Лъэпкъ проектэу «Псауныгъ» зыфиIорэм къызэрэщы­дэ­лъы­тагъэу, къутырэу Гавердовскэм фельдшер-мамыку Iэза­пIэу дэтыгъэм ычIыпIэ врачебнэ амбулаторие мы илъэ­сым щызэтырагъэпсыхьан гухэлъ яI. ПстэумкIи квадратнэ метрэ 427-рэ амбулаторием илъынэу агъэнафэ.

— Амбулаториер спе­циалистхэр зэрысыщтхэ кабинетхэмкIэ зэтеуты­гъэщт: терапевтыр, ги­некологыр, процедурнэр, прививкэхэр зыщахалъхьащтхэр, медицинэ профилактикэм фэгъэзэгъэщтыр ыкIи старшэ мед­сестрар, нэмыкI IофышIэ­хэр зэрысыщтхэр, гъэтIылъыпIэхэр, — къы-Iуагъ АР-м псауныгъэр къэухъумэгъэнымкIэ ми­нистрэм иапэрэ гуадзэу Максим Коробко.

2024-рэ илъэсым мы IэзапIэм иIофшIэн ригъэ­жьэщт.

Псауныгъэр къэухъу­мэгъэным иапэрэ звено гъэкIэжьыгъэным ипрограммэу 2021-рэ илъэсым къыщегъэжьагъэу 2025-м нэс ателъытагъэм зэрэщыгъэ­нэфагъэу поликлини­кэхэр, фельдшер-мамыку пунктхэр, врачебнэ амбулаториехэр кIэу республикэм щагъэ­псыщтых ыкIи гъэцэкIэ­жьынхэр зищыкIагъэхэм арашIылIэщтых, оборудованиякIэ ыкIи автотранспортыр къащэфыщтых.

Поселкэу Каменно­мостскэм поликлиникэр зычIэт унэм игъэкIотыгъэ гъэцэ­кIэжьынхэр ра­шIылIагъэх. Кощхьэблэ районым ипоселкэу Дружбэм ыкIи Теуцожь районым ит къуа­джэу Джэ­джэхьаблэ врачебнэ амбулаториехэр ащагъэ­псых.

Джащ фэдэу Мыекъуапэ щашIырэ поликлиникэр аухынэу ыкIи урамэу Чкаловым ыцIэ зыхьырэм тет къэлэ поликлиникэм гъэцэкIыжьынхэр рашIылIэнхэу рахъухьэ.