Адыгеим и ЛIышъхьэу КъумпIыл Мурат пшъэрылъ къызэрэфишIыгъэм тетэу АР-м иминистрэхэм я Кабинет и Тхьаматэу КIэрэщэ Анзаур республикэм гъогур щынэгъончъэнымкIэ икомиссие изэхэсыгъо зэрищагъ.

Апэрэ Iофыгъоу зытегущы­Iагъэхэр республикэм игъогухэм атехъухьэрэ хъугъэ-шIагъэ­хэр ары. Адыгэ Республикэм хэгъэгу кIоцI IофхэмкIэ и Министерствэ и ГИБДД и ГъэIорышIапIэ ипащэ ипшъэрылъхэр пIэлъэ гъэнэфагъэкIэ зыгъэцэкIэрэ Хъунэго Махьмуд зэхэ­сыгъом къызэрэщиIуагъэмкIэ, 2022-рэ илъэсым Адыгеим игъогухэм хъугъэ-шIэгъэ 424-рэ къатехъухьагъ. Нэбгырэ 69-рэ ахэм ахэкIодагъ, 503-мэ шъобж­хэр атещагъэ хъугъэ. 2021-рэ илъэсым егъэпшагъэмэ, гъэ­рекIо гъогухэм къатехъухьа­гъэр 4-кIэ, ахэм ахэкIодагъэр нэбгырэ 23-кIэ нахь мэкIагъ, шъобж хэзыхыгъэхэр нэбгыри 9-кIэ нахьыбагъ.

Адыгэ Республикэм иминист­рэхэм я Кабинет и Тхьаматэ хьыкум приставхэм якъулыкъу пшъэрылъ фишIыгъ гъогурыкIонымкIэ шапхъэхэр зыукъуагъэ­хэм, анахьэу ешъуагъэу рулым Iусыгъэхэм тазырэу атыралъхьагъэхэр къарагъэпщыныжьынымкIэ Iофэу ашIэрэр нахь агъэлъэшынэу.

«Мы лъэныкъомкIэ чаныгъэ нахь къызыхэжъугъаф. Адыгеим хэгъэгу кIоцI IофхэмкIэ и Министерствэ шъуригъусэу рейдхэр зэхашъущэх. Хэукъоныгъэхэр нахьыбэрэ амышIыжьынхэм пае шIокI имыIэу жъугъэпщынэх», — къыIуагъ КIэрэщэ Анзаур.

Зэхэсыгъом хэлажьэхэрэм республикэм иавтомобиль гъогухэу тхьамыкIагъо къызыщы­хъун ылъэкIыщтхэр зэрагъэшIагъэх, мы лъэныкъомкIэ апэрэ чэзыоу шIэгъэн фаехэм ате­гущыIагъэх. Адыгэ Республикэм псэолъэшIынымкIэ, транспортымкIэ, унэ-коммунальнэ, гъогу хъызмэтымкIэ иминистрэу Валерий Картамышевым мыщкIэ зэфэхьысыжьхэр къы­шIыгъэх.

УплъэкIунхэм къызэрагъэлъэ­гъуагъэмкIэ, республикэ мэхьанэ зиIэ автомобиль гъогуи 2-мэ: «Мыекъуапэ — Джаджэ — Псыбай — Зеленчукская — Карачаевск» зыфиIорэ автомобиль гъогум изы Iахьэу къутырэу Казенно-Кужорскэм дэжь щыIэмрэ Шапсыгъэ псы­IыгъыпIэм идамбэ дэжькIэ щыIэ автомобиль гъогумрэ ары на­хьыбэрэмкIэ хъугъэ-шIагъэхэр зытехъухьэхэрэр.

Гъогухэм авариехэр нахь макIэу къащыхъунхэм пае рес­публикэм Iофтхьэбзэ гъэнэфагъэхэр щызэрахьэх: шапхъэхэм адиштэу ахэр зэтырагъэпсы­хьажьых, тамыгъэхэмрэ лъэс­гъогухэмрэ агъэкIэжьых, остыгъэхэр атырагъэуцох.

Республикэм икъэралыгъо бюджет учреждениеу «Автомобиль гъогухэмкIэ ГъэIорышIапIэу «Адыгеяавтодорым» ипащэу Алексей Корешкиныр лъэпкъ проектэу «Щынэгъончъэ ыкIи шэпхъэшIухэм адиштэрэ гъогу­хэр» зыфиIорэр зэрагъэцакIэрэм къытегущыIагъ.

Ащ зэрэхигъэунэфыкIыгъэмкIэ, шъолъыр проектым игъэцэкIэн пае 2022-рэ илъэсым федеральнэ бюджетым сомэ миллиарди 3,1-рэ къыхагъэкIыгъ. А мылъкумкIэ автомобиль гъогухэр шапхъэхэм ади­штэу зэтырагъэпсыхьажьыгъэх, гъогу зэхэкIыпIэу Тэхъутэмыкъое районым щыIэм, Мые­къуапэ къэзыухьэрэ автомобиль гъогум, «Черниговская — Тыгъэмыпс» зыфиIорэ автомобиль гъогум изы Iахьэу Мые­къопэ районым щыIэм, Гъозэрыплъэрэ Лэгъонакъэрэ зэзыпхырэ автомобиль гъогум ягъэпсын аухыгъ.

Шъолъыр проектым игъэцэкIэн пае 2022-рэ илъэсым республикэ бюджетым сомэ миллиард 1,7-рэ къыхагъэкIыгъ. АщкIэ республикэ автомобиль гъогухэмрэ лъэмыджхэмрэ агъэ­цэкIэжьыгъэх,

Мыекъуапэрэ Яблоновскэ къэлэ псэупIэмрэ яавтомобиль гъогухэр шап­хъэхэм адиштэу зэтырагъэ­псы­хьажьыгъэх.

Шъолъыр проектым тетэу 2023-рэ илъэсым республикэ мэхьанэ зиIэ автомобиль гъогу километрэ 53,9-рэ агъэцэкIэ­жьынэу, лъэмыдж метри 128,15-рэ шапхъэхэм адиштэу зэтырагъэпсыхьажьынэу, Мыекъуапэ иавтомобиль гъогу километри 7,38-рэ агъэцэкIэжьынэу, Яблоновскэ къэлэ псэупIэм иавтомобиль гъогу километри 4,25-рэ агъэкIэжьынэу, сурэт ыкIи видео тезыхырэ камерэ 16 атырагъэуцонэу рахъухьэ.

Водитель хъумэ зышIоигъохэр гъэсэныгъэ языгъэгъотырэ организациехэмрэ республикэм иавтомоболистхэр зыщагъэхьазырхэрэмрэ зэращырагъаджэ­хэрэми зэхэсыгъом щытегущы­Iагъэх. Ащ фэгъэхьыгъэу къэгущыIагъэх АР-м гъэсэныгъэмрэ шIэныгъэмрэкIэ иминистрэ ипшъэрылъхэр зыгъэцакIэу Ев­гений Лебедевыр, АР-м хэгъэгу кIоцI IофхэмкIэ и Министерствэ и ГИБДД и ГъэIорышIапIэ ипащэ ипшъэрылъхэр пIэлъэ гъэнэфагъэкIэ зыгъэцэкIэрэ Хъунэго Махьмуд, Урысыем и ДОСААФ ишъолъыр къутамэ итхьаматэу Барцо Тимур.

АР-м и ЛIышъхьэ ипресс-къулыкъу