Шэуджэн районым щыщхэу дзэкIолI 63-рэ хэушъхьафыкIыгъэ дзэ опе­рациеу Украинэм щыкIорэм хэлажьэ. ЗэкIэми унагъохэр, сабыйхэр яIэх.

Ахэр ягупсэхэм къызэраухъу­мэщтыгъэхэм къыщамы­гъа­кIэу район администрациери, къоджэ псэупIэхэм япащэхэри, цIыф къызэрыкIохэри афэгу­мэкIых.

Район администрацием иIоф­хэм ягъэIорышIакIоу Джэнчэтэ Азэмат IэпыIэгъу Iоф­тхьабзэхэр зэрэзэхащэхэрэм тыщигъэгъозагъ.

— Районым икIыгъэ дзэ­кIолIхэм зэзэгъыныгъэкIэ нэбгырэ 11-рэ яшIоигъоныгъэкIэ операцием хэлажьэхэу нэбгыри 4-рэ ахэтых. ЗэкIэми яуна­гъохэм гупсэфыгъо арылъэп, къызыкIожьыщтхэр ашIэрэп, — еIо Азэмат.

— IэпыIэгъур нахьыбэу сы­да зыфэгъэзагъэр, сыд фэдэ Iофыгъохэр ара?

— ЩыкIагъэу яIэхэр зэфэшъхьафых. Мары унэгъо 11-мэ яунэхэм гъэстыныпхъэ шхъуан­тIэр джыри ящэлIагъэп. Хабзэм сомэ минишъэ зырыз ахэм къафитIупщыгъ, унэгъуи 9-м ахъ­щэр къаIэкIэхьэгъах. Еджа­кIохэр зиIэ унэгъо 20-мэ якIэлэцIыкIухэр ыпкIэ хэмылъэу еджапIэм щагъашхэх. Джащ фэдэу кIэлэцIыкIу IыгъыпIэхэм зисабый зыщэхэрэми ахъщэ арагъэтырэп.

— ЩыкIагъэ зиIэхэм ежь­-ежьырэу зыкъышъуфагъазэу мэхъуа?

— Ащ фэди мэхъу. Мары зи­унашъхьэ зыфагъэцэкIэжьыгъэ унагъо, гъэстыныпхъэ къызфащагъэхэр щыIэх. БэмышIэу зичэу зэблэхъугъэн фэе уна­гъом чэукIэм ишIын хэхьащт пстэури къыфащэфыгъ. Фагъэуцунэуи щытыгъ, ау ежьхэр зэ­рэфаехэу чэур ашIынэу рахъу­хьагъ.

— ЕгъашIэм адыгэхэр зэдеIэжьхэу, ягушIуагъуи, янэшхъэигъуи зэдагощхэу щы­тыгъ. Къуаджэхэм ащыпсэу­хэрэм а лъэпкъ шэн-хабзэр чIамынагъэу къысшIошIы…

— ЦIыфыгъэ зэхэтыкIэр нахь къызытхэщырэр цIыфхэр гумэкIыгъо зыхафэкIэ ары. Районым ис фермерхэм, предприни­мательхэм шIушIэ Iофхэр ащы­гъу­пшэхэрэп. Щысэ къэсхьын слъэкIыщт.

Хэгъэгум иухъумакIо и Мафэ бэмышIэу хэдгъэунэфыкIыгъ. хъызмэтшIапIэу «Асханым» ипащэ Украинэм щыIэ кIалэхэм яунагъохэр зэрытхэгъэ тхылъ фэдгъэхьазырынэу къыкIэлъэIугъагъ. Унэгъо 63-у зилъфыгъэ­хэр имысхэм зэкIэми укъэбзыгъахэхэу чэт тфырытф аратыгъ. Къоджэ псэу­пIэхэм лыр аIэкIагъэхьагъ, ахэм унагъохэм атырагощэжьыгъ.

— Ари псапэ. «Псапэ зы­шIэрэм къыIокIэжьы» аIо. Ыгу къыриIоу, хьалэлыгъэ хэлъэу къин зытелъым IэпыIэгъу фэ­хъугъэм ыцIэ къепIомэ емыкIу зыIохэрэри щыIэх.

— ДзэкIолIхэм яунагъохэм IэпыIэгъу афэхъухэрэр зэте­фыгъэх. Мары хъызмэтшIапIэу «Зарям» ипащэ ахъщэкIэ ишIуа­гъэ аригъэкIыгъ. ПсэупIэхэу За­ревэмрэ Дукмасовымрэ адэт тучанхэм цIыфхэм къырахьы­лIэрэ щы­гъынхэмрэ шхыныгъо­хэмрэ кIа­лэхэм афарагъащэх. ДакIоу ХьапэкIэ Мирэ ыдырэ щыгъынхэри Украинэм ащэрэ пкъы­гъохэм ахэлъых.

ЗэкIэми тафэраз. ЗишIуагъэ къэзыгъэкIорэ пстэуми «тхьа­шъуегъэпсэу» ятэIо.

— Азэмат, тхьамафэ къэс зэпымыгъэоу унэгъо 63-рэ къэпкIухьаныр, ящыкIагъэ зэбгъэшIэныр псынкIагъоп. Хэта IэпыIэгъу къышъуфэ­хъурэр?

— Анахьэу социальнэ Iофы­шIэхэмрэ волонтерхэмрэ. Унагъо пэпчъ зы волонтер епхыгъ. Унагъом ипсэукIи, щыкIагъэу иIэхэри ахэм ашIэ. Тхьамафэ къэс Iофхэм язытет район администрацием ипащэ лъытэгъэ­Iэсы. Къулыкъу пстэуми тызэдеIэжьызэ унагъохэм талъэплъэ, ящыкIагъэхэр афэтэгъэцакIэх.

— ГумэкIыгъо хэфэгъэ унагъохэу шъуздакIохэрэм ягупсэхэр къэкIожьыгъэхэу гушIуакIо шъуафэкIонэу, дзэ­кIолIхэм зэкIэми псаоу къагъэзэжьынэу тафэлъаIо.

ДэгущыIагъэр Шъаукъо Аслъангуащ.