«Адыгэ макъэр» — лъэпкъым ымакъ. Ащ ущы­лэжьэныр пстэуми къа­дэхъурэп. Лъэпкъ гъэзетым къыIухьи, бэрэ Iумытэу IукIыжьыгъэр мэкIэ дэд, на­хьыбэхэм ар псэм фэдэу, насыпыгъэу зыфалъэ­гъужьы. Джарэущтэу зылъы­тэхэрэм ащыщ 2002-рэ илъэсым рес­публикэ гъэзетэу «Адыгэ макъэм» иредактор шъхьа­Iэу агъэнафи, 2005-рэ илъэсым нэс а IэнатIэр зы­гъэцэкIэгъэ Бэгъушъэ Азэмат.

— СицIыкIугъом къыщегъэ­жьагъэу сикIасэу «Адыгэ ма­къэм» седжэщтыгъ, — къеIуатэ А. Бэгъушъэм. — Ренэу сянэ-сятэхэм къыратхыкIы­щтыгъ. Адыгэ тхэкIо цIэрыIохэм атхыгъэхэр тхылъэу къыдамыгъэкIызэ, пычыгъо-пычыгъоу гъэзетым къыщыхаутыщтыгъ. Ахэм сяджэщтыгъэти, гъэзетыр къахьыфэ сшIуабэ дашIэу сежэщтыгъ. ЗэрэхъурэмкIэ, «Адыгэ макъэм» адыгэ литературэр шIу сигъэлъэгъугъ. А лъэхъаным ащ Iоф щысшIэныр, ары пакIошъ, гъэзетым иредактор шъхьаIэу сагъэнэфэныр егъашIи сшIэ­ныеп. Ащ сызэрэщылэжьагъэр насыпыгъэу зыфэсэлъэгъужьы.

Бэгъушъэ Азэмат редакцием къызыкIогъэ апэрэ мафэхэм къащегъэжьагъэу ныбжьыкIэхэм яIофшIэн зэрэзэхэщагъэм ынаIэ тыридзагъ. Ахэр зы кIуачIэу зэхиугъуаехи, къэбарыкIэхэр, республикэм щыхъурэ­-щышIэ­хэрэр псынкIэу гъэзет нэкIубгъохэм къызэрэщыхаутыщтхэм лъэшэу пылъыгъ. ИшэнкIэ цIыф рэхьатэу, шъабэу гущыIэу, ау ыIорэм мэхьанэ куу хэлъэу Iоф къыддишIагъ.

— Илъэси 100-м къыкIоцI «Адыгэ макъэм» зэлъашIэрэ тхакIохэу адыгэ литературэм лъапсэ фэзышIыгъэхэм къа­щыублагъэу цIыфыбэмэ Iоф щашIагъ, — еIо Азэмат. — А уахътэм къыкIоцI гъэзетым бзэм хэхъоныгъэ ышIынымкIэ гъэ­хъэгъэшIухэр ышIыгъэх. Непэ къызнэсыгъэм адыгабзэр лъызыгъэкIуатэрэр, къэзыухъумэрэр лъэпкъ гъэзетыр ары. Сыда пIомэ гущыIэ хэутыгъэр кIуачIэ. Ащ дакIоу, «культура» зыфаIорэ гущыIэм имэхьанэ къыубытырэ пстэури мы гъэзетым епхыгъ. Арышъ, лъэпкъыр опсэуфэ «Адыгэ макъэр» щэрэI, ымакъэ жъынчэу тыди щэрэIу!

 Iэшъынэ Сусан.