«Цифрэ гъэсэныгъэмкIэ Гупчэу «Точка роста» зыфиIорэм ишIуагъэкIэ къоджэ еджапIэхэм ачIэс кIэлэеджакIохэм шIэныгъэ дэгъухэр яIэ мэхъух, къа­лэхэм ащеджэхэрэм яамалхэм акIа­гъахьэ. 2021-рэ илъэсым къыщегъэжьагъэу класс заулэмэ технологиякIэхэм адиштэрэ оборудование ачIагъэуцуагъэу гъэсэныгъэ тедзэм ылъэныкъокIэ игъэ­кIотыгъэу Iоф ашIэ.

Ащ фэдэ еджэпIэ гупчэм ипащэу агъэ­нэфагъэр химиемкIэ кIэлэегъаджэу Ирина Очкасовар ары. Ащ къызэрэти­IуагъэмкIэ, лъэныкъуиплIыкIэ гъэзагъэу Iоф ашIэ. ФизикэмкIэ, биологиемкIэ, хи­миемкIэ, технологиемкIэ кIэлэеджа­кIохэм яшIэныгъэхэм ахагъахъо. Iэмэ­-псымакIэхэр яIэхэу ахэр егъэджэгъу сыхьатми щагъэфедэх, химическэ препаратхэр, гербариехэр, микроскопхэр аIыгъхэу Iоф ашIэныр нахь ашIогъэшIэгъон, шъхьэми ар нахь къенэжьы.

Джащ фэдэу «Успех каждого ­ребенка» зыфиIорэ программэм къыдыхэлъытагъэу лъэныкъуитIукIэ гъэзагъэу гурыт еджа­пIэм щеджэхэрэм ясэнаущыгъэ хагъахъо. Художественнэ лъэныкъомкIэ кIэлэеджэкIуи 120-рэ, зекIо-краеведческэм нэбгырэ 45-рэ къякIуалIэх, районым ыкIи республикэм ащызэхащэрэ зэнэ­къокъу зэфэшъхьафхэм ахэлажьэх, ха­гъэунэфыкIырэ чIыпIэхэр къыдахых.