Лъытэныгъэ зыфэтшIырэ Мурат Къэралбый ыкъор!
Адыгэ Республикэм инахьыжъхэм я Советрэ заомкIэ, IофшIэнымкIэ, уIэшыгъэ кIуачIэхэмкIэ ыкIи хэбзэухъумэкIо къулыкъухэмкIэ иветеранхэм (ипенсионерхэм) я Советрэ уиюбилей — уныбжь илъэс 50 зэрэхъурэм пае агу къадеIэу къыпфэгушIох!
Хабзэм ихъызмэт, игъэцэкIэкIо, ихэбзэихъухьэ къулыкъухэм гъэхъагъэ хэлъэу уащылэжьагъэу 2017-рэ илъэсым Адыгэ Республикэм пэщэныгъэ дызепхьэу уублагъ, цIыф жъугъэхэм япэщэ шъыпкъэуи ухъугъ. А илъэсхэм къакIоцI щыIэныгъэм илъэныкъо пстэуми Адыгеим гъэхъэгъэшIухэр ащишIыгъэх. ЭкономикэмкIэ, мэкъу-мэщымкIэ, социальнэ лъэныкъомкIэ, зекIонымкIэ мэхьанэшхо зиIэ проектыбэ республикэм щагъэцакIэ. Псауныгъэм икъэухъумэн, гъэсэныгъэр, культурэр, цIыфхэм ящыIэкIэ-псэукIэ хэпшIыкIэу нахьышIу мэхъу. Граждан обществэм хэхъоныгъэ езыгъэшIыщт Гупчэу зэхэпщагъэми гъэхъагъэ хэлъэу Iоф ешIэ. Нахьыжъхэм я Советрэ ветеранхэм я Советрэ ахэтхэм тхьауегъэпсэушхо къыуаIо узэрафэгумэкIырэм, унаIэ зэратебгъэтырэм афэшI. ПсэолъакIэхэр зэрашIыхэрэм дакIоу, тинахьыжъхэм илъэсыбэмэ къакIоцI агъэпсыгъэ пстэури къэухъумэгъэнхэмкIэ ыкIи гъэкIэжьыгъэнхэмкIэ республикэм Iофышхо зэрэщыбгъэцакIэрэм апае ахэр лъэшэу къыпфэразэх.
Лъытэныгъэ зыфэтшIырэ Мурат Къэралбый ыкъор, псауныгъэ пытэ, щыIэкIэ-псэукIэ дэгъу уиIэнэу, уигъашIэ кIыхьэ хъунэу, уигупсэхэмрэ къыппэблэгъэ цIыфхэмрэ укъауцухьэу, унасыпышIоу упсэунэу, Адыгей гупсэми, Урысыеми апае Iофэу епхьыжьэхэрэм тапэкIи гъэхъагъэхэр ащыпшIынэу тыпфэлъаIо!
ГъукIэлI Нурбый, Адыгэ Республикэм инахьыжъхэм я Совет итхьамат.
Къуаджэ Аслъан, Адыгэ Республикэм иветеранхэм я Совет итхьамат.