Адыгэ къэралыгъо университетым тарихъымкIэ ыкIи юрис­пруденциемкIэ ифакультетхэм ащеджэрэ студент 50 фэдиз интеллектуальнэ джэгукIэу «Право выбора» зыфиIорэм мы мафэхэм хэлэжьагъэх.

ХэдзэкIо ныбжьыкIэм и Мафэ ехъулIэу Iофтхьа­бзэр зэхащагъ. АР-м хэ­дзынхэмкIэ и Гупчэ ко­мис­­сие хэтхэр ащ къы­рагъэблэгъагъэх.

Пэублэм Гупчэ комиссием испециалист-эксперт шъхьаIэхэу Виктор Хижнякрэ Екатерина Дунаевскаямрэ 2024-рэ илъэсым Урысыем и Президент зэрэхадзыщтыр ныбжьыкIэхэм къараIуагъ.

Участковэ комиссием, джащ фэдэу республикэм иныбжьыкIэ хэдзэкIо комиссие хэхьанхэу ахэр къырагъэ­блэгъагъэх. Уцугъуищэу гощыгъэу зэнэкъокъур зэхащагъ. Апэрэм УФ-м хэдзынхэмкIэ фитыныгъэхэм афэгъэ­хьыгъэ упчIэхэм джэуап­хэр студентхэм къараты­жьыгъэх. ЯтIонэрэм АР-м хэдзынхэмкIэ исистемэ фэгъэхьыгъагъ упчIэхэр. Ящэнэрэ уцугъом нэсыгъэ­хэм хэдзэкIо комиссиер зэрихьылIэрэ хъугъэ-шIагъэхэм хэкIыпIэу сту­дентхэм къафагъотыщтхэм ащагъэгъозэнхэу щытыгъ.

Iофтхьабзэм хэлэжьагъэхэм сертификатхэр афа­гъэшъошагъэх, текIоныгъэ къыдэзыхыгъэхэм дипломхэр ыкIи шIухьафтынхэр аратыгъэх. Анахь къэгъэлъэгъон дэгъухэр зышIыгъэхэр юридическэ факультетым щеджэхэрэ Уджыхъу Аслъан, Абрэдж Амир, Милена Арабачян.