Журналистхэу ыкIи тхылъ къыдэгъэкIыным пылъ­хэу зиIофшIэн анахь дэгъоу зыгъэцакIэ­хэрэм АР-м лъэпкъ IофхэмкIэ, IэкIыб къэрал­хэм ащы­псэурэ тилъэпкъэгъухэм адыряIэ зэ­пхы­ныгъэ­хэмкIэ ыкIи къэбар жъугъэм иамалхэмкIэ и Комитет ищытхъу тхылъхэр аратыжьы­гъэх.

Комитетым итхьаматэу Шъхьэ­лэхъо Аскэр пэублэм къэбар жъугъэм иамалхэм ялIыкIохэм ясэнэхьаткIэ заушэтыжьын амал яIэныр мэхьанэшхо зиIэ лъэныкъохэм зэращыщыр къыхигъэщыгъ. Ащ къызэриIуагъэмкIэ, районхэм ащыIэ къэбарлъыгъэIэс амалхэм ама­лэу аIэкIэлъхэм бэкIэ ялъытыгъ шIуагъэ къытэу япшъэрылъхэр агъэцэкIэн зэралъэкIыщтыр. Ахэм гумэкIыгъоу яIэхэм дэ­гъоу зэращыгъуазэхэр, ащ дакIоу щыкIагъэхэр дэгъэзыжьыгъэнхэм анаIэ зэрэтырагъэтыщтыр къыIуагъ, IэпыIэгъу тедзэ арагъэгъотынымкIэ амалэу щыIэхэм ягугъу къышIыгъ.

ЫпэкIэ улъыкIотэным, журналистым къыгъэхьазырыгъэ материалыр цIыфхэм ашIогъэшIэгъоныным афэшI гъэзет нэкIубгъохэм адакIоу, Интернетым непэ амалэу къытыхэрэри гъэфедэгъэнхэ зэрэфаем щэч хэлъэп. Республикэм имыза­къоу, Урысыем, къэралыгъо зэ­фэшъхьафхэм ащыпсэухэрэм къэбархэмкIэ талъыIэсын, Адыге­ир зэрифэшъуашэу къащыдгъэлъэгъон зэрэфаер тхьаматэм къыIуагъ.

— Шъолъырым ихъугъэ-шIагъэхэр, къэбар шъхьаIэхэр шъо­ры цIыфхэм алъызыгъэIэсырэр. Хабзэмрэ обществэмрэ зэпхыныгъэ яIэным, шъхьэихыгъэу зэдэгущыIэнхэм шъуфэгъэзагъ. Гъэхъагъэхэм адакIоу, гумэкIыгъохэри журналистхэм ятхыгъэ­хэмкIэ, якъэтынхэмкIэ къагъэ­нэфэнхэр, ахэм ядэгъэзыжьын хэбзэ къулыкъухэм анаIэ тырадзэныр мыщ дэжьым анахь шъхьаIэу щыт. Мыхэм афэгъэ­хьыгъэхэр къэбарлъыгъэIэс амалхэм къызэрэхаутырэ шIыкIэм елъытыгъ республикэм общественнэ ыкIи социальнэ зыпкъитыныгъэу илъыр зыфэ­дэщтыр, — къыIуагъ Шъхьэлэхъо Аскэр.

Анахь шъхьаIэу ащ ынаIэ зытыридзагъэр хэушъхьафыкIыгъэ дзэ операцием хэлажьэ­хэ­рэр, лIыхъужъхэр, ахэм фэгъэ­кIотыныгъэу яIэхэр зэрифэшъуа­шэу къэгъэлъэгъогъэнхэр ыкIи къэтхыгъэнхэр ары. Ащ нэмыкIэу социальнэ хъытыухэм къа­рыхьэрэ къэбар нэпцIхэм тицIыфхэр ащыухъумэгъэнхэр пшъэрылъ шъхьаIэу зэрэщытыр къыхигъэщыгъ. Илъэсыбэ хъугъэу Iоф зышIэ­рэ журналистхэм, гъэзетым икъыдэгъэкIын хэлажьэхэрэм комитетым ищытхъу тхылъхэр А. Шъхьэлахъом аритыжьыгъэх.

Ахэм ащыщ «Адыгэ макъэм» ижурналистэу Iэшъынэ Сусанэ. Илъэсыбэ хъугъэу Сусанэ Iэпэ­Iэсэныгъэшхо хэлъэу иIофшIэн егъэцакIэ. Къыратыгъэ щытхъу тхылъыр къылэжьыгъэ шъып­къэу щыт. Гъэхъагъэхэр ышIынхэу, шIоу щыIэр игъогогъоу щыIэнэу тиIофшIэгъу фэтэIо.

КIарэ Фатим