Адыгэхэм къуае зырахырэр зэман пасэм къыщегъэжьагъ. Мы лъэхъаным ар Адыгеим имызакъоу, Урысыем ичIыпIэ зэфэшъхьафхэми ащашIы, ау Урысыем и Апшъэрэ хьыкум унашъоу ышIыгъэмкIэ, адыгэ къое шъыпкъэкIэ алъытэрэр Адыгэ Республикэм къыщашIырэр ары. Адыгеир къызэрашIэжьырэ тамыгъэу ар хъугъэ.

Адыгэ къуаер зыфэдэм, идэгъугъэ, шIуагъэу хэлъхэм якъэ­бар мы лъэхъаным Африкэми нэсыгъ. Предпринимателэу, альпинистэу Роман Купиным гъусэхэр иIэхэу Африкэм анахь чIыпIэ лъагэу иIэм, вулканэу Килиманджаро ышъхьагъ дэ­кIуаий, адыгэ къуае щырихыгъ.

Роман а гухэлъыр бэшIа­гъэу къыздырихьакIыгъ, илъэс фэ­диз­рэ зыфигъэхьазырыгъ, илъэс 33-рэ зыщыхъугъэ мафэм те­фэу имурад къыздигъэхъугъ.

ИщыкIэгъэщт хьакъу-шыкъу­хэр — щыуаныр, къоялъэу яунэ къырихыгъэр, щыгъур зыдыдахьыягъэх. Къуаер африканкэ­хэм ячэмхэм къакIахыгъэ щэр ары зыхишIыкIыгъэр.

Роман игъусагъэх рекорд­сменэу Андрей Пароводрэ спортсменэу Максим Богатыревымрэ, африканцэу зы кIали ахэтыгъ. Ахэм апашъхьэ Роман адыгэ къуаер щырихыгъ. Ащ къызэриIуагъэмкIэ, адыгэ къуа­ем иихын зэрэмыкъиныр ыкIи охътабэ зэрэтемыкIуадэрэр зэ­кIэми агъэшIэгъуагъ. Ежь ар стырэуи, учъыIыгъэуи, гъэжъагъэуи, гъэгъугъэуи зэрашхырэр къафиIотагъ.

Африканкэхэм къуаер зэрипхыщт шIыкIэр агуригъэIуагъ, адрэхэм ежь якъуаехэр мэфищ- плIым щымылъхэу зэрамышхы­хэрэр къаIотагъ. Роман рихыгъэ къуаем щыщ зыIукIагъэхэм ари­гъэшхыгъ, ар агу рихьыгъ, щэ зиIэхэм зэкIэми псынкIэу адыгэ къуаер зэра­шIышъущтыр къагурыIуагъ.

Африкэм щыIэ вулкан лъагэу Килиманджаро ышъхьагъ адыгэ къуае зэрэщырахыгъэр тари­хъым хэхьагъ. УрысыемкIэ гъэ­­хъэгъэ гъунэпкъакIэхэр зышIыгъэхэр зыдатхэхэрэ Тхылъым ар дагъэхьагъ.

Максим Джэджэ районым къыщыхъугъ. Урысые ныбжьыкIэ общественнэ движениеу «Волонтерская Рота Боевого Братства» зыфиIорэм и Адыгэ шъолъыр къутамэ ипащ.