Юлия Лисянскаям Андырхъое Хъусен ыцIэ зыхьырэ колледжым ыуж Адыгэ къэ­ралыгъо университетым чIэхьажьыгъ. ИIоф­шIэн пэублэ классхэмкIэ ригъэжьэ­гъагъ, нэужым инджылызыбзэ аригъэшIэнэу мы гурыт еджапIэм къыIухьагъ. ИлъэситIу нахь мыхъугъэми мыщ Iоф зыщишIэрэр сабыйхэм шIэхэу агурыIуагъ.

— КIэлэегъэджэ сэнэхьатым сыдигъокIи сыфэщэгъагъ. Сыкъызэрыхъухьэгъэ уна­гъом исыгъэхэр зэкIэ гъэсэныгъэм епхыгъагъэх. Арын фае IэубытыпIэ сфэхъугъэри. Инджылызыбзэр ятIонэрэ классым къыщегъэжьагъэу ясэгъашIэ. Пэублэ классхэм джэгукIэ шIыкIэм тетэу Iоф адэ­сэшIэ, темэ пэпчъ ашъхьэ къинэжьынэу зэ­фэхьысыжь сыхьатхэр сэшIых. Ыпэра­пшIэу нэIуасэ узэрэзэфэхъущт гущыIэхэр ясэгъашIэх, гущыIэхэр дэгъоу къаIо зы­хъукIэ, тхэным тыфежьэ, — къытфеIуатэ кIэлэегъэджэ ныбжьыкIэм.

Юлие ныбжьыкI нахь мышIэми, гъэхъэ­гъэшIухэр ышIынхэу игъо ифагъ. Илъэс заулэкIэ узэкIэIэбэжьмэ, «Илъэсым икIэлэегъадж» зыфиIорэ зэнэкъокъум хэлэ­жьагъ ыкIи хагъэунэфыкIырэ чIыпIэ къыщыдихыгъ, щытхъу тхылъ зэфэшъхьафхэри иIэх. Анахь мэхьанэ зиIэу ылъытэрэр гъэрекIо класс пащэхэм я Форумэу Москва щыIагъэм зэрэхэлэжьагъэр ары. Шъолъыр зэфэшъхьафхэм къарыкIыгъэхэм яIофшIэн зэрэзэхащэрэр нэрылъэгъу къыфэхъугъ, ыпэкIэ иIофшIэнкIэ ыгъэфедэжьынэу бэ зэхихыгъэр.

— Форумым ыуж сиIофшIэн нахь хэзгъэхъонэу езгъэжьагъ, бэ кIэу слъэгъугъэр ыкIи зэхэсхыгъэр. Ушэтынэу тиIа­гъэ­хэр IэшIэхыгъэхэп. Анахь къинхэм ащыщыгъ кIэлэцIыкIум гумэкI инэу иIэр гъэсэныгъэ элементхэр бгъэфедэзэ зэрэзэшIопхын фаер ары. Ащ къеушыхьаты класс пащэу узыкIокIэ пшъэдэкIыжь ин зэрэпхьырэр. Нэбгырэ пэпчъ ишэн зэфэшъхьаф, къызэрыкIырэ унагъоми елъытыгъ игъэ­псыкIэ. Цыхьэ къыпфашIын, гумэкIыгъо горэ яIэмэ къыокIолIэнхэр, амалэу щыIэмкIэ IэпыIэгъу уафэхъуныр ары пшъэрылъ шъхьаIэр, — еIо Юлие.