Къэзэнэ Юсыф «Адыгэ макъэм» къыIумыхьэзэ редакцием чIэсхэм дэгъоу ашIэ хъугъагъэ, бэрэ къычIахьэщтыгъ. Ащыгъум редактор шъхьаIэщтыгъэу Къуекъо Асфар ар IофышIэ ыштэгъагъ.

Апэ «Адыгэ макъэм» урысыбзэкIэ къыдэкIырэ гуадзэу иIагъэм Iоф дишIэнэу агъэнэфэгъагъ. Нэужым гъэзетым икIэгъэтхэн хьылъэ къэхъугъэу, Iофыгъо шъхьаIэу редакцием ар къызыфэуцум, а лъэныкъом Асфар фигъэзагъ Юсыф, ипшъэрылъ ыгъэцэкIэнэу зэрэщыгугъырэри риIуагъ.

Юсыф цIыф хьалэлэу, «ыгу илъыр ынэгу кIэлъ» зыфаIохэрэм афэдагъ. Зыфежьэгъэ Iофым къиныгъоу пылъыр апэрэ уахътэм къыгурымыIощтыгъэми, тIэкIу зытешIэм ар зэрэмыпсынкIагъор зэхишIагъ, бэрэ ыгу кIодэуи къыхэкIыщтыгъ. Ау ипшъэрылъ зыгъэцакIэу есэгъэ лIым Iофыр къыгъэтIылъыныр зэри­пэсыгъэп. КIэгъэтхэгъу уахътэр къызысыкIэ ащ «ишыонэ зэтелъ» гъогум техьэщтыгъ, организациехэм, предприятиехэм япащэхэм аIукIэщтыгъ, адыгэгъэшхо зыхэлъыгъэ Юсыф пстэуми жабзэ къадигъотыщтыгъ.

«Адыгэ макъэр» зыIукIэхэрэм япчъа­гъэ нахьыбэ хъуным макIэп Юсыф кIуачIэу хилъхьагъэр. ДгъэшIагъо икъугъагъ Мыекъуапэ икъэлэ парк нахьыжъхэр пчыхьэрэ зыщызэIукIэхэрэ чIыпIэу иIэм стенд щигъэуцунымкIэ Iизын къаIи­хи, цIыфхэр ащ «Адыгэ макъэм» щеджэнхэу, мафэ къэс ащ къихьэхэрэм нэIуасэ зафашIын амал яIэнэу зэришIыгъагъэр. Пчэдыжь къэс гъэзет номерыкIэр ащ ыхьыти, афыпилъэщтыгъ.

Юсыф еджагъэу, акъылышIоу, философие гупшысэ куухэр зышIырэ цIыфэу щытыгъ. Тхылъхэр икIэсагъэх, справочникэу, энциклопедиеу, тарихъым, философием япхыгъэу ыугъоигъэу икабинет чIэлъыгъэм гъунэ иIагъэп. Тэри ахэр бэрэ дгъэфедэщтыгъ, узыфаер зепIокIэ, игуапэу къыпфигъотыщтыгъ, сыдигъуи IэпыIэгъу къыпфэхъуным фэхьазырыгъ. ЩыIэныгъэр, цIыфхэр шIу зылъэгъущтыгъэхэ Юсыф лъытэныгъэ редакцием щыфашIыщтыгъ, якIэсагъ. Илъэсым ехъугъэшъ къызытхэмытыжьыр, непэ къызынэсыгъэми кабинетыпчъэр къыIуи­хынышъ, «Я вас приветствую» ыIозэ къычIэхьащт тшIошIы, бэрэ игугъу тэшIы, лъэшэу тыгу къеуагъ игъонэмысэу дунаим зэрехыжьыгъэр.