ дахэу тинахьыжъхэм щагъэпсыгъэр джы ныбжьыкIэхэм лъагъэ­кIуатэ.

— Гъэзетым пэщэ ныбжьыкIэ­хэр иIэ хъугъэшъ, шIыкIакIэхэр къыздахьынхэу, ягъэхъагъэхэр нахьыбэ хъунхэу сафэлъаIо. Гъэзетыр цIыфхэм шIу языгъэлъэгъурэр, ашIогъэшIэгъонынэу зыгъэпсыхэрэр непэ щыла­жьэ­хэрэр арышъ, ахэм якъэлэмыпэ мыуцэкоу, ягукъыдэчъ къыкIимычэу бэрэ щыIэнхэу афэсэIо. «Адыгэ макъэм» итираж хахъоу, адыгэ унагъо пэпчъ иунэ ихьэзэ, джыри илъэсишъэ къыдэрэкI! — къыIуагъ ПIатIыкъо Аслъан.  Iэшъынэ Сусан.