ИлъэситфыкIэ узэкIэIэбэжьмэ, УФ-м ФедерациемкIэ и Совет и Тхьаматэу Валентина Матвиенкэм сенаторхэм унашъо афи­шIыгъагъ шъолъыр брендхэр къыхагъэщынхэу ыкIи ахэр атхынхэу. Адыгэ Республикэм ащ фэдэ шъолъыр тамыгъи 7 аригъэтхыгъ.

«А уахътэм къыкIоцI Роспатентыр тигъусэу Iофышхо зэшIотхыгъ, тамыгъэ зэфэшъхьафхэу 122-рэ къыхэдгъэщыгъ ыкIи ядгъэтхыгъ. Апэ ишъыгъэхэр Краснодар краимрэ Адыгэ Респуб­ликэмрэ. ИкIыгъэ илъэсым итыгъэгъэзэ мазэ шъолъыр брендхэм якъэгъэлъэгъонэу рекIокIыгъэм ахэр хэлэжьагъэх. НахьыбэрэмкIэ къагъэлъэгъуагъэхэр гъомылапхъэхэр, лъэпкъ шъуашэхэр, Iэпэщысэ шIыгъэхэр, джэгуалъэхэр, хэдыкIыгъэхэр, нэмыкIхэр. Сенаторхэм ащыщыбэм ежь-ежьырэу экспонатхэр къыздащагъэх», — къыIотагъ ФедерациемкIэ Советым и Комитет ипащэу Лилия Гумеровам. АР-м культурэмкIэ и Министерствэ къызэрэщаIуагъэмкIэ, 2023-рэ илъэсым ищылэ мазэ ехъулIэу Роспатентым шъолъыр тамыгъэ 305-рэ щагъэнэфагъ ыкIи щатхыгъ, Адыгеим иеу 7 ащ къыхэфагъ: «Адыгэ къуаер», «Адыгэ щыгъур», «Адыгэ щаир», «Псынэпсэу Мыекъуапэр», «Мыекъопэ пивэр», «Мыекъопэ аркъыр», «Мыекъопэ псы IэшIур». Ахэр зэкIэ шъолъырым инэпэеплъэу хъугъэх, федэ къэзытырэ бизнесым щыщых, IофшIэпIэ чIыпIакIэхэр къыздахьых, зекIоным изегъэушъомбгъун фэлажьэх, инвестициехэр республикэм къыхалъхьанхэм фэIорышIэх ыкIи бюджетым хэхъоныгъэ рагъэшIы.