Джащ фэдэу ары бэмэ зэра­шIэрэр, тэри, иIофшIэгъугъэхэмкIэ, игу­гъу зэ­рэтшIырэр тижурналист нахьыжъхэм ащыщэу, илъэс 50 Iэпэ-цыпэм ыкIуачIи, ишIэныгъи лъэпкъ гъэзетым фэзыгъэлэжьагъэу, ащ икъыдэгъэ­кIыни, икIэгъэтхэни зиIахьышIу ренэу хэлъыгъэ Нэхэе Рэмэзан.

Илъэс заулэ хъугъэ Рэмэзан ре­дакцием зыIукIыжьыгъэр, ау тиIофхэм язытет къыкIэупчIэ, зы мэфэкI гори блимыгъэкIэу къытфэгушIо, загъори тегъэукIытэжьы тэ къыттенэрэр зыдэтшIэжьызэ. Рэмэзан 1935-рэ илъэсым къуаджэу Джэджэхьаблэ къыщыхъугъ. ЕджапIэм, дзэ къулыкъум ауж Теуцожь, нэужым Брюховецкэ район гъэзетхэм ащылэ­жьагъ, Пшызэ мэкъумэщ институтыр, ащ иаспирантурэ къыухыгъэх, IэнэтIэ зэфэшъхьафхэм аIутыгъ. «Адыгэ ма­къэм» 1973-рэ илъэсыр ары къызыIу­хьагъэр. Апэ мэкъу-мэщымкIэ отделым IофшIэныр щиублагъ, нэужым республикэ гъэзетым Теуцожь районымрэ Адыгэ­къалэрэкIэ исобкорэу щытыгъ, зигъэ­псэфынэу мэтIысыжьыфэ ар щытхъу хэлъэу ыгъэцэкIагъ.

Нахь благъэу сэ Рэмэзанэ сшIэнэу зыхъугъэр итхыгъэхэр хэутыным фэзгъэхьазырынхэу пшъэрылъ къызысфа­шIыр ары. Ащ ыпэкIэ слъэгъугъэу, синэIуасэу щытыгъэп, ау редакцием бэрэ игугъу зэрэщашIырэр, адырэ собкорхэм ялъытыгъэмэ, ыцIэ ренэу тхьа­кIумэм зэритыщтыгъэр, анахьэу журналист анахьыжъэу тхэтыгъэ ЛIэхъусэжъ Хьаджэрэтбый «Нэхаим къыгъэхьыгъ», «Нэхаир къэкIуагъ» ыIозэ зэримыгъэгъуащэщтыгъэр, пстэуми къызэрахигъэщыщтыгъэр згъэшIагъощтыгъ. Нэужым къызгурыIуагъ ахэр зэныбджэгъушхохэу зэрэщытыгъэхэр. Рэмэзанэ итхыгъэ горэ къимыхьэу номер къыдэмыкIыщтыгъэу къыпщыхъущтыгъ, джащ фэдизэу хъуп­хъагъэ.

Районышхомрэ Адыгэкъалэ хэхьэрэ псэупIэхэмрэ зыгорэ ащамыгъэхъыерэм фэдагъ. Рэмэзанэ рамыгъэблагъэу, ар хэмылажьэу, ары къэс мэфэ лые тыримыгъашIэу ахэм афэгъэхьыгъэ тхыгъэ редакцием къыгъэхьыщтыгъ. Анахь соб­кор чан «Адыгэ макъэм» имыIагъэу сIоми хэукъоныгъэ хъущтэп сшIошIы.

ЦIыф хэхьэкIэ-хэкIыкIэм, адыгэ шэн­хабзэхэм арыгъуазэзэ зищыIэныгъэ къэзыхьыгъэ Рэмэзан зыщыпсэурэ районым имызакъоу, республикэм ичIыпIэ зэфэшъхьафхэм, Краснодари ащашIэ, иIофшIэн епхыгъэу е ныбджэгъу зэфыщытыкIэхэм апкъ къикIэу зынэмысыгъэ къэмынагъэм фэд. ТыдэкIэ зигъэзагъэми, ныбджэгъубэ, нэIосабэ иI, лъытэныгъэшхо къыфашIы.

Рэмэзан игупсэхэм, иIахьылхэм ренэу гъунэ алъефы, хэти ищыкIагъэр елъэгъу, амал зэриIэкIэ пстэуми алъэIэсы. ИшIу­шIагъэ ащ игъогу егъэдахэ, егъэбаи.

Журналист IэпэIасэм иIофшIакIэ рес­публикэм ипащэхэм осэшIу къыфашIыгъ — тын лъапIэу «Адыгеим и Щытхъузехь» зыфиIорэр ащ къыфагъэшъошагъ, щытхъу ыкIи рэзэныгъэ тхылъэу иIэр къэпчъыгъуай. Адыгэ Республикэм изаслуженнэ журналист, Урысыем ижурналистхэм я Союз хэт. Мыщ дэжьым сигуапэу къы­хэзгъэщы сшIоигъу Рэмэзанэ медалэу «Адыгеим и Щытхъузехь» зыфиIорэр къызэрэфагъэшъошагъэм ыкIи июбилей атефэу ащ фэгъэхьыгъэ тхыгъэ тигъэзет къызисэгъахьэм бэмэ ар Нэхаим къы­лэжьыгъэ шъыпкъэу, епэсыгъэу аIозэ редакцием къызэрэтеощтыгъэхэр. Арэущтэу цIыфмэ уагъэлъэпIэныр зымыуасэ щыIэп.

Илъэс 50 фэдизрэ Iоф зыщишIэгъэ лъэпкъ гъэзетым имэфэкI ехъулIэу лъы­тэ­ныгъэ зыфэтшIырэ Рэмэзан тыфэгушIо ежьыри ар имэфэкIэу тэлъытэмэ, ипсау­ныгъэ зыпкъ итэу, шIу ылъэгъоу иIэхэм яхъяр адигощын ылъэкIэу джыри илъэсыбэрэ ашъхьагъ итынэу тыфэлъаIо.

ЖакIэмыкъо Аминэт.