Сэхъутэ Нурбый Тэхъутэмыкъое районымкIэ къуаджэу Пэнэхэс 1945-рэ илъэсым къыщыхъугъ.

Научнэ-техническэ информациемкIэ Краснодар гупчэм и Мыекъопэ филиал ипэщагъ. 1985-рэ илъэсым «Адыгэ макъэм» къыIухьагъ. Апэ корреспондентыгъ, етIанэ старшэ корреспондентэу Iоф ышIагъ, нэужым отделым ипащэу агъэнэфэгъагъ, аужырэ илъэсхэм экономикэмкIэ отделым иредакторыгъ.

Медалэу «За трудовое отличие» зыфиIорэр къыфагъэшъошэгъагъ, Адыгэ Республикэм и Апшъэрэ Совет и Президиум и Щытхъу тхылъ къыратыгъагъ, «Адыгэ Республикэм изаслуженнэ журналист» зыфиIорэ цIэри къыфаусыгъагъ.

Нурбый непэ редакцием щылэжьэрэ журналистыбэ сэнэхьатым фигъэсагъ, IофшIэным ишъэфхэр аригъэшIагъ. Шъхьа­хынагъэр еплъэгъулIэнэу щытыгъэп, пчэдыжьым жьэу къакIоти, IофшIэным фежьэщтыгъ, мафэ къэс зэпымыоу тхыгъэ зэфэшъхьафхэр гъэзетым къыригъа­хьэщтыгъ, IофшIэкIошхоу щытыгъ. «БэмыIо башI» зыфаIохэрэм ащыщыгъ. Емызэщэу зигугъу къышIыщтгъагъэр кIочIабэ зыхилъхьэгъэ, ыгукIэ зыщырэхьатыщтыгъэ дачэу ыIитIукIэ зэтыригъэп­сыхьэгъагъэр ары. Ау ащ гу щифэнэу, зыщигъэпсэфынэу игъо ифагъэп.