Iофым изэхэфын лъагъэкIуатэ
Мыекъуапэ иследственнэ отдел иследовательхэм муниципальнэ учреждениеу къалэм дэтым испециалист шъхьаIэ къыфызэIуахыгъэ уголовнэ Iофыр лъагъэкIуатэ.
ЕдзыгъуищымкIэ бзэджэшIагъэ зэрэзэрихьагъэм фэшI (бэ хъурэ къуалъхьэр зэриштагъэм епхыгъэу хъугъэ-шIэгъитIу, джащ фэдэу иIэнатIэ къызэрэзфигъэфедагъэр) хъулъфыгъэр агъэмысэ.
ЕдзыгъуитфымкIэ хъулъфыгъэм бзэджэшIагъэ зэрэзэрихьагъэм фэшI щынэгъончъэнымкIэ федеральнэ къулыкъум и ГъэIорышIапIэу АР-м щыIэм уголовнэ Iоф къыфызэIуихыгъ ыкIи
Мыекъуапэ иследственнэ комитет къыугъоигъэ материалхэм гъусэ афашIынэу фагъэхьыгъ.
Следствием зэригъэунэфыгъэмкIэ, 2017-рэ илъэсым мэлылъфэгъум къыщегъэжьагъэу 2023-рэ илъэсым ищылэ мазэ нэс зэгуцафэхэрэм ахъщэ къыгъэхъэн мурад иIэу «Дунаир зыхъожьыгъэр агъэтIылъыжьыным пае Iизын ятыгъэныр» зыфиIорэмкIэ хьадэ фэIо-фашIэхэр зыгъэцэкIэрэ сатыушI организацием илIыкIо илъэIу фигъэцэкIэным фэшI къуалъхьэ къыIихыгъ, мы фэIо-фашIэм ахъщэ лъыптынэу щымытыгъэми.
Хабзэр ыукъуи муниципальнэ къулыкъушIэм ахъщэ къуалъхьэу сомэ миллион 1,5-рэ къызIэкIигъэхьагъ.
ЩынэгъончъэнымкIэ федеральнэ къулыкъум и ГъэIорышIапIэу АР-м щыIэм, АР-м хэгъэгу кIоцI IофхэмкIэ и Министерствэ экономикэ щынэгъончъэнымкIэ ыкIи къолъхьэ тын-Iыхыным пэшIуекIогъэнымкIэ и ГъэIорышIапIэ, джащ фэдэу Росгвардием ихэушъхьафыкIыгъэ подразделение якъулыкъушIэхэр зэгъусэхэу хъулъфыгъэр къызалъыхъум сомэ мин 490-м ехъу, ащ нэмыкIэу бзэджэшIагъэ зэрихьэ зыхъукIэ ыгъэфедэрэ пкъыгъохэр ыкIи документхэр къыкъуахыгъэх.
Мы мафэм ехъулIэу Мыекъуапэ иследственнэ отдел иследовательхэм муниципальнэ къулыкъушIэм къыфызэIуахыгъэ уголовнэ Iофым ихэплъэн лъегъэкIуатэ, къолъхьэ тын-Iыхыным ылъэныкъокIэ нэмыкI бзэджэшIагъэхэр зэрихьагъэмэ агъэунэфы.
Урысыем и Следственнэ комитет иследственнэ ГъэIорышIапIэу АР-м щыIэм ипресс-къулыкъу