Лъэпкъ проектэу «ЗекIонымрэ хьакIэпэгъокIыным ииндустриерэ» зыфиIорэм къыхеубытэ программэу кIэлэеджакIохэм афэгъэхьыгъэри. Ар икIыгъэ илъэсым апэрэу аушэтыгъ. Я 5 — 9-рэ классхэм ащеджэхэрэмрэ ахэм янэ-ятэхэмрэ зэгъусэхэу мэфэ заулэрэ агу рихьырэ чIыпIэ гъэшIэгъонхэр ыпкIэ хэмылъэу къаплъыхьанхэу амал яIэ хъугъэ.

Урысыем ишъолъыр 18-у программэр зыгъэцакIэхэрэм Адыгеири ахэт. Республикэм икIэлэеджэкIо миным ехъу чIы­опсым, тарихъым, культурэм ясаугъэтэу тиIэхэм ащыIагъэх, къытпэблэгъэ шъолъырхэм яехэ­ми анэсыгъэх.

ИкIыгъэ илъэсым мы программэм игъэцэкIэн пэIуагъэ­хьанэу сомэ миллион 500 къа­тIупщыгъагъэмэ, мыгъэ ар зы миллиардым нагъэсыщт. Урысыем и Премьер-министрэу Михаил Мишустиным къызэри­IуагъэмкIэ, икIыгъэ илъэсым кIэ­лэцIыкIу мини 100 фэдизмэ загъэпсэфыгъ, мыгъэ ахэм япчъагъэ мин 200-м нэсынэу мэгугъэх. Джащ фэдэу проектым къыхэлэжьэрэ шъолъырхэм джыри 11 къахэхъуагъ. Зэрэхъу­рэмкIэ, еджакIо пэпчъ тырагъэ­кIодэщтыр сомэ мини 5.