Мы аужырэ илъэсхэм волонтер движением мэхьэнэ ин раты ыкIи ащ хэтхэм япчъагъэ хэхъо зэпыт. ШIушIэным зегъэушъомбгъугъэныр ары зыфэIорышIэхэрэр.

АР-м игуфакIохэм ядвижение и Гупчэу «Волонтеры культуры» зыфиIорэм ипилотнэ проектэу «Добрятэр» ахэм зэу ащыщ. Чъэпыогъум къыщегъэжьагъэу ар щыIэныгъэм щыпхыращы. КIэлэцIыкIу IыгъыпIэхэм ачIэс­хэр яцIыкIугъом щыублагъэу шIушIэ Iофтхьабзэхэм ахэлэ­жьэнхэр ары пшъэрылъ шъхьа­Iэу ащ иIэр. Непэрэ мафэм ехъулIэу кIэлэцIыкIу IыгъыпIэхэу N N 18-р, 36-р ыкIи 38-р мыщ хэтых.

Республикэм зыщызыушъомбгъурэ проектыр зигукъэкIыр АР-м игуфакIохэм ядвижение и Гупчэу «Волонтеры культуры» зыфиIорэм ипащэу Валерия Кухлеевар ары.

— СиIофшIэнкIэ къалэу Кострома сыкIуагъэу бзылъфыгъэ горэм гущыIэгъу сыфэхъугъ, ар ны ныбжьыкI ыкIи волонтер. ИIофшIэн зэрэзэхищэрэр сшIогъэшIэгъон хъугъэ, анахьэу сабыйхэр къызэрэхигъэлажьэхэрэр сыгу рихыгъ. СыкъызэкIожьым сэри ащ фэдэ шIыкIэ згъэфедэнэу сыгу къихьагъ. Дунэе хъытыум къэбархэр къидгъэхьагъэх ыкIи шIоигъоныгъэ зиIэхэр къахэкIыгъэх. ЫпэрапшIэу кIэлэцIыкIу IыгъыпIэхэм япащэхэм, кIэлэпIу­хэм гущыIэгъу тафэхъугъ, нэужым ахэр кIэлэцIыкIу­хэм адэгущыIагъэх ыкIи яшIуагъэ къызэрагъэкIон алъэ­кIыщтыр ахэм ашIо­гъэшIэгъон хъугъэ. Янэ-ятэхэр тиIэпыIэгъухэу хэушъхьафыкIыгъэ дзэ операцием щыIэхэм пчъагъэрэ тишIуагъэ ядгъэкIыгъ, агу къыдэзыщэещт видеороликхэр, сурэтхэр, письмэхэр афэдгъэхьыгъэх, — еIо Валерия Кухлеевам.

Мы Iофтхьабзэм ишIуагъэкIэ сабыим ицIыкIугъом къыщегъэ­жьагъэу IэпыIэгъу зищыкIагъэм ишIуагъэ ригъэкIын зэрэфаер къыгурэIо, ар шэнышIу фэхъу.

Къыхэгъэщыгъэн фае респуб­ликэм щызэхащэгъэ пилотнэ про­ектым ымакъэ чыжьэу зэрэ­Iугъэр. ТикIэлэцIыкIухэм ясурэт­хэр «Волонтеры культуры» зыфиIорэ гупчэм пылъагъэх. ЗэхэщакIохэм опытэу аIэкIэ­лъым­кIэ адэгощэнхэу нэмыкI шъолъырхэм ялIыкIохэм закъы­фагъазэ. Нэбгырэ 30-кIэ рагъэ­жьэгъагъ, джы нэбгырэ 70-м ехъу хэт, пчъагъэм хэхъо зэпыт.

«Добрята» зыфиIорэ проектым анахь чанэу хэлажьэхэрэм ащыщ кIэлэцIыкIу IыгъыпIэу N 36-р. БэмышIэу ащ тыщыIагъ, мы лъэныкъомкIэ яIофшIэн зэрэзэхащэрэм зыщыдгъэгъозагъ. ЗыныбжькIэ нахьыжъхэр ыкIи гурыт еджапIэм фагъэхьазырхэрэр ары мыщ хэхьагъэхэр. КIэлэпIухэу Елена Богорубовам, Думэнышъ Мае, Любовь Пеховкинам, педагог-психологэу Ольга Удоденкэм мы пшъэры­лъыр агъэцакIэ. Гурыт купым ис кIэ­­лэцIыкIухэри IэпыIэгъу къафэ­хъух, ащ кIэлэпIоу ахэтыр Ири­на Анистратенкэр ары.

