Щын уIагъэхэр зэрагъэхъужьыщт ыкIи операцие ужым нахь шIэхэу зэтезыгъэуцожьыщтхэ пленкэ Мыекъопэ къэ­ралыгъо технологическэ университетым ишIэ­ныгъэлэжьхэм къаугупшысыгъ.

Ар мыIэрысэм, гыныплъ ыкIи пцэжъые коллагеным ахашIыкIыгъ.

МКъТУ-м гъомылап­хъэхэм ягъэхьазырынкIэ ыкIи гъэшхэным иIофы­гъохэмкIэ икафедрэ иIофышIэхэмрэ медицинэ институтым щылэжьэрэ ясэнэхьатэгъухэмрэ зэгъу­сэхэу Мыекъопэ къэлэ сымэджэщым щын хирургиемкIэ иотделение шIэныгъэ-гъэсэныгъэ гупчэу щызэхэщагъэм ушэтынхэр щашIыгъэх. Ахэм ауж шIэныгъэлэжьхэм шапхъэ­хэм атетэу ищыкIэгъэ тхылъхэр агъэхьазыры-гъэх ыкIи уIагъэр нахь шIэхэу зыгъэкIыжьырэ пленкэу охътэ гъэнэфа­гъэкIэ ежь-ежьырэу кIодыжьырэр къызэрэхахыгъэр къэзыушыхьатырэ тхылъ (патент) къаратыгъ.

Шъоущыгъу уз зиIэхэр операцие зашIыкIэ, уIа­гъэр мыкIыжьэу охътабэ ыкъудыеу къыхэкIы, къэщынырэ чIыпIэхэм пленкэу къаугупшысыгъэр атеплъхьэмэ, ишIуагъэ къэ­кIощтэу ары зэрагъэу­нэфыгъэр. Джащ фэдэу лъынтфэ уз зиIэхэми яшIуагъэ къекIыщт.

УIагъэр зыгъэкIыжьырэ пленкэу ежь-ежьырэу кIодыжьырэм хэлъых мы­Iэрысэм псыр къызыкIа­фырэм ыуж къэнэрэ пыдзафэм къыхахырэ пек­тиныр, шъоущыгъу зыха­шIыкIырэ чIылъэм ижом ыкIи профессорэу Л. В. Антиповам къыхихыгъэ пцэжъые коллагеныр, пре­паратэу трипсин/химо­трипсиныр.

Мы пленкэм ишIуагъэ­кIэ уIагъэм бактериехэр хахьэхэрэп ыкIи оксидантхэм ащеухъумэ, ар нахь къеукъэбзы, лыкIэ къэкIы­жьынымкIэ ишIуагъэ къэ­кIо, сымаджэр нахь шIэ- хэу ылъэ къытеуцожьы.

Пленкэм икъыхэхын дэ­лэжьагъэхэм ащыщых Мыекъопэ къэралыгъо тех­нологическэ университетым иректорэу, экономикэ шIэныгъэхэмкIэ док­торэу Къуижъ Саидэ, шIэ­ныгъэлэжьэу Людмила Антиповар, гъомылапхъэ­хэм яшIынкIэ ыкIи гъэшхэ­ным изэхэщэнкIэ кафед­рэм ипащэу Хьаткъо Зурет, медицинэ шIэныгъэ­хэмкIэ кандидатэу Хьатхъохъу Мае, Мыекъопэ къэлэ клиническэ сымэ­джэщым щын хирургиемкIэ иотделение иврач-хирург­хэу Владимир Лободарэ Алексей Астаховымрэ.