Хэгъэгу зэошхом илъэхъан Адыгеим нэмыц-фашист техакIохэр рафыжьхи, тишъолъыр шъхьафит зашIыжьыгъэр илъэс 80 зэрэхъурэм фэгъэхьыгъэ Iофтхьэбзабэ республикэм щызэхащагъ. Ахэм ащыщ гурыт еджапIэу N 17-м «лIыхъужъныгъэм идесэу» щыкIуагъэр.

Iофтхьабзэм пшъэрылъ шъхьаIэу иIагъэр ТекIоныгъэр къыдэзыхыгъэхэр кIэлэеджакIохэм ащымыгъуп­шэхэу, лъытэныгъэ афашIэу, патриотизмагъэ ахэлъэу пIугъэнхэр ары. Пэублэ классхэм якIэлэегъаджэхэу Къудайнэт Сусан, Анастасия Калининар, тхылъеджапIэм ипащэу Елена Бойко ащ кIэщакIо фэхъугъэх.

Мамырныгъэм фэбэнэгъэ тинахьыжъхэм къытфашIагъэр зыщыдгъэгъупшэ зэрэмыхъущтыр, ахэм яшIэжь сыдигъокIи дгъэлъэпIэн зэрэфаер кIэлэеджакIохэм агурагъэIуагъ, щысэхэмкIэ къафаIотагъ.

— Хэгъэгу зэошхом икъин, ихьазаб, имашIо зынэмысыгъэ унагъо тихэгъэгу исэп. Заом щыфэхыгъэ цIыфхэм яшIэжь дгъэлъэпIэн фае. Мамырныгъэм фэбэнэгъэ тинахьыжъхэм къытфашIагъэр зыщыдгъэгъупшэ хъущтэп. Ветеран шъуиунагъо исмэ е шъуигъунэгъоу щысмэ къэблэгъэрэ мэфэкIымкIэ шъуафэгушIу, — къыIуагъ Елена Бойко. Хэгъэгу зэошхор тарихъым зэрэхэхьагъэр, ащ къэ­барэу пылъхэр кIэлэеджакIохэм нэужым къафаIотагъэх. Адыгеим икIыгъэ нэбгырэ мин 80-м ехъу заом хэлэжьагъ, псэемыблэжьэу пыим ебэныгъэх. Нэбгырэ мин 33-м къагъэзэжьыгъэп. ТичIыгогъу лIы­хъужъхэу Андырхъое Хъусен, Женя Поповым, Ацумыжъ Айдэмыр, Дмитрий Зюзиным, Нэхэе Даутэ ыкIи нэмыкIхэм ясурэтхэр аIыгъхэу лIыблэнагъэу зэрахьагъэр къаIотагъ. Ар къекIолIэгъэ кIэлэцIыкIухэм лъэшэу ашIогъэшIэгъоныгъ, хьазабэу ахэр зыхэтыгъэхэр къагурыIуагъ. Джащ фэдэу заом фэгъэхьыгъэ усэхэр, орэдхэр къаIуагъэх.

— КъыткIэхъухьэрэ лIэужхэм тарихъыр ашIэным, яхэгъэгу шIу алъэгъуным афэшI патриотическэ Iоф­тхьабзэхэр бэу зэхэтэщэх. Аныбжь емылъытыгъэу ахэр ашIогъэшIэгъоных кIэлэцIыкIухэм, ятэжъ пIашъэ­хэм афэгъэхьыгъэ къэбархэр къаIуатэх, — еIо кIэ­лэегъаджэм.

«ЛIыхъужъныгъэм идесэ» зэрэшIогъэшIэгъоны­гъэр Богдан Южаниным къытиIуагъ. ЛIыхъужъхэм ацIэ ыгу риубытэщт, нахь игъэкIотыгъэу афэгъэхьыгъэ къэбархэр зэригъэшIэщтых.

Дарина Тарасовам Хэгъэгу зэошхом илъэхъан лIыхъужъныгъэ зезыхьагъэхэм афэгъэхьыгъэу зэхихыгъэр зэкIэ шIогъэшIэгъоныгъ. Ащ ятэ хэушъхьа­фыкIыгъэ дзэ операцием хэлажьэ.

ТекIоныгъэ къы­дахыгъэу къагъэзэжьыным зэрежэхэрэр пшъэшъэжъыем къыхигъэщыгъ.

ДЕЛЭКЪО Анет. Сурэтыр Iэшъынэ Аслъан тырихыгъ.