Джащ фэдэ цIыфэу, IофышIэ хъупхъэу адыгабзэм, лъэпкъ шэн-хабзэхэм къарыкIощтым ыгъэгумэкIыщтыгъэ цIыфэу тыгу къинагъ 1982-рэ илъэсым къыщыублагъэу «Адыгэ макъэм» иредакцие Iоф щызышIэгъэ корректор IэпэIасэщтыгъэ Мамыжъ Любэ.

«Адыгэ макъэм» Iоф щысшIэнэу сыкъызыIохьэм, корректорэу ары зэрезгъэжьэгъагъэр. Ащыгъум редактор шъхьа­Iэу ащ иIэгъэ Мэрэтыкъо Рэмэзанэ къысиIуагъ типографием щыIэ корректор купым сызэрэхэтыщтыр. ГущыIэм имэхьанэ гъэнэфагъэми, Iофэу сшIэщтым, ар зэрэзгъэцэкIэщт шIыкIэм хэшIыкI афысиIагъэп, лъэшэу сыгумэкIыщтыгъ, сишIуагъэ къэзгъэкIоным ычIыпIэкIэ сиягъэ сиIофшIэгъухэм язгъэкIыным сытещыныхьэщтыгъ.

Апэрэ мафэхэм къащегъэжьагъэу IэпыIэгъу къысфэхъугъэх IэпэIэсэныгъэ­шхо зиIэу лъэпкъ гъэзетым Iутыгъэ корректорхэу Мамыжъ Любэ, Къонэ Рурэ, Гъогъо Зарэ, ЛIышэ (Хьаткъо) Саныет, КIэмэщ Фатимэ. Ахэр ары мыхъугъэемэ, непэ мыщ сыщымылэжьэныгъэкIи хъущтыгъ. Зыгорэ къыздэмыхъу­гъэу, сычэфынчъэу сызэрилъэгъурэм лъыпытэу Любэ къышIэщтыгъ хъугъэр, къысэушъыищтыгъ, сыгу къыIэтыщтыгъ. Анахьэу охътабэ зэдэдгъэкIонэу зыхъу­щтыгъэр ежьыри сэри ревизионнэ корректорхэу Iоф тшIэ зэхъур ары. Ащыгъум ИТАР ТАСС-м къытыщтым тежэу бэрэ тычIэсыщтыгъ, чэщыр сыхьатыр 1-м шIокIыгъэу гъэзетыр ттэуи къыхэкIыщтыгъ. Ащ фэдиз уахътэм узэгъусэмэ Iаджыми уанэсыщтба, бэ тызэрыгущыIэнэу хъущтыгъэр. Любэ гумэкIыгъоу иIагъэхэми, игушIуагъохэми сащыгъуазэу щытыгъ. ЫкIи ренэу згъэшIагъощтыгъ бзылъфыгъэ цIыкIум кIуачIэу иIэр зыфэдизыгъэр, къинэу зэпичын ылъэкIыщтыгъэр.

Любэ ыгуи ыпси гъэзетым хэлъыгъ. Ныдэлъфыбзэр дэгъоу зэришIэщтыгъэм ишIуагъэкIэ тхыгъэу заджэхэрэм щыкIагъэ ямыIэу ыгъэтэрэзынхэ ылъэкIы­щтыгъ. Уахътэу редакцием щигъакIорэр зэрэбэм ар рыгущыIэу, тхьаусыхэу щытыгъэп, кIэухэу иIофшIэн фэхъущтыр, неущ гъэ­зетым къыраIолIэщтыр ары зыгъэгумэкIыщтыгъэр. ИIофшIэн лъэшэу фэшъыпкъагъ, нэмыкIэу ар щытыни ымылъэкIыщтыгъэу къысшIошIы.