Мыекъуапэ цIыфхэр щызезыщэхэрэ общественнэ транспортыр агъэкIэжьыщт. Ащ пае федеральнэ программэу къэлэ общественнэ транспортым игъэкIэжьын фэгъэхьыгъэм Адыгеир зэрэхэлэжьэщтыр Адыгэ Республикэм псэолъэшIынымкIэ, транспортымкIэ, псэупIэ-коммунальнэ ыкIи гъогу хъызмэтымкIэ и Министерствэ иотдел ипащэу Сергей Толстиковым къыIуагъ. Илъэсэу къихьагъэм ыкIэ нэс лизинг шIыкIэм тетэу автобуси 10 къызэращэфыщтыр ащ къыхигъэщыгъ. Къалэм къыпэблэгъэ псэупIэхэм цIыфхэр зэрэнагъэсыщтхэм нэмыкIэу ахэр Мыекъуапэ иурамхэми атетыщтых. Президентэу Владимир Путиным къызэриIуагъэмкIэ, общественнэ транспорт ращэфынэу Урысыем ишъолъырхэм сомэ миллиард 250-рэ къафатIупщыщт. Ащ фэшъхьафэу Федеральнэ ЗэIукIэм фигъэхьыгъэ Джэпсалъэм къыщыхигъэщыгъ IэпыIэгъур къэлэ цIыкIухэмрэ къуаджэхэмрэ зэранэсыщтыр, ащ пае джыри сомэ миллиард 50 къызэрэхагъэхъощтыр.