Тыркуем ыкIи Шам ащыIэгъэ чIыгусысыным хэкIодагъэхэм яунагъохэм ыкIи ащ изэрар зэкIыгъэхэм Адыгеим икIэу шIушIэ IэпыIэгъоу тонн 40 фэдиз арагъэщагъ, ахъщэ IэпыIэгъоу къау­гъоигъэри макIэп.

АР-м и ЛIышъхьэу КъумпIыл Мурат мы лъэныкъом мэхьанэшхо ритыгъ, амалэу яIэмкIэ финанс IэпыIэгъу къафэхъун зылъэкIыщтхэм къэбарыр алъа­гъэIэсынэу пащэхэм пшъэрылъ афишIи, шIушIэ IэпыIэгъур къаугъоигъ ыкIи чIыпIэ къин ифагъэхэм аIэкIагъэхьагъ.

— Мы тхьамыкIэгъошхоу къэхъугъэм Адыгеим ис цIыфхэр лъэшэу ыгъэгумэкIыгъэх. Бэхэр фаехэу IэпыIэгъу афэхъугъэх, арышъ, а IофшIэныр шIуагъэ къытэу зэхэщагъэ хъугъэ, — къыIуагъ КъумпIыл Мурат.

Адыгеим ыкIи Пшызэ шъо­лъыр ащыпсэурэ быслъымэнхэм я ДиндэлэжьапIэ мы Iофтхьа­бзэм епхыгъэу зэкIэмкIи сомэ милли­они 6-м ехъу къыугъоигъ. Мы мэфэ благъэхэм Адыгеим щы­псэухэрэм ацIэкIэ ахъщэр Тыр­куем ыкIи Шам афагъэ­хьыщт.

Общественнэ движениеу «Адыгэ Хасэм» итхьаматэу ЛIымыщэкъо Рэмэзан къызэриIуагъэмкIэ, мы мафэм ехъу­лIэу сомэ миллиони 2-м ехъу къаугъоигъ, шIушIэ Iофтхьабзэр джыри лъагъэкIуатэ.

Ащ чанэу хэлэжьагъэх Адыге­им иволонтерхэр. Мы проектым изэхэщакIоу, предприниматель ныбжьыкIэу Пэнэшъу Саидэ къызэрэтиIуагъэмкIэ, Шам щыщ ныбжьыкIэхэм якультурнэ гуп­чэу Краснодар щыIэм ипащэу Аласми Ахмад игукъэкIыкIэ шIу­шIэ Iофтхьабзэр зэхащагъ.

— Социальнэ хъытыухэмкIэ Адыгеим щыщхэр къэбарым зыщытэгъэгъуазэхэм, шIушIэ Iоф­тхьабзэм чанэу къыхэла­жьэхэу аублагъ, тызэрэмыгугъа­гъэу бэмэ зыкъытфагъэзагъ. Щыгъын фабэхэр, гъомылапхъэ­хэр, кIэлэцIыкIу шхыныгъохэр, нэмыкIхэри IэпыIэгъур зыщаугъоирэ чIыпIэм къыращэлIагъэх. Къыхэгъэщыгъэн фае Адыгеим иапшъэрэ еджапIэхэм яволонтерхэм ыкIи Шам къикIыгъэ студентхэм яшIогъэшхо къызэ­рэтагъэкIыгъэр, — къыIуагъ Саидэ.

Iофтхьабзэм изэхэщакIо къы­зэриIуагъэмкIэ, зэкIэмкIи Адыге­им шIушIэ IэпыIэгъу тонн 30 — 40 фэдиз къыщаугъоигъ. Метри 6 зикIыхьэгъэ машини 3-м зэрарыфэу IэпыIэгъур Шам арагъэщагъ. Джыри мыщ фэдэ зы машинэшхо Налщык къекIы, ащ нэмыкIэу зы Москва кIуагъэ. Шъачэ ыкIи Налщык къащау­гъои­гъэхэри хэтэу тонн 50 фэ­диз Шам арагъэщагъ. Шъо­лъыр­хэм къаращыгъэхэр зэкIэ аугъоинхэшъ, Шам ипосольствэу Москва щыIэм IэкIагъэ­хьа­щтых.

Саидэ къызэриIуагъэмкIэ, Iофтхьабзэр зыщырагъэжьэгъэ апэрэ мафэм ятэу Аслъан IэпыIэгъу къыфэхъугъ, нэужым Адыгэ къэралыгъо университетым иволонтерхэр къыкъоуцуагъэх. Джащ фэдэу республикэм ирайонхэр мыщ чанэу къыхэлэжьагъэх, анахьэу къыхигъэщыгъэхэр Шэуджэн районым изэхэщэкIо купэу «Нурсан», къуаджэхэу Еджэркъуае ыкIи Фэдз щыщхэр арых.

АР-м щылэжьэрэ шIушIэ фондэу «Сделаем вместе» зыфиIорэм икIэщакIохэм ащыщэу Барцо Руслъан тызэрэщигъэ­гъозагъэмкIэ, Шам щыщхэм апае шIушIэ IэпыIэгъур къау­гъоигъ. Ащ лъэкI зиIэхэр, предпринимательхэр къыхэлэжьа­гъэх. Тэхъутэмыкъое районым къыщаугъоигъэр занкIэу Краснодар ащагъ. Псы, медицинэ Iэмэ-псымэхэр, щыгъын ыкIи техъо фабэхэр, гъомылэпхъэ зэфэшъхьафхэр, кIэлэцIыкIу шхы­ныгъохэр, нэмыкIхэри бэу къыращэлIагъэх. Станицэу Ханскэм дэт тучанэу «Фабрика Солнца» зыфиIорэм ипащэ дэ­гъэ бэшэрэб 600 ыкIи тхьац­у­хэкI къэмлэнэ 210-рэ къаригъэщагъ. Депутатэу Владимир Тростенецкэр, унэе предпри­нимателэу ЕхъулIэ Азэмат, пшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Комплекс Агро» зыфиIорэм ипащэу Александр Денисовыр шIушIэ IэпыIэгъум къыхэлэжьагъэх.

Шам щыщ ныбжьыкIэхэм якультурнэ гупчэу Краснодар щыIэм ипащэу Аласми Ахмад Шам щыпсэухэрэм ацIэкIэ рэзэныгъэ гущыIэхэмкIэ Адыгеим щыщхэм закъыфигъэзагъ. Къиныр зыщыщыр амышIэу, ахэкIыгъэм фэдишъэ пчъагъэ къахэхъожьынэу, шIоу щыIэр ягъогогъоу щыIэнхэу къафэ­лъэIуагъ.

КIАРЭ Фатим.