Къэралыгъо программэ зэфэшъхьафхэм яшIуагъэкIэ аужырэ илъэсхэм гъэсэныгъэм исистемэ хэхъоныгъэ инхэр фэхъух, гурыт еджапIэхэр, кIэлэцIыкIу IыгъыпIэхэр кIэу ашIых, гъэцэкIэжьын IофшIэнхэр арашIылIэх.

Гурыт еджапIэхэр джырэ шап­хъэхэм адиштэу зэтегъэпсыхьэгъэнхэмкIэ программэм ишIуагъэкIэ гъэрекIо Адыгеим сомэ миллион 600 фэдиз къыфатIупщи, агъэфедагъ. Къалэу Мые­къуа­пэ, Мыекъопэ, Шэуджэн, Красногвардейскэ районхэм адэт гурыт еджэпIи 8 агъэцэ­кIэжьыгъ. Шъугу къэдгъэкIыжьын, политическэ партиеу «Единэ Россиер» кIэщакIо зыфэхъуи, Урысыем и Президентэу Владимир Путиным зыдыригъэштэгъэ программэр илъэси 5-м къыкIоцI агъэцэкIэщт.

Красногвардейскэ районымкIэ мы программэм апэу къыхиубытагъэр Красногвардейскэм дэт гурыт еджапIэу N 11-р ары. АгъэкIэжьыгъэ еджапIэм бэмышIэу тыщыIагъ, зэтырагъэпсыхьэ­жьыгъэ учреждениер зэдгъэлъэгъугъ, пащэм, кIэлэегъаджэхэм, кIэлэеджакIо­хэм гущыIэгъу тафэхъугъ.

— Гурыт еджапIэр 1965-рэ илъэсым къызэIуахыгъагъ, гъэцэкIэжьын IофшIэнышхо ищыкIэгъагъ. ГъэрекIо къэралыгъо программэу «Модернизация школьных систем образования» зыфиIорэм тыхафи, тиеджапIэ агъэкIэжьыгъ. Федеральнэ, республикэ ыкIи чIыпIэ бюджетым къахэхыгъэ сомэ миллион 30-рэ мин 500-рэ ащ пэIухьагъ, АР-м гъэсэныгъэмрэ шIэныгъэмрэкIэ и Министерствэ сомэ миллиони 4 зытефэгъэ мебель къычIигъэуцуагъ. Аужырэ шап­хъэхэм адиштэ хъугъэ тиеджапIэ, — еIо гурыт еджапIэм ипащэу Людмила Ба­кановам.

АгъэкIэжьыгъэ еджапIэр джы гупсэфыпIэ хъугъэ, фабэ, дахэу зэIухыгъ. Уна­шъхьэмрэ шъхьаныгъупчъэхэмрэ ямызакъоу, зэкIэ зэблахъугъ, дэпкъхэр чырбыщым нэсэу агъэтэкъожьхэзэ агъэ­кIэжьыгъэх, джэхашъохэр, пчъэхэр, элек­тричествэм ыкIи фабэм ярыкIуапIэхэр зэблахъугъэх. Классхэр зэтырагъэпсыхьажьыгъэх, аужырэ шапхъэхэм адиштэрэ оборудованиер, мебелыр ачIагъэуцуагъ, пщэрыхьапIэм пае ищыкIагъэр зэкIэ зэрагъэгъотыгъ, дахэу зэ­Iуахыгъ.

ЕджапIэм къыпэIулъ чIыпIэм изэтегъэпсыхьан джы къафэнагъэр. Ежь кIэ­лэегъаджэхэм ыкIи кIэлэеджакIохэм аIэ къыхьырэмкIэ щагур дахэу зэIуахыгъ, чъыг зэфэшъхьафхэр, розэ лъэкъо 300 фэдиз агъэтIысхьагъ.

— Тыкъэзыуцухьэрэ дунаим фэса­къынхэм тикIэлэеджакIохэр фэтэпIух. апэрэ мафэм къыщегъэжьагъэу ахэтэлъ­хьэ. Щагум идэхагъэ ахэм аIэ илъ. ТхылъыпIэжъхэр къаугъойи ащ кIахыгъэ ахъщэмкIэ мы чъыг цIыкIухэр къащэфыгъэх, ахэм алъэплъэх, псы акIакIэ. Сабыим иIахь IофшIагъэм хэлъ зыхъукIэ, ащ къыкIэкIуагъэм нахь фэсакъы. Джащ фэдэу гъэцэкIэжьынхэр зырагъажьэм, тиеджапIэ зыфэдэщтыр къызэрашIошIырэм епхыгъэу зэнэкъокъу зэхэтщэгъагъ, ащ бэ хэлэжьагъэр, гукъэкIэу яIэхэр къызфэдгъэфедэхэзэ зэIутхыжьыгъ, дахэ хъугъэ, — еIо тигущыIэгъу.

Гурыт еджапIэр инэп, ау игъэхъагъэ­хэмкIэ къахэщы, шэн-хэбзэшIухэм арыгъуазэхэзэ кIэлэеджакIохэм шIэныгъэ арагъэгъотыным яшъыпкъэу дэлажьэх, ащ да­кIоу патриотическэ пIуныгъэ ахалъхьэ. Тхьамафэм ипэублэ анахь гъэхъэгъэ­шIухэр зышIыгъэ кIэлэеджакIохэм быракъхэр аIэтых, а чIыпIэм нэбгырэ пэпчъ итынэу фай, зэнэкъокъужьхэзэ еджэх.

ЗэкIэмкIи нэбгырэ 216-рэ мыщ чIэс. Апэрэ классым нэбгырэ 19 къычIэ­хьагъ, пэублэ классхэм нэбгырэ 86-рэ ащеджэ, я 11-рэ классыр нэбгыри 9-мэ къаухы. Апшъэрэ классхэр мыщ щырагъэджэнхэ амал яIэ зыхъугъэр бэшIагъэп, аужырэ илъэсиплIыр ары я 11-рэ классым нэс рагъэджэнхэ алъэкIы зыхъугъэр. Апэрэ классым къыщегъэжьагъэу зычIэсыгъэхэ еджапIэм зыкI къэралыгъо ушэтынхэм защафагъэхьазырынри, аттестатхэр къащаратыжьынри нахь гупсэф.

Гурыт еджапIэм ипащэ икабинет щытхъу тхылъхэр, кубок зэфэшъхьафхэр чIэтых. БэмышIэу футболымкIэ зэхащэгъэ турнирым анахь цIыкIухэр зэрэхэлэжьагъэхэм ыкIи ящэнэрэ чIыпIэ къызэрахьыгъэм рыгушхозэ Людмила Бакановам къытфеIуатэ. Ащ нэмыкIэу лъэныкъо зэфэшъхьафхэмкIэ районым ыкIи республикэм ащызэхащэрэ Iоф­тхьабзэхэм кIэлэегъаджэхэри, кIэлэ­еджа­кIохэри ахэлажьэх, гъэхъэгъэшIу­хэр ашIых.