АР-м и Лъэпкъ тхылъеджапIэ крае­веде­ниемкIэ­ ыкIи лъэпкъ литературэмкIэ иотдел ыгъэхьазырыгъэ библиолек­то­риеу «Непокоренная. Освобож­денная» зыцIэр Адыгеир шъхьафит зэрашIыжьыгъэм фэгъэхьыгъагъ.

КъыткIэхъухьэхэрэм Хэ­гъэгу зэошхом итарихъ ягъэшIэгъэныр, ащкIэ литературэу щыIэм фэгъэ­нэIосэгъэнхэр ыкIи лIы­гъэм фэпIугъэнхэр, зэо­шхом хэтыгъэ тинахьыжъхэу псэемыблэжьхэу нацизмэм мамырныгъэр щы­зыухъумагъэхэр ягъэшIэгъэнхэр Iофтхьабзэм къыдилъытэщтыгъ.

ТхылъеджапIэм изэхэ­хьэ­пIэ унэшхо щыкIогъэ библиолекторием УIэшыгъэ КIуачIэхэм яветеранхэр, дзэ-патриотическэ ыкIи ныб­жьыкIэ объединениехэр, АР-мкIэ къэзэкъ ныбжьыкIэхэм я Союз ялIыкIохэр, АКъУ-м тарихъымкIэ ифакультет истудентхэр, Мые­къопэ гарнизоным идзэ­къу­лыкъушIэхэр хэлэжьагъэх.

Къэзэрэугъоигъэхэр тхылъ къэгъэлъэгъонэу «День, который вернул мир» зыфиIорэм рагъэ­плъыгъэх, ар Адыгеир шъхьафит зашIыжьыгъэр илъэс 80 зэрэхъурэм фэгъэхьыгъагъ. Пшъэрылъэу Iофтхьабзэм иIагъэр АР-м и Лъэпкъ тхылъеджапIэ ифонд Хэгъэгу зэошхом фэгъэхьыгъэу чIэлъыр зы­фэдэр, тарихъыр шъып­къэм тетэу ахэм къызэращытыгъэр пстэуми афиIотыкIыгъэныр ары.

Патрио­тическэ пIуныгъэр гъэлъэ­шыгъэным фэшI анахь шъхьаIэр уитарихъ, хэку гу­псэм ехьылIэгъэ пстэур пшIэн зэрэфаер, ахэм мэхьанэ зэряIэр кIигъэт­хъэу зэхахьэр гъэпсыгъагъэ.

Тхылъ къэгъэлъэгъон инэу мэкIаиплI зыубытырэр Iахьи 3-у зэтеуты­гъагъ. Адыгеир оккупацием илъэ­хъан зытетыгъэр, ащ илъэс­ныкъо зэрикъудыигъэр, къи­ныгъо гуимыкIыжьэу цIыфхэр зыхэтыгъэхэр; партизан движением лъэшэу ишIуагъэ къызэрэкIуа­гъэр, тицIыфхэм ялIыгъэ­-гукIэгъу зэрэгъунэнчъы­гъэр, тисоветскэ дзэ­кIолI­хэм фашистхэр Адыге­им щылэ-мэзэе мазэхэм, 1943-рэ илъэсым зэрэрафыжьыгъэхэр тхылъ экспо­зициер иIэубытыпIэу къыриIотыкIыгъ отделым ибиб­лиограф шъхьаIэу Александр Данильченкэм. Тхылъ къэгъэлъэгъоным уасэ ыкIи тарихъ мэхьанэшхо зиIэ тхылъи 10 пчъагъэ, гъэзет ыкIи журнал тхыгъэхэр хагъэхьагъэх.

Анахь тхылъ гъэшIэгъон­хэу К. Ацумыжъым, Хь. Сы­джыхьым, М. Шы­бзы­хъум атхыгъэхэм

А. Да­нильченкэр кIэкIэу къатегущыIагъ. Хэгъэгум паемэ, цIыфхэр зэрэпсэемыблэжьыгъэхэр, хъу­лъфыгъэхэм ямызакъоу, Адыгеим ибзылъфыгъэхэри пыим зэрэпэуцужьыгъэхэр, фронтым ыкIыб зэрэщы­лэжьагъэхэм нэмыкIэу, хэкум ыпхъу кIасэхэр зао­ми лIыблэнагъэ зэрэщызэ­рахьагъэр Мыекъуапэ пы­им зештэм, нахьыжъхэм акIырыплъыхэзэ, яхэгъэгу шIулъэгъу лъагэу кIэлэцIыкIу еджэкIо Iэтахъохэу Женя Поповым, Коля То­каревым, Юра Сазоновым, нэмыкIхэми лIыгъэу къахэфагъэм, Хэгъэгум шIулъэгъоу тицIыфхэм фыряIэм ахэр нацистхэм зэраты- ригъэкIуагъэр А. Да­ниль­чен­кэм игущыIэ щыкIигъэт­хъыгъ.

Iофтхьабзэм хэлэжьэгъэ хьакIэхэм ащыщхэри къэгущыIагъэх, лъыхъон-къэгъотыжьын IофымкIэ гъэзагъэу ашIэрэр, Хэгъэгу зэошхом итарихъ тшIэн, ащ илIыхъужъхэр гъэлъэпIэгъэнхэ зыкIыфаер джащ фэдэу мы уахътэм кIорэ хэушъхьафыкIыгъэ дзэ опе­рациер нацизмэм ылъэпсэ шIой гъэкIодыгъэным зэрэ­фэлажьэрэр къаIуагъ, уп­чIэхэм джэуапхэр къаратыжьыгъ. Мамырыкъо Нуриет.