Вероника Петренкэм гурыт еджапIэм къы­чIэхьэрэ кIэлэцIыкIухэр шIэныгъэм игъогу зэрэтырищэщтхэм имызакъоу, ныб­джэгъуныгъэ, гукIэгъуныгъэ азыфагу илъэу зэригъэсэщтхэм ыуж ит.

АщкIэ ишIуагъэ къэкIо проект зэфэшъхьафэу зэхигъэуцо­хэрэм. Тэ тызэкIом, Тхылъ Плъыжьым дэ­хьэгъэ псэушъхьэхэм ыкIи хьэцIэ-пIацIэхэм ясурэтхэр ашIыщтыгъ, ахэм афэ­гъэхьыгъэ къэбархэр аугъоигъэх. Нэужым зэкIэ зэхэубытагъэу классым и «Тхылъ Плъыжь» агъэхьазырыжьыщт.

Вероникэ ригъаджэхэрэр ятIонэрэ классым исых ныIэп, ау творческэ зэнэкъокъу зэфэшъхьафхэм ахэлажьэх ыкIи гъэхъэ­гъэшIухэр яIэх.

Пшъэшъэжъыер кIэлэегъэджэ унагъо къи­хъухьагъ. Янэжъ илъэс 40-рэ пэублэ классхэмкIэ кIэлэегъаджэу Iоф ышIагъ, ицIыкIугъом къыщегъэжьагъэу ар Вероникэ ищысэтехыпIагъ. Кубанскэ къэралыгъо уни­верситетым кIэлэегъэджэ-дефектологэу щеджагъ, магистратурэр пэублэ классхэмкIэ кIэлэегъаджэу къыухыжьыгъ.

— Анахь цIыкIухэм Iоф адэсшIэныр нахь сыгу рехьы. Зыпари зымышIэрэ кIэлэцIыкIухэр шIэныгъэм игъогу тепщэнхэр сшIогъэшIэгъон. Сыд фэдэ гумэкI сиIэми, ар унэм къисэгъанэ, сыгушIозэ классым сехьэ, сыда пIомэ езгъаджэхэрэр сэ къыскIырыплъыщтых, — къытфеIуатэ тигущыIэгъу.

ЕджапIэм имызакъоу, ныбджэгъуныгъэ азыфагу зэрилъыщтым фэшI икIэлэ­еджа­кIохэм Iофтхьэбзэ зэфэшъхьафхэр афызэхещэх, зекIо ещэх. Пэублэ классхэм анэмыкIэу зы класси ар ипащ. Гурыт еджа­­пIэм Iоф щызышIэрэ анахь кIэлэ­егъэджэ ныбжьыкIэ чанхэм ащыщ, зэнэ­къокъу зэфэшъхьафхэм ахэлажьэ ыкIи гъэ­хъэгъэшIухэр ешIых.