Мыекъопэ къэлэ администрацием физическэ культурэмкIэ ыкIи спортымкIэ и Комитет Урысые общественнэ движениеу «Народный фронт» ыкIи «Адыгэ Республикэм иолимпийскэ Совет» зыфиIохэрэр иIэпыIэгъухэу Iофтхьабзэу «Жэжъые биатлоныр» яплIэнэрэу рагъэкIокIыгъ.

Мыщ хэлэжьагъэхэм апае пред­принимательхэм IэшIу-IушIу­хэр, нэмыкI шIухьафтынхэр къагъэхьазырыгъэх.

Iофтхьабзэм изэхэщэнкIэ анахь шъхьаIэу щытыгъэр ос щыIэныр ары. Ар тхьамафэм къыкIоцI гъогогъуитIо рагъэкIокIыгъ, а мафэхэм Мыекъуапэ къызэрэщесыгъэм ишIогъэшхо къэкIуагъ. Зэнэкъокъум хэлажьэхэрэм пшъэрылъ шъхьаIэу яIагъэр гъэ­пщыгъэ жэжъыехэм арысхэу метрэ 200 къачъыныр ыкIи гъогогъуи 5 оскIэ щэрыонхэр ары. БлэукIыхэрэм тазыр атыралъхьэщтыгъ, метрэ 30 фэдиз лыеу къачъыщтыгъ.

Зэнэкъокъум командэ 47-рэ хэлэжьагъ. КIэлэцIыкIухэр, зэхэпхъагъэу щытхэр, хъулъфыгъэхэр, бзылъфыгъэхэр текIоныгъэм ыкIи хагъэунэфыкIырэ чIыпIэхэм афэ­бэнагъэх. Командэ пэпчъ нэбгыритIу хэтыгъ.

ТекIоныгъэр къыдэзыхыгъэхэм ащыщых Ренат ыкIи Ратмир Згодхэр, Игорь ыкIи Арина Жуковхэр, Анастасия Зыряновар ыкIи Вероника Сохоцкаяр, Виталий ыкIи Дмитрий Заевхэр.

Зэнэкъокъум хэлэжьагъэхэм зэкIэми дипломхэр афагъэшъошагъэх. Ау пстэуми анахь шъхьа­Iэр ахэм япсауныгъэ зэрагъэпытагъэр, зэрэчэфыгъэхэр ары.

ЦIыфхэм мы Iофтхьабзэр лъэ­шэу агу рихьыгъ, зэхэщакIохэм, ахэм IэпыIэгъу къафэхъугъэхэм афэрэзагъэх.