Урысыем IофшIэнымкIэ и ЛIы­хъужъэу, Адыгэ, Къэбэртэе-Бэлъкъар, Къэрэщэе-Щэрджэс республикэхэм ялъэпкъ тхакIоу МэщбэшIэ Исхьакъ гъэзетым Iоф зэрэщишIагъэм фэ­гъэхьыгъэу игукъэкIыжьхэм ащыщхэм тащигъэгъозагъ:

— «Адыгэ макъэм» илъэси 5-рэ Iоф щысшIагъ. Сиапэрэ усэ 1949-рэ илъэсым гъэзетым къыхиутыгъагъ. Iоф щысшIэнэу сызаштэм районхэр бэу къэткIухьэщтыгъ. Хахъоу тиIэхэм афэдэу мыхъурэ горэхэри къэттхыщтыгъэ. АщкIэ жанрэ зэфэшъхьафхэр дгъэфедэ­щтыгъэх. Партийнэ органхэми гъунэ къытлъафыщтыгъэ. Ащ фэдэ уахътэу щытыгъ. ТыныбжьыкIагъ, Iофым тыфаблэщтыгъ. Мафэ горэм Дыхъу Муратрэ ПIэтIыуащэмрэ, Къуныжъ Мыхьамэти отделым Iоф щыдэсшIагъ, тызэдэкIо­гъагъ командировкэ нэкIубгъо горэ къэтшIынэу. ПIэтIыуащэр комсомол IофышIэу щы­тыгъ, тыздэкIуагъэмэ якабинетхэр къыкIухьагъэх, заIуигъэкIагъ, упчIэ горэхэр аритыгъ. Сэ тхылъеджапIэм, клубым сы­кIуагъ — культурэм фэгъэхьыгъэу сыугъоягъ. ПсынкIэу сиIоф къэсыухыгъ. Машинэм сяжэу сисыгъ. КъызэкIожьхэм «Адэ, кIалэр, ущыса джыри?» — къысэупчIыгъэх. Сэри сищыкIагъэмэ сызэраIукIагъэр ясIуагъ. ТыкъызэкIожьым, чэщым зэкIэ къэстхыжьыгъ ыкIи къыкIэ­лъыкIорэ мафэм хьазырэу Андырхъуаем, редактор шъхьаIэм, естыгъ. Ар къыздэкIуагъэхэм агъэшIэгъогъагъ. Титхьаматэу Андырхъое Джантэмыр узэфэгубжэу ыдэщтыгъэп, тызэригъэшIущтыгъ, сыд аIуагъэми, рэхьатэу Iофхэр къызэхифыщтыгъ. Нахь цIыфышIу дунаим теслъэгъуагъэп. Джащ фэдэу Iоф зэдатшIэщтыгъ. Охътэ гъэшIэгъоныгъ, адыгэ тхэкIуабэ гъэзетым пхырыкIыгъ. Ахэм ащыщых: КIэрэщэ Тембот, Жэнэ Къырымыз, Къуекъо Налбый, Iэшъынэ Хьаз­рэт, нэмыкIхэри. ЯшIогъэшхо халъхьагъ Шъоджэ Мыхьамчэрые, Хъуажъ Ис­ма­хьи­лэ, Бэджэнэ Иляс, Аулъэ Сарэ, Тхьар­къохъо Юныс. Гъэзет журналисти­кэр телевидениеми, радиоми атекIы, литературэм публицистикэр бэу хэт. ИшIогъэшхо къысэкIыгъ гъэзетым сызэ­рэIутыгъэр — гущыIэр епсыхьэ, псынкIэу Iоф пшIэным урегъасэ.

Непэ гъэзетыр уахътэм диштэу зэ­рэшъушIырэм гу лъымытэнэу щытэп. Хъугъэ-шIагъэхэр, ащ декIужьэу, нэ-ры­лъэгъу хъунэу, сурэтхэри нахьыбэу къи­жъугъахьэхэ хъугъэ. Тэ тилъэхъан макIэ хагъэуцощтыгъэр, джы респуб­ликэм щыхъурэ-щышIэрэр нэм къыкIэшъогъэуцо. Ти ЛIышъхьэ къызэриIуа­гъэу, цIыфхэм ашIэрэм дахэу игугъу къэпшIын фае. Гъэхъагъэу ашIырэм шъолъырыр ыпэкIэ лъегъэкIуатэ.

Тэу Замир.