Адыгеим и ЛIышъхьэу КъумпIыл Мурат Мыекъуапэ иурамэу Хьахъуратэм ыцIэ зыхьырэр зэрэзэ­тыра­гъэ­псыхьажьыщтым фэгъэхьыгъэ зэIукIэгъур непэ зэрищагъ. Iофтхьабзэм хэлэжьагъэхэр проект зэфэшъхьафхэм ахэплъагъэх, гъогур щынэгъончъэным епхыгъэ Iофыгъохэм атегущыIагъэх.

ЗэIукIэгъум хэлэжьагъэх АР-м иминистрэхэм я Кабинет и Тхьа­матэу КIэрэщэ Анзаур, АР-м псэолъэшIынымкIэ, транспортымкIэ, псэупIэ-коммунальнэ, гъогу хъызмэтымкIэ иминистрэу Валерий Картамышевыр, Мыекъуапэ ипащэу Геннадий Митрофановыр, АР-м хэгъэгу кIоцI IофхэмкIэ и Министерствэ гъогурыкIоныр щынэгъончъэнымкIэ и Гъэ­IорышIапIэ ипащэ ипшъэрылъхэр пIэлъэ гъэнэфагъэкIэ зыгъэ­цакIэу Хъунэго Махьмуд, АР-м псэолъэшIы­нымкIэ, транспортымкIэ, псэу­пIэ­-ком­мунальнэ, гъогу хъыз­мэтымкIэ и Министерствэрэ АР-м хэгъэгу кIоцI IофхэмкIэ и Мини­стерствэ и ГИБДД и Гъэ­IорышIапIэрэ якъу­тамэхэм япа­щэхэр.

Проект организациеу пшъэ­дэкIыжьэу ыхьырэмкIэ гъунэпкъэ гъэнэфагъэ зиIэ обществэу «Гео-Экопроект» зыфиIорэм ипащэу Николай Амирян теп­лъэу урамым фашIыщтыр зыфэ­дэщтым щигъэгъозагъэх. Ащ къы­зэрэхигъэщыгъэмкIэ, проектым диштэу урамэу Постовоим къы­щежьэу урамэу Восточнэм нэ­сэу Хьахъуратэм иурам къыхиубытэрэ автомобиль гъогум щыщ километри 6,5-рэ зэтырагъэпсыхьанэу рахъухьэ. Урамыр зэрэщытэу зэфашIыщтэп, метрэ 400 — 600 къызэлъиубытэу ар зэпагъэIыкIызэ ашIыщт.

Урамыми, лъэс гъогухэми ателъ асфальтыр, гъогу тамыгъэхэр зэблахъунхэу рахъухьэ. Коммуникациехэр зэкIэ чIычIэгъым чIалъхьащтых, ощхыпсыр зэрылъэдэжьыщт канализациякIи агъэпсыщт.

ЗэIукIэгъум хэлэжьагъэхэр Хьахъуратэм иурамрэ Юннатов­хэм яурамрэ зыщызэуталIэхэрэм дэжь зэрэщызекIощтхэ шIыкIэм тегущыIагъэх. Ахэр проект зау­лэмэ ахэплъагъэх. Анахь къе­кIоу алъытагъэр нэфырыгъуазэ­хэр ащ щыгъэуцугъэнхэр ары. СэмэгумкIэ къагъэзэн зэрэ­фаер къэзыгъэлъэгъорэ шъо­лъыр тедзэхэри агъэпсыщтых. ГИБДД-м и ГъэIорышIапIэ илIыкIохэм игъо зэралъэгъугъэм тетэу автомобильхэр жъугъэу зыщызекIохэрэ нэмыкI чIыпIэхэми ащ фэдэ шъолъырхэр ащагъэпсыщтых.

Хэбзэукъоныгъэу водительхэм ашIыхэрэр къыхэгъэщыгъэн­хэм пае сурэт ыкIи видео тезыхырэ камерэхэр гъэуцугъэнхэ фаеу алъытагъ. Республикэм и ЛIышъхьи ащ къыдыригъэ­штагъ, Мыекъуапэ иурамхэр щынэгъончъэнхэм мэхьанэшхо зэриIэр къыхигъэщыгъ.

КъэуцупIэ дэгъухэр гъэпсыгъэнхэ, чъыгхэр, куандэхэр къэу­хъумэгъэнхэ, Хьахъуратэм иурам къыпэIулъ лъэс гъо­гухэр зэтегъэпсыхьэгъэнхэ зэ­рэфаери КъумпIыл Мурат къыхигъэщыгъ.

«Хьахъуратэм иурам Мые­къуапэ иурам шъхьаIэхэм зэу ащыщ. Джырэ шапхъэхэм ади­штэу, щынэгъончъэу, дахэу ар зэтегъэпсыхьэгъэн фае. Къэралыгъо автоинспекцием шъуригъусэу гъогу инфраструктурэм игъэпсын епхыгъэ Iофыгъохэм шъуишъыпкъэу шъуадэлажь. Гъогум щызекIохэрэмкIи, къэлэдэсхэмкIи ар Iэрыфэгъун, къалэм игупчэ иархитектурэ диштэу щытын фае», — къыIуагъ АР-м и ЛIышъхьэ.

Хьахъуратэм иурам изэте­гъэ­псыхьан гъогур щынэгъон­чъэным­кIэ Iофышхоу зэшIуа­хырэм изы Iахьэу зэрэщытыр шъугу къэтэгъэкIыжьы. Мые­къуапэ къэзыухьэрэ гъогур зэ­рагъэпсыгъэм ишIуагъэкIэ Хьахъуратэм иурам зэтырагъэ­псыхьанэу амал щыIэ хъугъэ. Джыдэдэм урамым ипро­ект документацие Iоф дашIэ, ­мылъку къэкIуапIэхэм алъэхъух.

АР-м и ЛIышъхьэ ипресс-къулыкъу