Урысые Федерацием и Президентэу Владимир Путиныр УФ-м и Федеральнэ ЗэIукIэ илъэс къэс фигъэхьырэ Джэ­псалъэм непэ, мэзаем и 21-м, къеджагъ. ФедерациемкIэ Советым хэтхэр, УФ-м и Къэра­лыгъо Думэ идепутатхэр, федеральнэ министрэхэр, Конституционнэ ыкIи Апшъэрэ хьыкумхэм ятхьаматэхэр, шъолъырхэм япащэхэр, динлэжьхэр, общественнэ IофышIэшхохэр Iофтхьабзэм хэлэжьагъэх.

УФ-м и Президент мыгъэ Джэпсалъэу къышIыгъэр хэушъхьафыкIыгъэ дзэ операциеу Украинэм щыкIорэр, хэгъэгу кIоцI Iофхэр, социальнэ политикэр, экономикэр ары нахьыбэу зыфэгъэхьыгъагъэр.

ХэушъхьафыкIыгъэ дзэ операцием игугъу къышIыным ыпэ­кIэ IэкIыб къэралхэм, анахьэу КъохьапIэм щыIэхэм, къыкIагъэ­стымэ, IашэкIи, мылъкукIи къы­деIэхэзэ Украинэм Донбасс зао зэрэщырагъэшIыхьагъэм, етIупщыгъэу джыри IэпыIэгъу къызэрэфэхъухэрэм, ары пакIошъ, ядернэ Iашэм игугъу зэрашIыгъэм, мамыр зэзэгъыныгъэу Урысыер зыфэхьазырыгъэм къызэрэрамыгъэуцолIагъэм, тикъэралыгъо зэпстэумкIи къызэрагъэмысэрэм, тарихъыр нэмыкIэу къагъэлъэгъонэу зэ­рэуцугъэхэм къатегущыIагъ. США-м IэкIыб хэгъэгухэм зэо-зэпэуцужьэу аришIыхьагъэ­хэм нэбгырэ мин 900-м ехъу ахэкIодагъ, миллион 30 фэдизмэ ашъхьэ къырахьыжьэжьыгъ.

ХэушъхьафыкIыгъэ дзэ операцием нэмыкI хэкIыпIэ зэрэщымыIэжьым фэшI ар зэраублагъэр къыхигъэщызэ, Украинэм цIыфэу исхэм зао зэрарамышIылIагъэм Владимир Путиным къыкIигъэтхъыгъ.

Урысыем идзэ хэтэу, мобилизацием хэфагъэу, медицинэм иIофышIэу, волонтерэу, псэолъэ­шIэу, мэшIоку гъогум иIофышIэу, водителэу, журналистэу, нэмыкIэу хэушъхьафыкIыгъэ дзэ операцием хэлажьэхэрэм, ахэм янэ-ятэхэм, яунагъохэм, культурэм иIофышIэу, динлэжьэу, предпринимателэу, мэкъумэщ хъызмэтым щылажьэу ахэм ящыкIагъэр аIэкIэгъэхьэгъэным пылъхэм, IэпыIэгъу афэхъухэ­рэм, къэралыгъом иэкономикэ зыпкъ итыным зиIахь хэзылъхьэ­хэрэм зэкIэми лъэшэу зэрафэразэр Президентым къыIуагъ. Анахьэу лIыблэнагъэ зэрахьэзэ Iашэ зыIыгъэу нацистхэм апэуцужьхэрэм, ахэм янэ-ятэхэм, яунагъохэм шъхьащэ зэрафишIырэм къыкIигъэтхъыгъ.

Мыщ дэжьым хэушъхьафыкIыгъэ дзэ операцием хэлажьэу, Донбасс ицIыфэу хэкIодагъэхэм апае зы такъикърэ шъыгъуа­гъэх.

Джащ фэдэу къэралыгъом ипащэ СВО-м хэлажьэхэрэм ялIыблэнагъэ джыри зэ къыкIигъэтхъыжьзэ, ащ хэкIодагъэхэм ыкIи ветеранхэм IэпыIэгъу яты­гъэным фэгъэзэгъэнэу, къэра­лыгъо Фонд зэхэщэгъэнэу игъо ылъэгъугъ ыкIи ащкIэ пшъэрылъ гъэнэфагъэхэр къышIыгъэх.

