Адыгэм ымакъэу къэрэн
АР-м иобщественнэ зэхахьэу «Адыгэ Хасэм» ихэсашъхьэрэ итхьаматэу ЛIымыщэкъо Рэмэзанрэ: «Лъэпкъ гъэзетэу «Адыгэ макъэр» илъэси 100 зэрэхъугъэм пае тыфэгушIо!
Лъэхъанхэр зэхъокIых, уахътэр макIо, лIэужхэм зызэблахъу, щыIэкIэ-псэукIэр ыпэкIэ лъэкIуатэ, технологие зэфэшъхьафхэр къежьэх. Ау «Адыгэ макъэр» лIэшIэгъу хъугъэу лъэпкъым ымакъэу къэнэжьы. Адыгэ хэкум тилъэпкъ гъэзет илэгъу. Хэку гъэпсыкIэ тиIэ зэрэхъугъэм къыкIэлъыкIоу тиныдэлъфыбзэкIэ къыдэкIырэ гъэзетри къыхаутынэу рагъэжьагъ. Адыгэ Республикэм икъэралыгъо гъэпсыкIэ иилъэси 100 гъэрекIо игъэкIотыгъэу дгъэмэфэкIыгъ. Джы мыгъэ «Адыгэ макъэм» иилъэси 100 хэтэгъэунэфыкIы. Республикэ гъэпсыкIэ тиIэ зыщыхъугъэм тефэу Адыгэ Хасэр зэхащэжьыгъ. Ащ щыублагъэу хасэмрэ гъэзетымрэ зэпхыныгъэ пытэ зэдытиI. Типшъэрылъхэри зэтефэх: лъэпкъым ихэхъоныгъэхэм тафэлэжьэнэу, тиныдэлъфыбзэ тыухъумэнэу, титарихъ тIотэнэу, тикультурэ лъагэу тIэтынэу, тиныбжьыкIэхэр шэн-хэбзэшIухэм атетэу тпIунхэу. «Адыгэ макъэм» мы зэкIэри егъэцакIэ, адыгабзэм иухъумакIу, тарихъыр инэкIубгъохэм къащыхеуты, лъэпкъым ицIыф пэрытхэм якъэбар еIуатэ, итхыгъэхэмкIэ хэкурысхэми, хэхэс адыгэхэми алъэIэсы. Тилъэпкъ сыд къехъулIагъэми, къырыкIуагъэми, гъэзетым ар дегощы, деIэты.
Адыгэ лъэпкъым фэлэжьэгъэ шIэныгъэлэжь цIэрыIохэр, тхэкIошхохэр, общественнэ ыкIи хэбзэ IофышIэхэр ащ къычIэкIыгъэх. ЫпэкIэ Iутыгъэ нахьыжъхэм шэн-хэбзэшIухэу рагъэжьагъэхэр непэ Iоф щызэшIэхэрэм лъагъэкIуатэх, ахэм хащыгъэ гъогум тетхэу гъэзетыр ашIы, щытхъур къалэжьы. Тэ ащ тырэгушхо!
Лъэпкъ гъэзетэу «Адыгэ макъэр» джыри лIэшIэгъу пчъагъэхэм апхырыкIынышъ, лъэпкъым ымакъэу щытынэу тыфэлъаIо. Псауныгъэ пытэ яIэнэу, хъярыр къябэкIынэу, яунагъохэм гушIуагъорэ бэрэчэтрэ арылъынэу, яIофшIэн гухахъо хагъотэнэу гъэзетым щылажьэхэрэм тафэлъаIо».