Адыгеим и ЛIышъхьэ Урысые Федерацием изаслуженнэ псэолъэшIэу Тутарыщ Батырбый зэIукIэгъу дыриIагъ. Псэо­лъэшIыным республикэм хэхъоныгъэу щишIырэм ахэр тегущыIагъэх.

«Илъэсым икIэуххэм нафэ къызэрашIыгъэмкIэ, цIыфхэр зычIэсыщтхэ унэхэм ыкIи гъогухэм яшIынкIэ республикэм гъэхъэгъэшIухэр иIэх. ЫпэкIэ фэдэ къыхэмыкIыгъэу, квадрат метрэ мин 468-рэ тшIыгъэ, цIыфхэр зычIэсыщтхэ унэхэм ялъы­тыгъэу къэпIон хъумэ, нэ­бгырэ пэпчъ зы квадрат метрэ тефэ. Адыгеим игъэхъагъэхэр федеральнэ лъэгапIэм тетэу хагъэунэфыкIыгъэх. Ау а гъэхъагъэхэм такъыщыуцурэп. Гухэлъыбэ джыри тиI, цIыфхэр зыщыпсэущтхэ микрорайон инхэр, инфраструктурнэ ыкIи социальнэ псэуалъэхэр тэшIых.

Ащ фэдэ проектышхо­хэм язэшIохынкIэ лъытэныгъэ зыфашIырэ цIыфхэм яеплъыкIэ, яшIэныгъэ ыкIи яопыт тищыкIагъ. Ащ фэдэ цIыфхэм зыкIэ ащыщ Тутарыщ Батырбый. Адыгэ Республикэмрэ Краснодар краимрэ япсэолъэшI отраслэ ихэхъоныгъэ ащ иIахьышхо хишIыхьагъ.

Лъэшэу сигуапэу Батыр­бый Зулэ ыкъом игъэхъа­гъэхэм апае Адыгеим икъэралыгъо гъэпсыкIэ ия 100-рэ илъэскIэ юбилей медалыр ащ естыжьыгъ», — къащитхыгъ КъумпIыл Мурат исоциальнэ хъытыухэм.