Ащ нэмыкIэу хэушъхьафыкIыгъэ дзэ операцием хэлажьэ­хэрэм илъэсныкъом зэ мэфэ 14 зыгъэпсэфыгъоу аратынышъ, янэ-ятэхэм, яунагъохэм ахагъэ­хьажьынхэу, гъогум зэрэтетыщтхэ мафэхэр ащ хэмылъытэгъэнхэу унашъо къышIыгъ.

Нэужым Владимир Путиным къэралыгъом иэкономикэ зыфигъэзагъ. Пстэумэ апэу Къо­хьапIэр зэрэмыгугъагъэу Урысыем иэкономикэрэ гъэIорышIэнымкIэ исистемэрэ пытэу къызэрэчIэкIыгъэхэр къыхигъэщыгъ. Ащ илъэныкъуабэхэм, къыдагъэ­кIырэм къыщагъэкIэныр ахэгъэ­кIыри, хагъахъозэ лъэкIуатэх. IэкIыб къэралхэр Урысыер къы­зэтыраIэжэным ыуж итых нахь мышIэми, унэе бизнесым зэхъокIыныгъэхэм псынкIэу задигъэзэн зэрилъэкIыщтыр къыгъэшъыпкъэжьыгъ.

Владимир Путиным мэкъу-мэщым иIофышIэхэм зафигъазэзэ, лэжьыгъэ бэгъуагъэ къизыхы­жьыгъэхэм шъхьащэ зэрафишIырэм къыкIигъэтхъыгъ.

— Урысыем иэкономикэ щынагъоу ыпэ къикIыгъэ пстэур къызэпичыгъ, джы хэхъоныгъэхэр езыгъэшIыщт гъогум тещэгъэныр пшъэрылъ шъхьа­Iэхэм ащыщ, — къыIуагъ Президентым.

ПсэупIэ-коммунальнэ хъыз­мэтым щыкIэгъабэ иIэ зэрэхъу­гъэр къыхигъэщызэ, илъэсипшI благъэм сомэ триллиони 4,5-рэ ащ халъхьан гухэлъ зэрэщыIэр къыIуагъ.

Кадрэхэм ягъэхьазырын фытегъэпсыхьагъэуи пшъэрылъ къышIыгъ. Электроннэ промышленностым, робототехникэм икъы­дэгъэкIын, машинэшIыным, металлургием, фармацевтикэм, мэкъумэщ хъызмэтым, псэолъэ­шIыным, транспортым, нэмыкI­хэм апае илъэситфым къыкIоцI специалист нэбгырэ миллионым къыщымыкIэу гъэхьазырыгъэным ар фэгъэхьыгъ.

— НыбжьыкIэхэм Iоф­шIэпIэ чIыпIэхэр агъотынхэ, ясэнэхьаткIэ хэхъоныгъэхэр ашIынхэ фае, — къыкIигъэтхъыгъ Владимир Путиным. Президентым къызэриIуа­гъэмкIэ, лэжьэпкIэ анахь макIэр процент 18,5-кIэ къаIэтыщт ыкIи сомэ 19242-рэ ар хъущт.

Индексациеу агъэнэфагъэм 2024-рэ илъэсым ищылэ мазэ и 1-м къыщыублагъэу джыри проценти 10 хэхъощт.

Унагъом кIэлэцIыкIум иегъэ­джэн ахъщэу пэIуигъахьэрэм пае социальнэ хэбзэIахьэу къызэрагъэгъэзэжьырэм хагъэ­хъонэу Президентым игъо ылъэ­гъугъ. Илъэсым ытыгъэм щыщэу сомэ мин 50-м ипроцент 13-м непэ къегъэзэжьымэ, а пчъагъэр сомэ мини 110-рэ ашIыщт.

Ныр е тыр зэреджэрэм, псауныгъэм изэтегъэуцожьын е Iэзэгъу уцхэм илъэсым апэIуагъахьэрэм щыщэу сомэ мини 120-м ипроцент 13-мэ непэ хэбзэIахьэу къатыжьыщтыр зытелъытагъэр, ар сомэ мини 150-м нагъэсыщт.

— ЕджапIэхэм ягъэ­кIэжьын фэгъэхьыгъэу программэшхо ттIупщыгъэ, — къыIуагъ Владимир Путиным. — Илъэ­сым ыкIэм нэс еджэпIэ 3500-рэ гъэкIэ­жьыгъэ хъущт. Ахэм янахьыбэр къоджэ псэупIэхэр ары зыдэтыр.