КIэлэцIыкIухэр мэфэкI шIыкIэм тетэу волонтерхэм ахэ­хьагъэх, ар къэзыушыхьатырэ гал­стукхэр къадалъхьагъэх, сертификатхэр къаратыжьыгъэх. Нэужым ахэр агъэчэфыгъэх, псым сурэтхэр зэрэтепшIыхьащтыр, пшахъокIэ сурэтхэр зэ­рэпшIыщтыр кIэлэцIыкIухэм ашIогъэшIэгъоныгъ. Джащ фэдэу аниматорхэр ягъусэхэу джэгугъэх.

— Апэрэ мафэм къыщегъэ­жьагъэу хэушъхьафыкIыгъэ дзэ операцием хэтхэм IэпыIэгъу тазэрафэхъущтыр, кIэлэцIыкIухэм патриотическэ пIуныгъэ зэра­хэтлъхьащтыр ары тызыпылъыр. ШIушIэкIо цIыкIухэри, ахэм янэ-ятэхэри Iофтхьабзэу зэхатщэхэрэм ягуапэу къахэлажьэх. Апэрэ шIушIэ IэпыIэгъум къыды­хэлъытагъэу щыгъын фабэхэр ядгъэщэгъагъэх. ИлъэсыкIэм ехъулIэу шхынхэр ыкIи нахь ящыкIэгъэщт пкъыгъохэр тыугъоигъэх, дахэу дгъэкIэракIэхи, ядгъэ­хьыгъэх. Ахэм ахэлъыгъэх кIэлэцIыкIухэм ашIыгъэ сурэтхэр, яписьмэхэр, тхакIэ джыри зымышIэхэ­рэм къаIорэр кIэлэпIухэм ат­хыгъ. ИлъэсыкIэм ехъу­лIэу дзэкIолIхэм IэпыIэгъур зэраIукIагъэр ыкIи къызэрэтфэразэхэр къизыIотыкIырэ видеотехыгъэ къытфы­ра­­гъэхьыжьыгъ, ар тигуапэ хъугъэ, — еIо кIэлэпIоу Любовь Пеховкинам.

КIэлэцIыкIухэм пшъэрылъэу яIэр дэгъоу къагурэIо. Унэм кIожьыгъэхэми нахьыжъхэм къафаIуатэ. Яхэгъэгу шIу алъэ­гъоу къэтэджых. Джыри цIыкIух нахь мышIэми, Урысыем, Адыгеим ябыракъхэр дэгъоу ашIэ, дзэкIолIхэм тикъэралыгъо къызэраухъумэрэр зэхашIыкIы.

— Тисабыйхэм гукIэгъу ахэлъынэу тэгъасэх. ДжэгукIэ шIыкIэм тетэу яхэгъэгу шIу алъэгъун зэрэфаер къагурэтэгъаIо, нахьыжъхэм шъхьэкIафэ афашIынэу тэпIух. Блокадэ хьалыгъум имафэ ехъулIэу тицIыфхэр къинэу зыхэтыгъэхэр къа­фэтIотагъ. Зэо лъэхъаным ашхыщтыгъэ хьалыгъу такъыр цIыкIур зыфэдизыгъэр ядгъэлъэгъугъ. Шхыным уасэ фашIын зэрэфаер ятэIо.

ШIушIэным мэхьанэшхо зэриIэр кIэлэцIыкIухэм зэхашIэн фае, — къа­Iуагъ кIэлэпIухэу Елена Богорубовамрэ Думэнышъ Маерэ.

Хэгъэгум иухъумакIо и Мафэ ехъулIэу «Добрята» зыфиIорэм хэтхэм ыкIи хэхьан гухэлъ зи­Iэхэм хэушъхьафыкIыгъэ дзэ операцием хэлажьэхэрэм Iэпы­Iэгъу афаугъоигъ. МэфэкIым ехъулIэу IэпыIэгъур анэсыгъ, зэкIэмкIи къэмлани 7 хъущтыгъ. Ахэм шхын зэфэшъхьафхэр, щай, кофе, Iэзэгъу уцхэр, сабынхэр, зызэраупсыщт Iэмэ- псымэхэр ыкIи нэмыкIхэр адэлъыгъэх.

Джащ фэдэу кIэлэцIыкIухэм къашIыгъэ концертыр видеокIэ тырахи, афырагъэхьыгъ. Ахэм къаIорэ орэдхэр, усэхэр километрэ пчъагъэкIэ яунэмэ апэ­чыжьэ дзэкIолIхэм ягукъыдэщэегъу хъугъэ.

ДЕЛЭКЪО Анет.