ГидрометеорологиемкIэ ыкIи тыкъэзыуцухьэрэ дунаим иуплъэкIункIэ Гупчэм къызэриты­гъэмкIэ, нэгъэупIэпIэ­гъум метрэ 28-м нэс зи­лъэшыгъэ жьыбгъэ­шхоу непэ Адыгеим къыщилъыгъэм гумэкIы­гъуабэ къызди­хьыгъ. Мыекъуапэ, Мыекъопэ ыкIи Джэджэ районхэм псэуалъэхэр ащигъэфыкъуагъэх. Мыекъуапэ дэт къатыбэу зэтет унэхэу къэ­лэ гупчэм итхэм ащыщ ышъхьэ изы Iахьэу квадрат метрэ 30 хъурэр жьыбгъэм къытыри­тхъыгъ. Мы хъугъэ-шIагъэм зыпари хэкIодагъэп ыкIи шъобжхэр тещагъэхэ хъугъэп. Ау интернет нэкIубгъохэм ащыщ къызэрэрагъэхьагъэмкIэ, зы автомобиль ыгъэфыкъуагъ. Зэпахырэ узхэмкIэ сымэджэщми, «Адыгэ макъэр» зычIэтми яунашъ­хьэхэм ащыщ Iахьхэр къатыритхъыгъ.

Джащ фэдэу жьыбгъэшхоу къилъыгъэм ыпкъ къикIэу Мые­къуапэ ирайон цIыкIухэм ащыщхэм, Мыекъопэ районым ипсэупIи 5-мэ электричествэ рыкIуапIэхэр ащызэщигъэкъуагъ, ау охътэ кIэкIым электрическэ сетьхэм яIофышIэхэм гумэкIыгъор дагъэзыжьыгъ. Къыхэгъэщыгъэн фае, а IофшIэныр зэшIопхыныр IэшIэхыгъэп жьыбгъэ­шхом пэшIуекIохэзэ зэрагъэцэкIагъэм ыпкъ къикIэу.

ЧIыпIэ зэфэшъхьафхэм чъыг­хэр къащыритхъыгъэхэуи агъэу­нэфыгъ.

Адыгэ Республикэм и ЛIышъхьэ IофшIэгъу дэкIыгъо иIэу щы­тыгъэми, хъурэ-шIэрэм ынаIэ тыригъэтыгъ.

— СиIофшIэгъухэм зэпхыныгъэ адысиIэ зэпыт, респуб­ликэм щыкъэбархэм сащыгъуаз. Жьыбгъэм къызыдихьыгъэ гумэкIыгъохэм ядэгъэзыжьын псынкIэу зэшIуахынэу, анахьэу электричествэр псэупIэхэмрэ социальнэ псэуалъэхэмрэ аIэкIагъэхьажьынэу пшъэрылъ афэзгъэуцугъ. Нахьыбэр зэшIуахыгъ, гъэлъэшыгъэу аварийнэ къулыкъухэм Iоф ашIэ, — къащитхыгъ КъумпIыл Мурат социальнэ хъытыухэм ыкIи цIыф­хэр зыфэсакъыжьынхэу къя­джагъ.

Мыекъуапэ ипащэу Геннадий Митрофановым жьыбгъэшхом ыпкъ къикIэу республикэм икъэ­лэ шъхьаIэ гъэлъэшыгъэ ухьазырыныгъэ зэрэщагъэнафэрэмкIэ макъэ къыгъэIугъ. Непэ мафэм сыхьатыр 2-м къыщыублагъэу къулыкъухэу ошIэ-дэмышIэ хъугъэ-шIагъэхэм ядэгъэ­зыжьын фэгъэзагъэхэм чэщи мафи Iоф ашIэным техьагъэх. псынкIэу чIыпIэхэм анэсынхэ, электроэнергие рыкIуапIэхэр зэщыкъуагъэхэмэ, чъыгхэр итхъыгъэхэмэ ыкIи нэмыкI хъу­гъэ-шIагъэхэр къэхъу­гъэхэмэ дэзыгъэзыжьыщтхэр ахэр арых.

Анахьэу анаIэ зытрагъэтыщтхэр щыIэныгъэмкIэ мэхьанэ зиIэ ыкIи гъэстыныпхъэ-энергетическэ хъызмэтым япхыгъэ псэуа­лъэхэр арых.

УФ-м ошIэ-дэмышIэ IофхэмкIэ и ГъэIорышIэпIэ шъхьаIэу АР-м щыIэр цIыфхэм къяджэ сакъыныгъэ къызхагъэфэнэу, егъэзыгъэ дэдэу щымытмэ яунэхэм къарымыкIынхэу. Жьыбгъэшхом зыщыуухъумэзэ, унэбгъухэм уаго­тэу умызекIомэ нахьышIу, сыда пIомэ унашъхьэхэр ыкIи нэмыкI бгъагъэхэр къефэхынхэ ыкIи къыптефэнхэ ылъэкIыщт. Джащ фэдэу общественнэ транспорт уцупIэхэми уащысакъын фае, электричествэ рыкIуапIэхэм ачIэгъ учIэуцо хъущтэп, зыго­рэкIэ ар къефэхыгъэу урихьылIагъэмэ, утемыуцоу къэуухьанэу щыт.

ОшIэ-дэмышIэ Iоф къэхъугъэу шъурихьылIагъэмэ, къэгъэнэжьа­кIохэм языкI телефон номерэу 01-м ыкIи 101-м, джащ фэдэу УФ-м ошIэ-дэмышIэ IофхэмкIэ и Министерствэ и ГъэIорышIэпIэ

ШъхьаIэу АР-м щыIэм ителефон номерэу 8 (8772) 56-80-78-м шъуатеу.

ГидрометеорологиемкIэ ыкIи тыкъэзыуцухьэрэ дунаим лъыплъэгъэнымкIэ Гупчэм къызэритыгъэмкIэ, непэ къыщегъэжьагъэу мэфищым къыкIоцI жьыбгъэр нахь Iэсэжьыщт, макIэу ощх-ос зэхэлъ къехыщт.

КIАРЭ Фатим.