ХэкIитэкъупIэхэми къэ­ра­лыгъом ипащэ ягугъу къы­шIыгъ. Пыдзафэхэр зыщызэ­тыратэкъо­гъэ чIыпIэхэмрэ щынагъо къэзытырэ псэуалъэ­хэмрэ ягъэкIодын агъэпсын­кIэным фэшI ащ фэдэу къэралыгъом итхэм яспискэ охъ­тэ кIэкIым къагъэ­хьазырын фае.

Транспортым, шъолъырхэм яинфраструктурэ хэхъоныгъэхэр ышIынхэм сомэ миллиард 250-рэ пэIуагъэхьащт. Субъектхэм транспортыр агъэкIэжьыным пае ащ нэмыкIэу джыри сомэ миллиард 50 афатIупщыщт. Къэ­лэ цIыкIухэмрэ къоджэ псэупIэ­хэмрэ нахьыбэу анаIэ атырагъэтынэу Президентым унашъо къафишIыгъ.

— Псауныгъэм икъэ­ухъумэнкIэ къулыкъум игъэкIэжьынкIэ анахь шъхьаIэр пчъагъэхэр арэп, цIыфхэм медицинэ фэIо-фашIэхэр нахь къыз­IэкIэгъэхьэгъошIу зэрафэхъугъэр зэхашIэныр ары, — къыкIигъэтхъыгъ Владимир Путиным медицинэм фэ­гъэхьыгъэу.

УФ-м и Президент Джэпса­лъэр къызщишIыгъэ Iофтхьабзэм АР-м и ЛIышъхьэу КъумпIыл Мурат, АР-м и Къэралыгъо Совет — Хасэм и Тхьаматэу Владимир Нарожнэр, УФ-м ФедерациемкIэ и Совет хэтхэу Хъопсэрыкъо Мурат, Александр Наролиныр, УФ-м и Къэралыгъо Думэ идепутатхэу Владислав Резник, Хьасанэкъо Мурат, УФ-м IофшIэнымкIэ и ЛIыхъу­жъэу, лъэпкъ тхакIоу МэщбэшIэ Исхьакъ хэлэжьагъэх.

— Президентым и Джэ­псалъэ хэбзэ къулыкъу­хэм Iоф зэрашIэщтыр къыщигъэнэфагъ, — къыIуагъ Къум­пIыл Мурат. — Къэралыгъом ипащэ итезис пэпчъ охътэ къи­ным хэгъэгум хэхъоныгъэхэр езыгъэшIыщт ыкIи экономикэ-социальнэ зыпкъитыныгъэм фэIорышIэщт лъэбэ­къухэр къыхэгъэщыгъэх. Президентыр кIэщакIо зыфэхъугъэхэм тинеущырэ мафэ зыфэдэщтыр къагъэлъагъо. ЧIыпIэ хэбзэ къулыкъухэр зыфэгъэзэгъэщтхэм мэхьанэшхо иI. Ащ къи­кIырэр тиIофшIэн псынкIэу ыкIи шIуагъэ къытэу зэшIотхыныр ары. Президентым пшъэ­рылъэу къытфи­гъэуцугъэхэр хэзыгъэ имыIэу пхырытщыщтых, ащ пае къэралыгъо IэпыIэгъури, тэ амалэу тиIэхэри дгъэфедэщтых. Охътэ благъэм тикомандэкIэ Джэпсалъэр нахь куоу зэхэтфынышъ, Владимир Путиным зигугъу къышIыгъэр зэкIэ Адыгеим щыгъэцэкIагъэ зэрэхъущтыр тыухэ­сыщт.

Адыгеим федеральнэ IэпыIэгъур ыгъэфедэзэ цIыфхэм ящы­IакIэ нахьышIу шIыгъэнымкIэ чIыпIэ мыдэеу ыубытыгъэр къы­зэтыригъэнэн ыкIи хэхъоныгъэхэр ышIынхэ ылъэкIыгъ. Инвестиционнэ проектхэм ягъэ­хьазырынкIэ я 13-рэ чIыпIэм республикэр щыт. Социальнэ газификацием фэгъэхьыгъэ пшъэрылъэу УФ-м и Президент къышIыгъэхэр апэ итэу пхырызыщыхэрэм Адыгеир ащыщ.

Зыгъэхьазырыгъэр ХЪУТ Нэфсэт.