Адыгэ Республи­кэм и ЛIышъхьэу КъумпIыл Мурат къызыхъугъэр непэ илъэс 50 хъугъэ.

Красногвардейскэ районым ит къуаджэу Улапэ ар къыщыхъугъ. Апшъэрэ экономикэ гъэсэныгъэ иI, пэщэ IэнатIэхэр ащиIыгъхэу хабзэм икъулыкъухэм илъэсыбэрэ Iоф ащишIагъ, АР-м и Правительствэ, АР-м и Къэралыгъо Совет — Хасэм пэщэныгъэ адызэрихьагъ. 2017-рэ илъэсым щылэ мазэм и 12-м Урысые Федерацием и Президентэу В. В. Путиным и УказкIэ Адыгэ Республикэм и ЛIышъхьэ ипшъэ­рылъхэр пIэлъэ гъэнэфагъэкIэ ыгъэ­цэкIэнхэу ыгъэнэфагъ. 2017-рэ илъэсым Iоныгъом и 10-м Адыгэ Республикэм и Къэралыгъо Совет — Хасэм идепутатхэм Адыгэ Рес­публикэм и ЛIышъхьэу ар хадзыгъ. Илъэсэу икIыгъэм а IэнатIэм епхыгъэ IофшIэныр джыри лъигъэкIо­тэнэу цыхьэ фашIыгъ. 2022-рэ илъэсым Iоныгъом и 11-м АР-м и Къэралыгъо Совет — Хасэм ия XIV-рэ зэхэсыгъо Адыгэ Респуб­ликэм и ЛIышъхьэ ихэдзынхэр щыкIуагъэх. Шъэф мэкъэтыным икIэуххэм къызэрагъэлъэгъуагъэмкIэ, Адыгэ Республикэм и ЛIы­шъхьэ IэнатIэкIэ КъумпIыл Мурат икандидатурэ зыкIыныгъэ ахэлъэу депутатхэм дырагъэштагъ.

КъумпIыл Мурат республикэм щыпсэухэрэм цыхьэшхо ыкIи лъы­тэныгъэ ин фашIы, бэ зэшIозыхын зылъэкIыгъэ ыкIи непи республикэм ихэхъоныгъэкIэ чанэу Iофыгъуабэ зэшIозыхырэ пащэу ар алъытэ. Iофэу зыфэгъэзагъэм ар фэ­шъыпкъ, Адыгеир шIу елъэгъу ыкIи щыIакIэу ащ илъыр нахьышIу хъуным пае фэлъэкIыщтыр зэкIэ ешIэ. Гъэхъагъэхэми ар къагъэшъыпкъэжьы. Непэ Адыгеир лъэныкъо зэфэ­шъхьафхэмкIэ хэгъэгум ишъолъыр анахь дэгъухэм ахалъытэ, гъогухэм яшIын, цIыфхэр зычIэсыщтхэ унэ­хэм ягъэпсын, социальнэ ин­фраструктурэм изэтегъэпсыхьан япсынкIагъэ хэхъо. Мурат Къэралбый ыкъом ежь ышъхьэкIэ, дэлажьэхэрэм, республикэм щыпсэу­рэ пстэуми Iофэу агъэцакIэрэм ар къыкIэкIуагъ.

КъумпIыл Мурат тиреспубликэ лъэныкъо пстэумкIи хэхъоныгъэ ышIынымкIэ, цIыфхэм ящыIакIэ нахьышIу хъунымкIэ амалышIухэр ягъэгъотыгъэнхэм епхыгъэ Iофыгъохэм зэшIохыкIэу афэхъущтхэм мафэ къэс адэлажьэ ыкIи ахэм ренэу ынаIэ атет. Республикэм и ЛIышъхьэ хэкIыпIэ зэфэшъхьафхэр къэзыгъотын зылъэкIырэ цIыф Iу­шэу, шIэныгъэу, IэпэIэсэныгъэу ыкIи къулайныгъэу иIэр щыIэны-гъэм дэгъоу щызыгъэфедэн зы­лъэкIырэ Iэшъхьэтетэу щыт.

Пшъэрылъ инхэр ащ ыпашъхьэ регъэуцох, республикэм ихэхъоныгъэкIэ проектышхохэм ягупшысэ ыкIи зэкIэлъыкIокIэ гъэнэфагъэ яIэу ахэр пхырещых. Ежьыри ренэу Iоф зыдэзышIэжьын зылъэкIырэ, икомандэ пытэу зэкъоуцонымкIэ шIыкIэ зэфэшъхьафхэр зыгъэфе­дэрэ, къэралыгъо пшъэрылъ къинхэр зэшIуихынхэм фэхьазыр, гъэ­хъагъэу ышIыгъэхэм къащымыу- цурэ пэщэ шъыпкъэу щытыр ары ащ фэдиз зыгъэцэкIэн зылъэкIыщтыр.

Республикэм и ЛIышъхьэ Iофыгъо ин е цIыкIу ыIоу зэхидзыхэрэп, лъэныкъо пэпчъ ар егъэгу­мэкIы, нахьышIоу, нахь тэрэзэу зэшIохыгъэ зэрэхъущтым пылъ.

Анахьэу КъумпIыл Мурат зыфэгумэкIырэр ыкIи зишIуагъэ зэригъэкIыхэрэр ащ иIэпыIэгъу лъэшэу фэныкъохэр ары. ЦIыфхэм ялыузи, ягуузи зэхишIэн зэрилъэкIырэм дакIоу унашъохэм яштэнкIэ теубытагъэ зыхэлъ цIыфэу ар щыт — шъолъырым щыпсэухэрэм Адыгеим и ЛIышъхьэ ащ фэдэ гущыIэхэр фаIох ыкIи тиреспубликэ джыри нахь зэтегъэпсыхьагъэ хъуным игугъапIэхэр рапхых.

«Адыгэ макъэм» щылажьэхэрэр ыкIи зэкIэ гъэзетеджэхэр Мурат Къэралбый ыкъом фаIогъэ пстэуми зэрадырагъаштэрэм дакIоу фэлъа­Iох псауныгъэ пытэ, щыIэкIэшIу иIэнэу, игуетыныгъэ къыкIимычэу джыри илъэсыбэ къыгъэшIэнэу!