ЦIыфхэмрэ дзэмрэ языкIыныгъ
Мыекъопэ къэзэкъ отделым тонн 15 хъурэ шIушIэ IэпыIэгъур хэушъхьафыкIыгъэ дзэ операцием хэлажьэхэрэм афаригъэщагъ.
Къэзэкъхэм къаугъоигъэ я 19-рэ шIушIэ IэпыIэгъур автомобили 6-м арыфэ икъугъ. ХэушъхьафыкIыгъэ дзэ операцием хэлажьэхэрэм ар афэзыщагъэхэр Мыекъопэ къэзэкъ отделым иатаманэу Александр Даниловыр, Апшеронскэ районым иатаманэу Сергей Коростылевыр ыкIи ащ игуадзэу Сергей Хлудневыр, атаманхэу Сергей Волошиныр, Виктор Остапенкэр, Константин Загорулько, динлэжьэу Николай.
Хэгъэгум иухъумакIо и Мафэ тефэу шIушIэ IэпыIэгъур хэушъхьафыкIыгъэ къэзэкъ-гуфэкIо отрядэу «Пшызэ» («Барс 16») зыфиIорэм хэт дзэ къулыкъушIэхэм афащагъ. Адыгеим ыкIи Пшызэ ащыпсэухэу къулыкъушIэхэм афэгумэкIыхэрэм къагъэхьазырыгъэ шIухьафтынхэр, автомобилым халъхьэрэ пкъыгъохэр, шэф остыгъэхэр, тутынхэр, хьакухэр, щыгъын фабэхэр, зашъохэрэ псыр, Iэзэгъу уцхэр аIакIагъэхьагъэх.
ДзэкIолIхэм япсауныгъэ ешIушIэнхэм фэшI шъоур, пчэн ыкIи къо дагъэр алъагъэIэсыгъ. Джащ фэдэу къэзэкъ ныбжьыкIэхэм ыкIи унэе IэпэIасэхэм агъэжъэгъэ IэшIу-IушIухэр, ашIыгъэ салатхэр афащагъэх. ХэушъхьафыкIыгъэ дзэ операцием хэлажьэхэу зипсауныгъэ госпиталым щызэтезыгъэуцуожьыхэрэри ащыгъупшагъэхэп. Ахэм апае медицинэ Iэмэ-псымэхэр ыкIи Iэзэгъу уцхэр, тхьацухэкI гъэжъагъэхэр зыдащагъэх.
КIэлэцIыкIу письмэхэр ыкIи сурэтхэр, зэолIхэм зыщафэгушIохэрэ видеотехыгъэхэр Адыгеим иныбжьыкIэ къэзэкъхэм я Союз итхьаматэу Екатерина Загорулько аригъэлъэгъугъэх.
Ащ нэмыкIэу Мыекъопэ къэзэкъ отделым икъэзэкъхэм ЛНР-м икъалэу Новодружескэ щыпсэухэрэм ящыкIэгъэщт лъэкъопылъхьэ ыкIи щыгъын фабэхэр, кIэлэцIыкIу шхынхэр ыкIи джэгуалъэхэр аIэкIагъэхьагъэх. Ащ пае а къалэм ипащэу Татьяна Левашовам рэзэныгъэ гущыIэхэр къапигъохыгъэх. Гъогу кIыхьэу зэпачыгъэр къин дэдагъ. Ощх-осым, шыблэоным конвоир хэфагъ. Гъунапкъэм пэрыохъоу къыщыуцугъэхэм апкъ къикIыкIэ шIункIым хэтхэу машинэхэр аунэкIыгъэх. Чэщ реным артиллерийскэ щэрыоныр ашъхьарытыгъ. Ау ащ къыгъэщтагъэхэп.
Мэзаем и 23-м «Барс 16-м» икомандир, ащ игуадзэхэм ыкIи къахэщыгъэ зэолIхэм бгъэхэлъхьэ тамыгъэу «За заслуги перед Майкопским казачьим отделом» зыфиIорэр Александр Даниловым аритыжьыгъ.
Зыпсэ емыблэжьхэу текIоныгъэр къэзгъэблэгъэрэ тилIыхъужъхэм ящыкIагъэр ядгъэгъотыным мэхьанэшхо иI. ЦIыф лъэпкъ, дин ыкIи ныбжь зэфэшъхьаф зиIэхэр зэготхэу шIушIэ IэпыIэгъур къызэраугъоирэм уимыгъэгушхон ылъэкIырэп. ЦIыфхэм ыкIи дзэм зыкIыныгъэ зэрахэлъымкIэ пстэуми тафэраз! Екатерина Загорулько.