Cэ апэ сшIырэ лъэпкъ IофыгъуитIумкIи «Адыгэ макъэм» сыфэраз. Хэхэсымрэ хэкумрэ нэпкъитIум атедзэгъэ лъэпкъ лъэмыдж. Хэхэсымрэ хэкурысымрэ зэлъегъэIэсых, зэфещэх, зэIуегъэкIэжьых. ИIашэри лъэпкъыбзэр, ныдэлъфыбзэр ары. Джыры пIонышъ, Телеграм нэкIубгъуи иIэ хъугъэшъ, лъэп­къым къыфихьыщт шIур гъунэнчъ.

ТиусэкIо-тхэкIошхохэм а еджапIэр зэракIугъэми сыщыгъуаз. Арышъ, тигъэзэт ымакъэ хэхэсымрэ хэкумрэ амакъэхэр зэлъигъэIэсхэу, лъэпкъыр опсэуфэ дэпсэунэу фэсэIо. Щылэжьэрэ лъэпкъыпсэхэри зэуалIэхэрэм къамыгъэукIытэжьхэу, къащыгугъырэм пагъохын зэрагъотылIэжьэу, зыхахырэм хэмыхъомэ, хэмыкIэу, япсауныгъэ къыкIимычэу, ябынхэм адатхъэхэу, зыфэпсэухэрэ лъэпкъым гулъытэ къа­фишIэу, гулъы­тэм гухахъо хагъуатэу, лъэпкъымкIэ джыри бэрэ, бэрэ къытфэпсэунхэу сафэлъаIо.

МэщфэшIу Нэдждэт, Дунэе Адыгэ Хасэм и Хэсашъхьэ хэт.